18. इस्राएल देशा रा बटवारा

दाऊद राजे चाहली साला तणी राज करू। तेता वाद सह मुअं, होर तेऊ रे शोहरू सुलैमाने इस्राएला में राज करणा शुरू करू। परमेश्वरे सुलैमाना का गल्ला करी होर तेऊ का पुछु सह सभी का ज्यादा कैह चाहदा जोह महा ताहब करना। सुलैमाने परमेश्वरा का बोलू की महा बहु बुद्धिमान बणा। ऐसा गले सगा परमेश्वर खुश करू, तेवा परमेश्वरे सुलैमाना वे संसारा रअ सभी का बुद्धिमान मणश बणाउ। सुलैमाने बहु गल्ला सीखी होर सह राजा करन आलअ एक बुद्धिमान मणश थी। परमेश्वरे सह बहू सेठ बणाउ थी।

सुलेमाने यरूशलेमा शहरा में सह मंदिर बणाउ जासकी योजना तेऊ रे बापू बणाई दी थी होर होर मदिरा बे बड़ाऊणे बे सामान कठे करूदा थी। एवा लोका मिलापा आल़े ताम्बु छाडी करे मंदिरा में परमेश्वरा री आराधना करा थी होर तेऊ वे बलि चढ़ाउदा थी। परमेश्वर इच्छी करे मंदिर में हाजीर रहंधा थी,होर तखे सह आपणे लोका संघे रहंधा थी।

पर सुलैमाने दूजे देशा री बेटड़ी संघे प्रेम करू। तेउये बहू, लगभग 1,000 बेटड़ी संघे ब्याह करी करे परमेश्वरा रा आदर नाँई करू! याह में बहू बेटड़ी होरी देशा का आई दी थी होर आपु संघे आपणे देऊ भी सगे आणी दे थी होर त्या आपणे देऊ री आराधना करणी नाँई छाडी। जेवा सुलैमान भी बूढ़लअ होऊ तेवा तेउये भी त्या रे देऊ री आराधना करी।

एसा बजहा का परमेश्वर सुलैमाना का नाराज थी। होर तेऊ सुलेमाना का बोलू महा तेरे मरने बाद इस्राएला देशा रे दुई राज्य बडाऊणे होर त्या बे सजा दीणी।

सुलैमान रे मरणे का बाद, रहबाम राजअ बणू। इस्राएल देशा रे सभे लोका तेऊ आपणे राजा रे रूपा में स्वीकार करणे री तणी एकी बारी कठे होई। लोके रहबामा का शिकायत करी कि सुलैमाने हामा का बहु मेहनत कराई थी होर बहू चुगी वसूली थी। त्याये रहबामा का बिनती करी कि त्या का कम काम कराए।

पर रहबामें त्या वे बड़ी रोशे संघे जबाब दिना, "तमे बोला कि मेरे बापू सुलैमाने तमा का बहू मेहनत कराई। पर माह तमा का तेता का भी बहू मेहनत कराऊणी, होर माह तमे तेता का भी बहू दुखी करणे।"

जेवा लोके रहबाम एडअ बोलदअ शुणू तेवा कई लोके तेउरा बिरोध करू।तेता में दसे गोत्रा रे लोके सह छाडू ; तेउ संघे सीधी दुइये ही गोत्र बची थी। याहे दुई गोत्रे आपणे आपा वे यहूदा रा राज्य बणाऊ।

बाकी रे दसे गोत्रे यारोबाम ना रअ एक मणश राजा बणाउ। या गोत्र देशा रे उत्तर-पूर्वी भागा में थी। याहे दस गोत्रे मिली करे आपणे आपु वे इस्राएला रा राज्य बणाऊ।

पर यारोबामें परमेश्वरा रा बिरोध करू होर लोका का पाप करवाउ। तेऊये आपणे लोका का आरधना करणे री तणी दूइ मूर्ति बणाई। त्या एबा यहूदा रे राज्य में यरूशलेमा परमेश्वरा रे मंदिरा में परमेश्वरा री अराधना करणे री तणी नाँई नाहदे थी।

यहूदा रे राज्य होर इस्राएली रे राज्य शत्रु बणी होर एकी दूजे रे खिलाफ लड़दे लागे।

इस्राएला रे नउये राज्य में, जेथरे भी राजा आए त्या सारे राजा दुष्ट थी। याह में कई राजा इस्राएली लोके मारी जोह आपु राजा बणना चहान्दा थी।

इस्राएला देशा रे सारे राजे होर बहू लोके मूर्ति री पूजा करी। जेबा त्याहे एडा करु,तेबा त्याहे हर बारी बेश्या बेटड़ी गलत काम करू, पर कई बारी त्याहे मूर्ति जेह आपणे शोहरू री बलि भी दीनी।

यहूदा राज्य रे राजा, दाऊदा रे वंशज थी। याहा राजा में कई भले मनश थी,जासुये भले कामे सगे राज करु होर परमेश्वरा री स्तुति करी। पर यहूदा रे बहू राजा दुष्ट थी। तयाहे बुराई सगे राज करु, होर मूर्ति री पूजा करी। अखे तणी की याहा में का एखा राजा झुठे देऊआ सेटा आपणे शोहरू री बलि भी करी। यहूदा रेराज्य रे बहू लोके परमेश्वरा रे बिरोधा करु, होर होरी मूर्ति री पूजा करी।