2. पापा रा संसारा में ईहणा

परमेश्वरे मर्द होर बेटडी एकी दूजे सगे रहणे री तणी बणाई, त्या तेऊ बगीचे में खुशी सगे रहंदे लागे थी। परमेश्वरे यह बगीचा त्या बे बणाऊदा थी। तेऊ वक्ते त्या जेह झिकड़े बानणे बे नांई थी तेबा त्या नेगे रहंदा थी , पर तेउकी भी त्या एसा गला री शर्म नाँई हुन्दी थी, किवेकी तेऊ वक्ते संसारा में पाप नाँई थी। त्या दुहे तेऊ बगीचे में घुमदे रहंदा थी होर परमेश्वरे सगे गला करदे रहंदा थी।

पर तेऊ बगीचे में एक सर्प थी सह बहु चलाक थी। तेऊ सरपे बेटड़ी का पुछु, "कह सची परमेश्वरे तमा बे एउ बगीचे रे कासी भी बूटे रे फला खाणे बे नांई करू आसा?"

तेसा बेटड़ी उतर दीना, “परमेश्वरे हामा बे बोलू दा साहा की तमे तेऊ भले होर बुरे रे ज्ञाना रे बूटे रे फला छाडी करे कासी भी बूटे रे फल खाई सका। परमेश्वरे हामा बे बोलू दा साहा की अगर तमे तेऊ ज्ञाना भले होर बुरे रे फला खाले या छुले भी तेबा तमे मरने।”

तेऊ सरपे तेसा बेटड़ी बे उतर दीना, “यह सच नांई आंधा! तमे नांई मरने। परमेश्वर जाणा की जेड़े ही तमे तेऊ फला खाले, तमे परमेश्वरा रे बराबर हुणे होर तेऊ साही भले होर बुरे समझदे लागणे।’’

जेबा तेसा बेटड़ी हेरू की सह फल हेरने बे शोभलअ थी होर खाणे बे सुआदा आलअ हेरा थी। सह भी समझदार बणना चाह्न्दा थी, तेबा तेसा फल चोडू होर खाऊ। तेऊकी तेसा सह आपणे मर्दा भी दीनअ होर तेऊ भी खाऊ।

फला खाणे बाद एकदम त्या री आछी खुली, होर त्या पता लागा की त्या नेगे आसा। तेउकी त्याहे पाच कठे करी करे मिलाई होर त्यारे झिकडे साही बणाई करे आपणे शरीरा ढोपणे री कोशिश करी।

तेबा आदम होर तेऊरी बेटड़ी बगीचे में हांडदे फिरदे परमेश्वरा री हाका शूणी। त्या दुहे परमेश्वरा का डरी करे गोझी। तेबा परमेश्वरे हाका पाई, “आदम! तूह कई तूह कई आसा?’’ आदमे बोलू, “माए बगीचे में हांडदे वक्ते तेरी हाका शूणी थी, होर हाऊ डरु, किबेकी हाऊ नेगअ थी। तेबा हाऊ गोझू।’’

तेउकी परमेश्वरे पुछु, “ताह बे कुणी बोलू की तूह नेगअ आसा? कह ताए सह फल खाऊ जासु खाणे बे माए नांई बोलू दा थी?’’ आदमे बोलू, “ताए जोह बेटड़ी महा बे दीनी दी साहा तेसे यह फल महा बे दीनअ।" तेबा परमेश्वरे बेटड़ी का पुछु, "ताए यह कह करू?" तेसा बेटड़ी बोलू, "सरपे महा बे धोखा दीना।"

परमेश्वरे सर्पा बे बोलू, "ताहबे हाऊ शाप दिंदा! तुह आपणे पेटे सगे हांडण होर ताहा माटा खाणा। ताह होर एसा बेटड़ी एकी दूजे का नफरत करनी, होर तेरी संताना भी एकी दूजे का नफरत करनी। एसा बेटड़ी रे बंशा तेरे मुड़ फालण, होर ताहा एसा बेटड़ी री टागा डसणी।"

तेबा परमेश्वरे बेटड़ी बे बोलू, "महा तेरी सुईणे री दाह बहु बढ़ाऊणी। ताह आपणे मर्दा का सहायता मागणी होर तेऊ ता पेंदे अधिकार करणा।"

परमेश्वरे आदमा बे बोलू, "ताए आपणी बेटड़ी री शूणी होर मेरी आज्ञा नांई मनी। तेबा धरती शापित होई, होर ताह फसला बऊदे वक्त बहु मेहनता री जरूरत हुणी। एबा तुह मरण, होर तेरा शारीर माटे में मिलणा।" तेऊ आदमे आपणी बेटड़ी रा ना हबा डाहु, जासका मतलब "जिंदगी दीण आली", किबेकी सह सभी जाति री आमा हुणी। होर परमेश्वरे आदम होर हबा बे जानबरा रे खाली रे झिकड़े बानहणे बे दिने।

तेउकी परमेश्वरे बोलू, "एबा भले होर बुरे रे जाणने मणश हामा बराबर होऊ, तेबा तेऊ जीबना रे बूटे रे फल खाणे नांई दीणा, की त्या सदा बे जिऊद रहे।" तेबा परमेश्वरे आदम होर हबा बे तेऊ बगीचे का बागे काहडी। होर परमेश्वरे कासी भी तेऊ जीबना रे बूटे रे फल ना खाए तेबा परमेश्वरे तेऊ बगीचे रे नाहणे रे दूआरा सेटा शक्तिशाली स्वर्ग दूत दुआरा सेटा पहरे दिंदे डाही की कोहे भी तेऊ जीबना रे बूटे रे फला नाँई खाई सके।