22. यूहन्ना रा जन्म

पुराने जमाने में, परमेश्वरे आपणे लोके सगे भविष्यवक्ता रे जरीहे गला करा थी की त्या तेऊरे लोका बे मसीहा रे बारे में खोजी सके। पर तेऊ बक्ता का तेउकी 400 साला रे बीतने तणी परमेश्वरे त्या संघे कोई गल्ला नाई करी। तेवा परमेश्वरे जकर्याह ना रअ एकी भविष्यद्वक्ता सेटा एक स्वर्गदूत भेजू। जकर्याह होर तेऊरी बेटड़ी एलीशिबा परमेश्वरा रा आदर करा थी। त्या बहू बूढ़ले होई थी, होर त्या रे कोहे भी ओलाद नाँई होई थी।

तेऊ स्वर्गदूते जकर्याह का बोलू , "तेरी बेटड़ी रे एक शोहरू पैदा हुणअ। तूह तेऊ रा ना यूहन्ना डाहे। परमेश्वरा सह पवित्र आत्मा संघे भरण, होर यूहन्ना लोका मसीहा मानने री तणी तैयार करणे। " जकर्याहे जवाब दिना, "हाऊ होर मेरी बेटड़ी शोहरू पैदा करणे री तणी बहू बूढ़ले होईदे साहा ! हाऊ कैडे जाणू कि तुह माह वे सची बोलदअ लाग साहा ?"

तेऊ स्वर्गदूते जकर्याह वे जबाब दिना, “एउ शुभ समाचार शूणाऊणे बे परमेश्वरे हाऊ ताह सेटा भेजूदअ साहा। पर ताए माह पेंदे बुशाह नाई करू, तेवा शोहरू रे जन्म हुणे तणी तेरी जीभ बंद रहणी। होर तेबरी ही, तेऊरी जुबान बंद होई। तेवा सह स्वर्गदूत जकर्याह सेटा का नाठअ। एता बाद , जकर्याह घरा वे आउअ होर तेऊ री बेटड़ी सुईदी होई।

जेवा एलीशिबा छहा महीने री सुईदी होई थी, तेवा सहे स्वर्गदूत एलीशिबा रे रिश्तेदार में मरियम रे सामने प्रकट होऊ। मरियम कुँआरी थी होर तेसका रीसता यूसुफ ना रे मर्धे संघे होई छेकी थी। स्वर्गदूते मरियमा बे बोलू, "तूह सुईदी हुणी होर तेरे एक शोहरू हुणअ। होर तूह तेऊरा ना यीशु डाहे। सह सर्व-शक्तिमान परमेश्वरा रअ शोहरू हुणअ होर सदा बे तेऊ राजा करणा।"

तेबा मरियमें जवाब दिना, “यह कैडे हुणा, किबेकी हाऊ कुबारी साहा?" तेऊ स्वर्गदूते मरियम समझाई, “पवित्र आत्मा ताह पेंदे इहंणा, होर परमेश्वरा री सामर्था ताह पेंदे बणी रहणी। तेबा सह बालक पवित्र, होर परमेश्वरा रअ शोहरू हुणअ।" जोह तेऊ स्वर्गदूते बोलू तेता पेंदे मरियमें बुशाह करु होर मरियमे बोलू शूण हाऊ प्रभु री दासी आसा जेडा प्रभु चाहन्दा माहब तेडा ही होए तेबा स्वर्गदूत तखा का नाठअ।

तेता बाद, मरियमें नाही करे एलीशिबा का मिली। जेडा ही मरियमें एलिशिबा वे नमस्ते करी , एलीशिबा रअ बालक तेसके मितर उछलू। होर एलिशिवा पवित्र आत्मा सगे भरी। वत्य दुई मर्द -बेटड़ी री जिंदगी में जोह परमेश्वरे करू तेता हेरी करे बाकी लोका खुश होई। मरियम ईलिशिवा सगे चीई महीने तणी रही होर तेता बाद घरा वे बापस आई।

जेबा एलीशिबा रे बालका वे जन्म दिणे रा वक्त आऊआ तेबा तेसा एकी शोहरू बे जन्म दीना। जकर्याह होर एलीशिबा तेऊ बालका रा नाम यूहन्ना डाहू, जैडा कि तेऊ स्वर्गदूते आदेश दिना थी। तेवा परमेश्वरे जकर्याह री जुबान खोली। होर सह भीआ कअ बोलदअ लागअ जकर्याह बोलू, "परमेश्वरा री स्तुति हो, किबेकि तेऊ आपणे लोका री दया करी ! होर बोलू यह जोह मेरअ पुत्र आसा, यह सर्ब शक्तिमान भविष्यवक्ता हुणअ। एउ लोका बे खोजणा की केहडे त्या रे पाप माफ होई सका। ”