39. महासभा में यीशु रा मुकदमा

जेबा सैनिके यीशु ढाकु तेबा आधी राची रा वक्त थी। त्याये सैनिके यीशु महायाजका रे घरा वे नीऊ, किवेकि त्या यीशु का सवाल करणा चाहदा थी। पतरस दूरा का तेऊ रा पीछे करदअ लागअ थी। जेवा सैनिके यीशु घरा महीतरा बे निऊ, तेवा पतरस बागे रुकू होर आगी छिपदअ लागअ।

घरा मीतरे, यहूदी गुरु यीशु पेंदे मुकद्दमा चलाउ। त्या कई झूठे गुआई आणी जोह यीशु रे बिरोधा में झूठी गुआई दिंदे लागे दे थी। त्या री गुआही एकी दूजे सगे मिलदी नाँई लागी थी, तेबा यहूदी गुरु यीशु दोषी नाँई सावित करी सके। यीशुये कीछे नाई बोलू।

तेबा महायाजके यीशु फेरा वे हेरी करे बोलू , "हामा वे खोज कैह तुहे ही जिउदे परमेश्वरा रअ शोहरू मसीह साहा ?"

यीशुये बोलू, "हाऊ साहा, होर तमे माह परमेश्वरा संघे बैठदअ होर स्वर्ग का इह्दे भी हेरण। " महायाजके रोषा में आपणे झिकडे थोची पाई किवेकि सह यीशु री एसा गला का बहु रोष आऊआ होर होरी लोके गुरु का बोलदे लागे एबा हामा गुआही री जरूरत नाँई आंधी। हामे एबा आपे शुणू की एउ आपणे आपा बे परमेश्वरा रअ शोहरू बोलू। एवा थारा कह फैसला?"

सभी यहूदी गुरु महायाजका वे उतर दिना , "यह मारणे लायक साह!" तेवा त्याये यीशु री आछी में पाटी बानी, तेऊ पेंदे थुकू, सह चीकू, होर तेऊ रा मजाक करू।

पतरस बागे खोले बेठदअ थी, होर एकसा बेटड़ी सह हेरू होर बोलू, “तूह भी यीशु सगे थी!” पतरसे नाँई करू। तेता बाद एकसा होरी बेटड़ी भी पतरस हेरी करे यहे बोलू, की तूह यीशु सगे थी, होर पतरसे भी नाँई करू तेता वाद एखे लोके पतरसा का बोलू, “हामा बे खोज की तूह यीशु सगे थी किबेकी तमे दूहे गलीला जिले का आसा।"

तेवा पतरसे बोलू , "अगर हाऊ एउ मनशा जाणदा साहा तेवा परमेश्वर माह वे श्राप दे!" तेवरी ही पतरस रे एसा गला बोलणे बाद एकदम मुर्ग बाठअ। यीशुये पीछे हेरी करे पतरस फेरा बे हेरू।

पतरस तखा का नाठअ होर बागे नाही करे जोरे जोरे लेरदअ लागअ। तेऊ वक्ते , यीशु डाकण भझयालण आल़े यहूदा हेरू कि यहूदी गुरु यीशु दोषी बनाई करे मारना चहान्दा। यहूदा बहु दुःखी होउ होर नाशी करे आपणे आपु बे फांसी लाई।

एवरे एउ देशा रअ राज्यपाल पिलातुस थी। तेबा यहूदी गुरु यीशु पिलातुसा सेटा बे नीऊ। त्या चाह्न्दा की पिलातुस यीशु बे मऊता री सजा देई करे खत्म करे, तेबा पिलातुसे यीशु का पुछु, “केह तूह यहूदी रअ राजा आसा?"

यीशुये उतर दिना, "ताई ठीक बोलू पर मेरा राज्य अखे पृथ्वी रा नाई साहा। अगर मेरा राज्य अखला हुंदा तेवा मेरे सेबका मेरी तणी लड़दे। हाऊ धरती में परमेश्वरा री सचाई खोजदअ आऊदअ आसा। हर एक मनश जोह सचाई का प्रेम करदा सह मेरी शुणदा साहा। " पिलातुसे बोलू , " तेवा सच कैह साहा?"

यीशु संघे गल्ला करणे का बाद, पिलातुसे बागे भीड़ा सेटा नाडी करे बोलू, "महा एउ मणशा में मऊता री सजा दीणे लाईक किछे दोष नाँई भेटा।" पर यहूदी गुरु होर बहु लोके जोरे संघे बोलू, " एउ क्रूसा पेंदे चढ़ा!" पिलातुसे उतर दीना, " एउ मणशे किछे गलत काम नाँई करू सह किछे भी गलत काम नाँई करू।" पर त्या होर भी जोरे जोरे बोलदे लागे। तेवा पिलातुसे चिऊणी वारी बोलू , "यह मणश दोषी नाई साहा !"

पिलातुस डरू कि त्या खासे लोका झगड़ा चोड फोड़ नाँई करे, तेबा सह यीशु बे क्रुसा पेंदे चढ़ाऊणे बे मनु। रोमी सैनिके यीशु वे कोड़े बाही, होर तेऊ वे बेगनी झिकड़े बानी, होर तेऊ रे मुढे कांढे का बणूदअ मुकुट डाहू। तेवा त्या एडा बोली करे तेऊ रा मजाक करदे लागे, " हेरा यहूदी रअ राजा !"