25. शैतान यीशु री परीक्षा करदा साहा

यीशु रा बपतिस्मा तेवरी हुणे बाद , पवित्र आत्मा सह जंगला वे निऊ। यीशु तखे चाली धिहाड़ी तणी होर चाली राची थी। तेऊ टाइमे तेऊ ब्रत करी, होर शैताने यीशु सेटा इच्छी करे पापा करणे री तणी तेऊ री परीक्षा करी।

पहिले, शैताने यीशु का बोलू , " अगर तूह परमेश्वरा रअ शोहरू साहा तेवा याह पात्थरा री रोटी बणा कि तूह खाई सके!"

पर यीशुये शैताना का बोलू , "परमेश्वरा रे वचना में एडा लिखूदा साहा, 'जीउदे रहणे री तणी मन्शा अकेली रोटी री जरूरत नाँई साहा, पर त्या तेसा गल्ला री जरूरत साहा जोह परमेश्वर त्या का बोल्दा साहा!'"

तेवा शैतान यीशु मंदिरा रे सभी का ऊचटे सिरे वे निऊ। तेउये तेऊ का बोलू, "अगर तुह परमेश्वरा रअ शोहरू साहा तेवा अखा का छलाग दे, किबेकि लिखूदा साहा, 'परमेश्वरा ताह चुआकणे री तणी आपणे स्वर्गदूता वे आज्ञा दीणी कि तेरी जाँघा में पात्थरा संघे नाँई लागे। '"

पर यीशुये सह नाँई करू जोह शैताने तेऊ का करणे वे बोलू थी। एतके बजाए, तेऊ बोलू , "परमेश्वर हर एकी का बोलदा साहा , 'तूह प्रभु आपणे परमेश्वरा री परीक्षा नाँई करे। '"

तेउकी शैताने तेऊ वे संसारा रे सारे राज्य रीहाई। तेउये तेऊ वे रिहाऊ कि त्या केतरे शक्तिशाली थी, होर त्या केतरे सम्पन्न थी। तेउये यीशु का बोलू, " माह ताह वे यह सब्हे सा दीणा अगर तुह घुटने टेकी करे मेरी उपासना करे।"

यीशु ये उतर दिना , "हे शैताना , माह सेटा का नाह ! परमेश्वरा रे वचना में सह लोका वे सन्देश दिंदा साहा, ' अकेले आपणे प्रभु परमेश्वरा री आराधना करा। परमेश्वरा रे रूपा में अकेले तेऊ रा आदर करा।'"

यीशुये शैताना री परीक्षा का हार नाँई मानी , तेवा शेतान तेऊ सेटा का नाठअ। तेवा स्वर्गदूत इच्छी करे यीशु री सेवा करदे लगे।