23. यीशु रा जन्म

यीशु मसीहा रे जन्मा लऊणे का पहिले यह होऊ की तेऊरी आमा मरियमा रा रिश्ता यूसुफ ना रे एकी मणशे सगा होऊ। पर त्या रा बियाह हुणे का पहिले मरियम पवित्र आत्मा सगे सुईदी होई युसुफ जोह मरियमा रअ हुणे आलअ मर्द थी। सह एक धर्मी मणश थी। जेबा तेऊ एसा गला रा पता लागा तेबा सह मरियमा बदनाम नाँई करना चाहन्द थी, यह सोची करे तेऊ चुप चाप तेसा छाडने रा बिचार करू। पर युसुपा रे एडा करने का पहिले परमेश्वरा रअ स्वर्गदूते इछी करे तेऊ सगे सुपने गला करी।

तेऊ स्वर्गदूते बोलू, "हे यूसुफ, मरियमा आपणी बेटड़ी बड़ाऊणे का नाँई डरे। मरियमा रे पेटे जोह बालक साहा सह पवित्र आत्मा री तरफा का साहा। तेसा एकी शोहरू वे जन्म दिणा। तूह तेऊरा ना यीशु डाहे (जासका अर्थ साहा , 'यहोवाबचाउदा साहा '), किबेकि तेऊ लोका वे त्या रे पापा का बचाउणे। "

जेबा यूसुफे मरियमें संघे ब्याह करु होर सह आपणी वेटडी रे बणाई करे घरा वे आणी, पर यीशु रा जन्म हुणे तणी युसफे मासा रा रिश्ता नाँई डाहु।

जेवा मरियमा रे शोहरू हुणे रा वक्त नेड आउआ थी, तेवा तेसे होर यूसुफे बैतलहमा नाहणे री एक लामी यात्रा करी। त्यारा तखे नाहणा जरूरी थी ; किबेकि रोमी अधिकारी इस्राएला में रहणे आल़े सभी लोका गिणणा चाहदा थी। त्या चाहदा थी कि सब्हे लोका तखा वे नाहे जखे त्या रे पूर्वज रहंधा थी। राजा दाऊद रा जन्म बैतलहमा में होऊ थी, होर सह मरियम होर यूसुफा दुही रे पूर्वज थी।

मरियम होर यूसुफ बैतलहमा वे नाठे, पर तखे रहणे बे त्या जानवरा रे डाहणे आली जगहा छाडी करे रहणे कोहे जागहा नाँई भेटी। सहे जागहा थी जखे मरियमें सह शोहरू झिकडे में लपेटी करे खुडे डाहु किबेकी तखे मरियमा बे रहणे वे रामडी जागहा नाँई थी। त्याये तेऊ वच्चे रा ना यीशु डाहू।

तेसा राची, तखी नेडा रे खेचे एखा फुआल आपणी भेड़ा री रखवाली करदे लागे थी। तेभरी , एकदम चमकदारी स्वर्गदूत त्या पेंदे प्रकट होऊ, होर त्या डरी। तेऊ स्वर्गदूते बोलू, "नाँई डरे, किबेकि माह तमा बे खुशखबरी रा समाचार शूणाऊणा जोह संसारा रे सभी लोका बे हुणा। आज राजा दाऊदा रे बैतलहमा नगरा में तमा बे छुटकारा दीण आलअ पैदा होऊ दअ साहा, होर सहे प्रभु साहा!"

तमा बे तेऊ बच्चे री यह पहचाहण आसा, सह तमा झिकडे में लपेटू दअ खुड़े सताऊदअ बेटणअ।" एकदम सरगे बहु सारे स्वर्गदूत होई। होर त्या परमेश्वरा री स्तुति करदे लागे थी। त्याहा एसा गिहा बोलदे लागे दे थी, स्वर्ग में बिराजमान हमारे परमेश्वरा री बड़ाई हो, धरती में त्याहा लोका शान्ति हो जासकी सह चिंता करा!"

तेवा स्वर्गदूत नाठे।त्या फुआल भी आपणी भेड़ा छाडी करे तेऊ बालका हेरदे नाठे। तेवरी त्या तेसा जागहा में पूजे जखे यीशु थी होर त्याये सह नेहटे डाहुदअ हेरू,ज़ेहडा तेऊ स्वर्गदूते बोलू थी। त्या बखे खुश थी। तेवा त्या फुआल तखा वे वापस आउये जखे त्या री भेड़ा थी। त्याये सभे साहा हेरी करे होर शूणी करे तयाहे परमेश्वरा री स्तुति करी।

पूर्व दिशा रे एकी देशा का एखा बुद्धिमान मणश आये। जासु तारे रे बारे में ज्ञान थी। त्याये एक सरगे बहु बडअ तारअ हेरू। त्याये बोलू कि एउ तारे रा मतलब साहा कि यहूदी रे एकी राजा रा जन्म होऊ साहा। तेवा त्याये तेऊ बालका हेरणे री तणी आपणे देशा का यात्रा करणे रा फैसला करू। एक लामी यात्रा का बाद, त्या बैतलहम नगरे पूजे होर तखे त्या सह घर भेटअ जखे यीशु होर तेऊरे आमा-बापू रुकीदे थी।

जेबा याहे बुधिमाने मर्दे यीशु आपणी आमा रे भोसले हेरू तेवा त्याये घुटने टेकी करे तेऊबे प्रणाम करू। तयाहे यीशु बे कुछ कीमती गिफ्ट भी दीने तेउकी त्या आपणे घरा वे वापस आउये।