28. एक सेठ जुआन राजा

एकसा धिहाड़ी , एकी सेठ जुआन राजा यीशु सेटा आऊओ होर तेऊकअ पूछतअ लागअ , "हे उत्तम गुरु, अनन्त जिदंगी पाउणे री तणी माह कैह करणा आऊआ?" यीशुये तेऊ का बोलू, "तूह माह वे 'उत्तम' किवे बोला? उतम सीधी एक आसा होर सह परमेश्वर आसा। पर अगर तूह अनन्त जिदंगी पाउणा चाहदा साहा तेवा परमेश्वरा री आज्ञा रा पालन कर। "

तेऊ पुछु, महा कासु-कासु आज्ञा मनणे री जरूरत साहा? यीशु उतर दीना, " हत्या ना करना। व्यभिचार ना कर। चोरी ना कर। झूठ नांई बोल। आपणे बापू होर आमा रा आदर करना, होर आपणे गराई सगे आपु जेहा प्रेम करे। "

पर तेऊ जुआन मणशे बोलू, " हाऊ याहा सभी आज्ञा होछे होरी मनदअ आओदअ आसा। अनमहा सदा री जिंदगी पाऊणे बे महा कह करने री जरूरत साहा?" यीशु प्यारे सगे तेऊ फेरा बे हेरू।

यीशुये तेऊबे बोलू, “अगर तूह सिद्ध हुणा चाह्न्दा तेबा तुह नांही करे आपणा सभे साहा बेचीं दे, होर सारा धन गरीवा में बाडी दे, ताह स्वर्गा में धन भेटणा। तेबा महा पीछे ईछ।"

यीशु री याहा गला शूणी करे सह जूआन मणश बहु नराज होऊ, किबेकी सह बहू सेठ थी होर सह आपणा सारा धन नाँई दीणा चाह्न्दा। तेबा सह यीशु जेह का मुड़ी करे बापिस नाठअ।

तेवा यीशुये आपणे चेले का बोलू , "परमेश्वरा रे राज्य में सेठा लोका रा इहंणा बहू मुश्कल साह! एक सेठा मणशा रा परमेश्वरा रे राज्य में इहणा बहु मुशिकल आसा जेबा की ऊँटा का सूई रे नाके में का होई करे निखलणा आसन साहा।"

यीशु री गला शूणी करे चेले हैरान होई। होर बोलदे लागे, “ अगर एडा साहा तेबा परमेश्वरा कुण बचाऊण?"

यीशु ये चेले फेरा वे हेरी करे बोलू, "मणशा का यह नाँई होई सकता पर परमेश्वर सबे साहा सका।"

पतरसे यीशु का बोलू, "हामे बारहा चेले आपणा सभे साहा छाडी करे ताह पीछे होईदे साहा। तेवा हामा एतका केह इनाम भेटणा ?"

यीशुये उतर दिना, "हर एक मणश जासुये मेरी बजहा का घर, भाई, भींण ,आमा, बापू ,शोहरू , या जमीन छाडीदी साहा, तेऊ तेता का 100 गुणा ज्यादा भेटणा होर अनन्त जिदंगी भी पाउणा। पर बहु जोह पहिले साहा त्या पीछे हुणे, होर जोह पीछे साहा त्या पहिले हुणे।"