3. खासा पाणी

बहू बकता पहिले संसारा में बहु सारे लोका रहंधा थी। तया बहु ज्यादा दुष्ट होर होई थी। तेऊ वक्ता रे लोक एतरे बुरे कामा करदे लागे थी त्या कासी का भी नाँई डरी थी या। लोका रे बुरे काम हेरी करे परमेश्वरे यह बिचार करू की महा पूरा संसार पाणी सगे नष्ट करणा |

पर परमेश्वर नुहा का खुश थी। सह बुरे लोका रे बीचे एक धर्मी मनश थी, जोह दुष्ट लोका मन्झे रहंदा थी। तेबा परमेश्वरे नुहा बे खोजू की “महा खासा पाणी भेजी करे यह सारी धरती नष्ट करणी’’। तेबा परमेश्वरे नुहा बे एक बडी जहाज बड़ाऊने बे बोलू।

तेउकी परमेश्वरे नुहा बे बोलू, तूह एक काठा री एक जहाज बणा जासकी लम्बाई 140 मीटर होर चोडाई 23 मीट होर उचाई 13.5 मीटर होए। तूह तेता में एक ताकी एक दुआर, छापर होर तेता महितर चीण कमरे बणाये। किस्ती तेरी, होर तेरे परिवारा री होर जमीन में रहण अले हर तरहा रे जानबरा री तेऊ पाणी का रक्षा करनी।

नूहे परमेश्वरा री आज्ञा मनी। नुहे होर तेऊरे चीही शोहरू भी ठीक तेडी किस्ती बणाई जेडी परमेश्वरे त्या बे खोजी थी। किबेकी सह किस्ती बडी थी तेबा तेता बणाऊणे बे कई साला लागी | नुहे लोका बे इहण आल़े खासे पाणी रे बारे में चेताबनी देई करे बोलू की परमेश्वरा पेंदे बुशाह करा,पर लोके नुहा री गला पेंदे बुशाह नाँई करू, होर त्या पापा री जिंदगी जिउंदे रही।

परमेश्वरे नुहा बे आज्ञा दीनी, “तूह आपु बे होर आपणे टबरा बे आपु बे होर जानबरा बे खासा खाणे बे कठे कर। जेबा सबे साहा तयार होऊ, तेबा परमेश्वरे नुहा बे बोलू, एबा तेरा तेरी लाड़ी रा,तेरे चीही शोहरू रा तेरी चीही नुशा रा किस्ती में नाहणे रा वक्त आउआ।’’

परमेश्वरे हर तरहा रे नर होर मादा जानवर होर हर तरहा रे नर होर मादा चेलू नुहा सेटा भेजी की त्या किस्ती में बेशे। परमेश्वरे एडे साबे हर तरह रे जानबर सात नर होर सात मादा भेजी जासू बे बलि चढाऊणे बे करी सके | जेबा त्याह सभे किस्ती में बेठे तेबा परमेश्वरे आपे किस्ती रअ दुआर बंद करू।

तेबा सरगा का पाणी ईहणा शुरू होऊ, होर पाणी बिना रुके चाहली धयाडी लागातार हुंदा रहू होर संसारा री हर एक चीजा डूबी, अखे तक की बड़े उचटे-उचटे पहाड भी पाणी में डूबी।

शुकी धरती में रहण आली हर एक चीज खत्म होई,पर किस्ती पाणी में चलदी रही, होर जेथरे लोका किस्ती में बेठे दे थी त्या सबे बची।

पाणी रुकणे रे बाद, पाज महीने तणी जहाज पाणी में तैरदी रही, होर तेऊ बकते पाणी कम हुंदा लागा थी। तेबा एकसा धयाडी सह किस्ती एकी पहाडा में टेकी, पर जमीना में एबरे भी बहु सारा पाणी थी। चीई महीने बाद,पहाडा री जोता थोड़ी -थोड़ी हेर्दी लागी थी।

तेउकी नुहे चाहली धयाडी बाद, नुहे एक काऊडअ यह हेरने बे बागे भेजू की पाणी शूका या नाँई | सह काउडअ शुकी जमीना लोडअ होरी – पोरी ऊडदअ रहू, पर तेरु कंधे भी शुकी जमीन बेशणे बे नाँई भेटी।

तेउकी नुहे बागे एक कबूतरी भेजी, पर तेसा कबूतरी भी कंधे भी शुकी जागहा नाँई भेटी,तेबा सह कबूतरी नुहा सेठा बे बापिस आई। एकी हप्ते बाद नुहे सह कबूतरी भी का भेजी, होर तेसा कबूतरी एकी हप्ते बाद तेऊये सह कबूतरी भी भेजी, होर तेसा आपणी चूजी में ब्याल्के वक्ते जैटूना री एक डाली आणी करे बापिस आई। पाणी धटता लागा थी, होर बूटे भीआ का लागदे लागे थी।

नुह एकी हप्ते होर रुकू होर चीऊणी बारी भीआ का सह कबूतरी बागे भेजी।एसा बारी तेसा बेशणे बे जागहा भेटी थी होर बापिस नाँई आई। किबेकी पाणी शुकदा लागा थी।

दुई महीने बाद परमेश्वरे नुहा बे बोलू, “एबा तूह होर तेरा परिवार होर सारे जानबर किस्ती का बागे निखला। होर परमेश्वरे त्या बे आशीष दीनी की बहु शोहरू पैदा करा होर पुरे संसारा में फैला। ’’ तेबा नुह होर तेऊरा सारा परिवार किस्ती का बागे आऊआ।

नुहा रे किस्ती का बागे ईहणे बाद, सभी का पहिले तेऊ एक बेदी बणाई, होर बलि दीणे रे जानबरा में का कुछ जानबर आणी होर परमेश्वरा बे बलि चढ़ाई होर तेउरी आराधना करी। परमेश्वर तेसा बलि का बखे खुश होऊ होर तेऊ नुह होर तेउरे परिवारा बे आशीष दीनी जासु जानबरा री बलि दीणे बे परमेश्वरे बोलू थी, त्या में का एखा जानबरा री बलि नुहे दीनी | परमेश्वर त्यहा बलि का खुश हौऊ होर नुह होर तेउरे टवरा बे आशीष दीनी।

परमेश्वरे बोलू, “हाऊ बचन दिंदा की मणशा सगे हूण आल़े बुरे कामा री बजा का माह कधी भी जमीना बे शराप नाँई दीणा, होर ना पाणी सगे संसार नष्ट नाँई करण,किबिके मणश जन्मा का ही पापी साहा।’’

तेउकी परमेश्वरे आपणे बायदे रअ निशाण बदल धनुष बणाऊ। जेबरे भी सरगे बादला रअ धनुष हेरदा, तेबा परमेश्वर यह याद करना की तेऊ आपणे लोका सगे केह बाईधा करू थी, होर तेडे ही साबे तेऊरे लोका भी यह याद करना की परमेश्वरे केह बायदा करू दा थी।