4. अब्राहमें सगे परमेश्वरा री बाचा

पाणी रे कई साला वाद संसारा में बहु सारे लोका रहंधा थी, होर त्या एके भाषा बोला करा थी, तेवा त्या एकी बारी कठे होई, होर एकी कोठी बणाऊदे लागे, त्याहे भीआका परमेश्वरा रे बिरोधा में एकी दूजे रे बिरोधा में भीआका पाप करना शरू करू। होर परमेश्वरे त्या बे जेडी आज्ञा दीनी थी, तेऊ रे साबे त्या पुरे संसारा में नाँई फैली।

त्या बहु धमण्डी थी, होर त्या केडी जिंदगी जीई लोडी एउ साबे त्या परमेश्वरा री आज्ञा रा पालन नांई करना चहान्दा थी। तेबा त्याहे एक एडी एक बडी कोठी बणाऊणी शुरू करी जोह सरगे तणी पूजे। परमेश्वरे हेरू की “अगर तया एकी साबे कठे होई करे बुरे कामा करले रहले, तेबा त्या होर भी बहु सारे पापा आल़े कामा में लागी रहणा।’’

तेबा परमेश्वरे त्यारी भाषा कई अलग -अलग भाषा में बदली, होर त्या लोका सारे संसारा में फैलाई। जासु कोठी त्याहे बणाऊणी शुरू करी थी तेऊ नगरा बे बाबेल बोला जासका मतलब साहा “गडबडी”।

बहु साला बाद, परमेश्वरे अब्राम ना रे एकी मणशे सगे गला करी। परमेश्वरे तेऊबे बोलू, “आपणे देशा होर परिवार छाडी करे तेऊ देशा बे नाह जोह महा ताहबे रीहाऊण। महा ताहबे आशीष दीणी होर तहाक एक बडी जाति बणाऊणी। महा तेरा ना बड़ा करना। जोह ताहबे आशीष देलअ महा तेऊबे आशीष दीणी, होर जोह ताहबे श्राप दे, महा भी तेऊबे श्राप दीणा। तेरी बजा कअ सारी जाति रे लोका आशीष पाऊणी।”

तेबा अब्रामें परमेश्वरा री आज्ञा मनी। तेऊ आपणे सारे सेबक होर आपणे सारे ढबे ढेले सगे आपणी बेटड़ी सौर सगा नी करे कनाना देशा बे ठुरु जोह परमेश्वरे तेऊ बे रिहाऊ थी।

जेबा अब्राहम कनाने देशे पूजअ तेबा परमेश्वरे तेऊबे बोलू, “अब्राहम आपणे चहु तरफा हेरे। महा यह सारा देश ताहबे दीणअ होर तेरे बंशा सदा बे एता पेंदे अधिकार डाहणा।’’ तेबा अब्राहम तेऊ देशे बसु।

मलिकिसिदक ना रअ एक मणश थी जोह परमेश्वरा रअ सभी का बडअ याजक थी। एकसा धयाडी जेबा अबाहम लड़ाई करी करे हिह्न्द लागअ थी तेबा मलिकिसिदक होर अब्राहम मिली। मलिकिसिदके अब्रहमा बे आशीष दीनी होर बोलू “सभी का बडअ परमेश्वर जोह स्बर्ग होर पृथ्वी रअ मालिक आसा सह ताहबे आशीष दे। ” तेउकी अब्राहमा लड़ाई में जीत होई होर सभी चीजा रा द्समाश मलिकिसिदक याजका बे दीना।

कई साला बीती पर एबरे भी अब्राम होर सौरा रे कोई शोहरू नांई होई थी। परमेश्वरे अब्रामा का गला करी होर तेउकी बायदा करू तेऊ यह बायदा करू की तेरे रे एक शोहरू हुणअ, होर तेऊरा बंश जेड़े सरगे तारे आसा याहा तारे जेहे हुणे। परमेश्वरे बोलू की अब्राम एक धर्मी मणश आसा, किबेकी तेऊ परमेश्वरा रे बायदे पेंदे विशवास करू।

तेबा परमेश्वरे अब्रामा सगा एक बाचा बानी। बाचा दुई लोका रे बीच एकी दूजे सगे कामा करने रा समझोता हुंदा। परमेश्वरे बायदा अब्रामा सगे तेबरे करू थी, जेबरे अब्राम सूती चालु थी, पर सह तेबरे भी परमेश्वरा री गला शूणी सका थी। परमेश्वरे यह बायदा करू की तेरी बेटड़ी सारे का तहाबे एक शोहरु पैदा करण। महा तेरे बंशा बे यह कनान देश दीणअ।" पर एबरे भी अब्रामा रे कोई भी शोहरू नांई थी।