38. यीशु ढाकणअ

यहूदी लोका हर साल फसह री जाच मनाउदा थी। एसा जाचा में त्या याद करा थी कई साला पहिले परमेश्वरे हमारे पुर्बज मिस्री लोका री गुलामी का बचाई थी। लगभग चीइ साला बाद यीशुये लोका बे शिक्षा दीणी शुरू करी थी,यीशु आपणे चेले बे बोलू, महा तमा सगे यरूशलेम शहरा में फसह री जाच मनाऊणा चाह्न्दा,होर यह सहे जागहा जखे हाऊ मारण।

यीशु रे चेलों मेंजे का एक यहूदा इसकरीयोती ना रअ मनश थी। यहूदा चेले रे धना रा हिसाब किताब डान्दा थी, सह ढबे सगा प्रेम करा थी। होर हर बारी झोली का ढबे काडी करे चोरा थी। जेबा यीशु होर तेऊरे चेले यरूशलेम शहरा में पूजे, तेबा तेता बाद यहूदा यहूदी गुरु सेटा नाथअ तेऊ ढबे रे बदले यीशु ढाकणे रे बारे स्कीम बडाई। किबेकी सह जाणा थी की यहूदी गुरु मसीहा स्वीकार नाँई करदे,सह जाणा थी की त्या तेऊ खत्म करना चाहंदा।

महायाजका रे बोलणे पेंदे यहूदी गुरु यीशु वे धोखे सगा ढाकणे री तणी यहूदा बे तीह चांदी रे सीके दिने। एसा गला री भविष्यवाणी भविष्यवक्ता पहिले ही करी दी थी, यहूदा यीशु ढाकणे री तणी मनु होर त्या तीह चांदी रे सीके नी करे तखा बे ठुरु। होर मोके लोडअ लागअ कि यीशु केहडे साबे ढाकणअ साहा |

यीशु यरुशलेमा शहरा में आपणे चेले सगे फसहे री जाचा मनाऊदअ लागदअ थी। फसह री जाचा में रोटी खांदे रे वक्ते यीशु रोटी मागी होर आशीष मागी करे चोडी, होर त्या बे दीनी होर बोलू, “एता निआ होर खाआ। यह मेरा मॉस आसा, जोह हाऊ तमा बे दिंदा मेरी यादी में एडा ही करा। ” एउ साबे, यीशु त्याका बोलू की मेरा मॉस तमा बे बलिदान हुणा।

तेउकी यीशुये एकी दाखरसा रअ एक कप आणु होर बोलू, “ एता झुटा यह नये बायदे रा मेरा सह लोहू आसा, जोह बहु सारे पापा री माफी बे बहणा। मेरी यादी में तमे एडा ही करा।’’ एउ साबे यीशु त्याबे बोलू की मेरा लोहू थारे थारे पापा री माफी री तणी बहणा।"

तेवा यीशुये आपणे चेले का बोलू, “तमा मेजा का एकी हाऊ डाकणे बजयालण।" चेले हैरान होई , होर पूछदे लागे कि हामा में सह कुण एडा करी सका। यीशुये बोलू, “ जासु बे हाऊ रोटी रअ टुकड देलअ सहे महा ढाकण आलअ हुणअ।’’ तेउकी तेऊ रोटी रअ टूकडअ यहूदा इस्क्रियोती बे दीनअ।

तेसा रोटी खाणे का बाद, यहूदा में शैतान फसू। यहूदा तखा का निखली करे यीशु वे ढाकणे री तणी यहूदी गुरु री सहायता करी सके। यह राचका वक्त थी।

रोटी खाणे बाद, यीशु होर तेऊ रे चेले जैतूना रे पहाडा वे नाठे। तेबा यीशुये त्याकअ बोलू , "तमा सभी महा छाडी करे ठुरने।” किबेकी पवित्र शाश्त्रा में लिखू दा आसा; की महा भेडा रअ फुआल मारनअ,होर सारी भेडा ठुरनी।'"

पतरसे बोलू, "बेशक सभे ताह छाडी करे ठुरले,पर महा ताह छाडी करे नाँई ठुरना !"तेवा यीशुये पतरसा का बोलू, "शैतान तमा सभी री परीक्षा लऊणा चाहदा साहा, पर हे पतरस ,माई तेरी तणी प्रार्थना करीदी साहा कि तूह विश्वास कमजोर नाँई होए। तेउकी भी, आज की राची, मुर्गे बाषणे का पहिले ताह चीण बारी महा जाणने का नाँई करना, की हाऊ ताह नाँई जाणदअ।"

पतरसे तेवा यीशु का होर भी जोरे सगे बोलू, "अगर महा ताए सगा मरना भी पड़े तेबा भी महा ताह पछेणने का कधी भी मना नाँई करना!"एडा होरी चेले भी बोलू।

तेवा यीशु आपणे चेले संघे गतसमनी ना री जगहा वे नाठअ। यीशुये आपणे चेले का प्रार्थना करने बे बोलू कि शैतान त्या री परीक्षा नाँई करे। तेउकी यीशु प्रार्थना करद नाठअ।

यीशुये चिण बारी प्रार्थना करी, "हे मेरे पिता परमेश्वर, आगर तेरी इच्छा आसा तेबा महा एउ दुखा रे वक्ते महा वचा। पर अगर लोका रे पाप क्षमा करणे री तणी होर कोहे जरीहा नाई साहा ,तेवा मेरी नाँई पर तेरी इच्छा पूरी हो।" यीशु बहु परेशान थी, होर तेऊ रा पसीना खुना री बूंदा साही जमीना पेंदे पड़दा लागा। यीशु बे सामर्थ दीणे री तणी परमेश्वरे एक स्वर्गदूत भेजू।

हर बारी प्रार्थना का बाद, यीशु आपणे चेले सेटा वे नाठअ , पर त्या सुतेदे थी। जेवा यीशु चीउणी बारी वापस आउअ तेवा यीशुये बोलू, " उठा ! माह ढाकणे आल़े अखी साहा।"

तेबा यहूदा यहूदी गुरु, होर बहु सारे सैनिक छुरे आणी करे आये। यहूदा यीशु सेटा बे आऊओ होर बोलू “प्रमाण गुरु जी,“होर तेऊरे गले ढाखी करे तेऊ सगे पेमा करद लागअ। यहूदा त्याबे पहिले ही खोजू दा थी की जासु हाऊ प्रणाम करलअ होर गले ढाखलअ सहे यीशु हुणअ, तेबा यीशु बोलू, “हे यहूदा, केह तूह महा ढाकणा चाहन्दा ?"

जेवा सैनिक यीशु ढाकदे लागे थी, तेवा पतरसे आपणी तुलार काडी होर महायाजका रे एकी सेवका रअ कनेट काटू। तेबा यीशुये बोलू, “आपणी तुलारी का मयाना में डाह! केह तूह नाँई जाणदअ की अगर हाऊ आपणे परमेश्वर पिता का बिनती करे, तेबा तेऊ महा बचाऊणे बे स्वर्ग्दुता री सेना भेजणी। पर माह आपणे पिता री आज्ञा मननी जरूरी साहा।’’ यीशुये तेऊ रअ कनेट छूई करे पहिले जेहअ ठीक करू। तेवा सारे चेले यीशु छाडी करे ठुरी।