41. यीशु मरी करे जिउदे हुणा

जेबा सपाही यीशु क्रुसा पेंदे चढाई मकअ थी तेबा तेता बाद, यहूदी गुरु पिलातुसा का बोलू, "तेऊ झूठे, यीशुये बोलू थी,कि महा चीऊणी दिहाड़ी बाद मरी करे जिउदअ हुणअ। एता हेरने बे हामा कब्रा री निगरानी करनी आई, कई एडा नांई होए की, तेउरे चेले तेऊरी लासा चोरे, होर तेता बाद बोले, की मरी करे जिउंदअ होऊ। "

पिलातुसे बोलू, "एखा सपाही निआ, होर आपणी समझा रे साबे कब्रा री निगरानी करा। " तेबा त्याये तेसा कब्रा के मितरे नाहणे आल़े दुआरा सेटा एक बडअ पात्थरा पेंदे शाणे लाई होर निगरानी करने बे सपाही रा पहरा डाहू, की कोहे भी तेऊरी लास चोरी नाँई सके।

यीशु रे मरणे का बादा री दिहाड़ सब्ता री दिहाड़ थी। यहूदी गुरु कब्रा में नाहणे री इजाजत कासी बे नाँई दीनी। पर सब्ता री धयाडी का पहिली धयाडी दोती नयारे एख बेटड़ी यीशु री कब्रा नाहणे बे तयार होई। त्या यीशु रे लासा में बडिया खुशबु आल़े मसाले लाऊणा चाहन्दा थी।

त्या वेटड़ी रे कब्रा में पूजणे का पहिले, तखे बड़ी जाजरी होई। स्वर्गा का इछी करे एकी स्वर्ग दुते कब्रा रअ सह पाथर किनारे करू जोह कब्रा रे दुआरा सेटा डाहुदअ थी तेता पेंदे बेठअ यह स्वर्ग दूत लाईटा जेहअ चमकद लाग थी। जोह सपाही कब्रा री निगरानी करदे लागे थी तयाहे सह स्वर्ग दूत हेरू। त्या एथरे ज्यादा डरी की मुएदे जेहे जमीना पेंदे पड़ी।

जेबा त्या बेटड़ी कब्रा में पूजी तेबा तेऊ स्वर्ग दुते त्या बेटड़ी बे बोलू, "नाँई डरा। यीशु अखे नाँई आंनद। सह मुएदे में का जिउंद होऊ, जेड़ा की तेऊ पहिले बोलू थी की हाऊ जिउंदअ हुणअ! कब्रा में लोडा होर हेरा।" त्याए बेटड़ी कब्रा में नाही करे यीशु री लासा लोडी लागी होर त्याहे हेरू तखे यीशु री लास अखे नाँई आंधी!

तेवा तेऊ स्वर्गदूते त्या वेटड़ी का बोलू, "नाशी करे तेऊ रे चेले वे खोजा, 'यीशु मरी करे जिउंदअ होऊदअ साहा होर सह तमा का पहिले गलील जिले वे नाहणा।"

त्या बेटड़ी बखे हैरान होई होर बखे खुश होई। त्या चेले वे यह खुशी रा समाचार शूणाऊणे री तणी ठुरी।

जेवा त्या बेटड़ी चेले वे यह शुभ संदेश खोजणे री तणी आपणी वाता हांडदी लागी थी, तेवा यीशु त्या वे प्रकट होऊ। त्या तेऊ री जांघा में पड़ी। तेवा यीशुये बोलू, "नाँई डरे। नाशी करे मेरे चेले वे गलीला वे नाहणे वे बोला। त्या हाऊ तखे हेरण।"