40. यीशु रा क्रुसा में चढाऊणा

यीशु रे ठठा करने बाद, सपाही सह क्रुसा में चढाऊणे बे नीऊ। तयाहे सह क्रुस यीशु जेह चुआकणे भझयालू जासु में सह चढ़ाऊण थी।

तयाहे सपाही यीशु तेसा जागहा बे आणु जासु जागहा “खोपड़ी” रे ना का जाणा थी, होर तखे त्याहे तेउरे हाथे होर जाघा किले सगे क्रुसा में टोकी दीनी। पर यीशु बोलू, " हे पिता परमेश्वर याहा माफ माफ कर, किबेकी याहा नांई जाणदे की याहे कह लाऊदा करना। " पिलातुसे सपाही बे यीशु रे मुडा पेंदे क्रुसा पेंदे एक फटी लाऊणे री आज्ञा दीनी। तेता में लिखू दा थी, "यीशु यहूदी रअ राजा आसा। "

तेबा सपाही यीशु रे झीकडे बाडणे री तणी चिठ्ठी पाई। की कासु कह भेटणा जेबा तयाहे एडा करू तेबा तयाहे तेऊ पेंदे भविष्यवाणी पूरी करी जोह बोला थी, "तयाहे मेरे झिकडे आपु में बानडी, होर मेरे झिकड़े री चिठ्ठी पाई। "

तखे दुई डाकू भी थी, जोह सपाही कृसा पेंदे चढाई दे थी। एक यीशु री दाई तरफ होर दूजअ बाई तरफ। तया दुई में का एकी यीशु री निन्दा करी करे बोलू, अगर तूह मसीह आसा तेबा हामा होर आपणे आपु बे बचा पर दूजे बोलू, "कह तूह परमेश्वरा का नांई डरदअ? हामे दुहे तअ आपणे बुरे काम री सजा पाऊदे लगे दे आसा पर एउ किछे बुरा काम नाँई करू। " तेऊ यीशु का बोलू, कि आपणे राज्य में महा याद करे। " यीशु उतर दीना, "आज ही तूह माए सगा स्वर्ग लोका में हुणअ। "

एता बाद यहूदी गुरु होर भीडा रे लोके यीशु रा मजाक उड़ाऊ । त्यहाहे तेऊबे बोलू, "अगर तूह परमेश्वरा रअ शोहरू साहा, तेबा आपणे आपा बे बचा होर क्रुसा का उन्दे नीखलअ, तेबा हामा ताह पेंदे बिश्वास करना। "

जेबा दोपहरा रे बारा बाजे का चिण बाजे तणी पुरे देशे नयारा होऊ। पर यह धयाडी रा वक्त थी। लगभग दोपहरा रे चीण बाजे तणी सारा देश नयारा रहू।

तेबा यीशु बोलू, " पूरा होऊ! हे पिता परमेश्वर, हाऊ आपणी आत्मा तेरे हाथे दिन्दा |" तेबा यीशु आपण मुड़ उटअ पाऊ होर होर आपणे प्राण शोटी। जेबा सह मुअ तेबा जाजरी होई। होर देहुरे रअ बडअ पड़दअ जोह सभी पवित्र जागहा नाहणे का रोका थी उपरा का जील तणी थोछी करे दुई टूकडे होई।

आपणी मऊती सगे, यीशु लोका बे परमेश्वरा सेटा बे नाहणे रा रास्ता साफ करू। तेबा सूबेदार होर सपाही तेऊ सगे यीशु री निगरानी करदे लागे दे थी, यह सभे भाली करे तेऊ बोलू, की यह मणश धर्मी थी। सची में यह परमेश्वरा रअ शोहरू थी।"

तेबा यसुफ होर निकुदेमुस ना रे दुई यहूदी गुरु थी जासु बुशाह थी की यीशु ही मसीह आसा। त्याहे पिलातुसा सेटा नाही करे का यीशु री लास मागी। त्याहे यीशु री लास चमकदार झिकड़े में लपेटी। होर जोह कब्र शाफड कोती करे बड़ाई दी थी तेता में डाही, होर तेतके दुआरा जेह एक बडअ पाथर डाहू।