42. यीशु स्वर्गा वे बापस नाह्न्दा साहा

जासु दिहाड़ी परमेश्वरे यीशु को मुयेदे में का जिउदअ करू, तेसी धयाडी दुई चेले नेडा रे ग्रा वे नाह्न्दे लागेदे थी। हांडदे हांडदे त्या येशु संघे जोह होऊ थी। तेतके बारे में गल्ला करदे लागेदे थी, त्या बोलदे लागे थी की सह मसीह थी, पर तेवा भी सह मारी पाऊ। एवा त्या वेटडी आई होर त्याहे बोलू की यीशु भीआ का जिउंदअ होऊदअ साहा। त्या नाँई जाणदे थी कि कासु गल्ला पेंदे विशवास करणा।

यीशुये त्या सेटा इच्छी करे त्या संघे हांडणा शुरू करू, पर त्या तेऊ पछेणी नाई सकी। तेउये पूछी कि त्या कीचके बारे में गल्ला करदे लागेदे। त्याये तेऊ पिछले दिहाड़े में यीशु संघे होई सारी घटना रे बारे में खोजू। त्याये सोचु कि त्या कासु परदेशी संघे गल्ला करदे लागेदे, जोह नाई जाणदअ थी कि यरूशलेमा में केह होऊ थी।

तेवा यीशुये त्या समझाई कि परमेश्वरा रअ वचन मसीहा रे बारे में कैह बोलदा साहा। बहु पहिले , भविष्यद्वक्ताये बोलू थी कि बुरे लोका मसीहा बे बहु ज्यादा दुःख दीणा होर सह मारी पाउण। पर भविष्यद्वक्ताये यह भी बोलू थी की सह चिऊणे दिहाड़े मरी करे जिउणं हुणअ।

जेवा त्या तेऊ नगरे पूजे जखे त्या दुई मन्श रुकणा चाह्न्दा थी, तेवरी तणी लगभग ब्यालक होई थी।त्याये यीशु त्याये संघे रहणे वे बोलू, तेबा यीशु त्याये संघे एकी घरा बे नाठअ। होर त्या रोटी खांदे बेठे। यीशुये एक रोटी ढाकी तेतकी तणी परमेश्वरा रा धन्यवाद दिना ,होर तेउकी त्याहे रोटी चोडी। तेबा तेबरी त्याहे, जाणू कि सह यीशु आसा। पर तेबरी सह त्या री आछी का गोजु।

त्याये दुई चेले एकी दूजे का बोलू, "सह यीशु थी! जेबरे तेऊ हामा वे परमेश्वरा रे वचन समझाई थी तेवा हामे बहु खुश थी?" तेबरी, त्या निखली करे यरूशलेम शहरा बे बापस नाठे। जेवा त्या पूजे तेवा त्याये चेले वे खोजू, "यीशु सची जिउदअ होऊ! हामे सह हेरू!"

जेवा चेले गल्ला करदे लागे दे थी, तेबा यीशु एकदम तेऊ कमरे त्या रे सामने प्रकट होऊ। तेऊये बोलू, "तमा वे शांति भेटे!" चेले सोचु कि यह कुण राक्स आसा, पर यीशु ये बोलू, "तमे किबे डरदा? तमे किबे नाँई सोचदे कि सची हाउ आसा, यीशु साहा ? मेरे हाथा होर जांघा छुही करे हेरा। किबेकी आत्मा रे मॉस होर हाडके नाई हुंदे जेडा तमे माह सेटा हेरा।" तेबा यीशु त्याका पूछूकी अखे खाणे बे कुछ आसा? त्याए भुजी दी माछी रअ एक टुकडअ दीनअ, होर यीशु सह टूकडअ रे सामने खाऊ।

यीशुये बोलू, "मेरे बारे में पवित्र शास्त्रा में लिखू दा आसा जोह कुछ लिखू दा आसा सह पूरा हूँणा। माई तमा वे बोलू थी कि एता सभी रा हुणा जरूरी साहा।"तेवा यीशु त्या बे परमेश्वरा रअ वचन राम्बडे ढगे समझाऊ। तेउये बोलू, "पवित्र शाशत्रा में लिखू दा आसा, कि मसीहा दुःख सहणा, सह मारन, होर चीऊणे धयाडे मरी दे में का जिउंद हुणअ।"

पवित्रशाशत्रा में यह भी लिखू दा कि मेरे चेले परमेश्वरा रे वचना रा प्रचार करना। होर त्या हर एकी मणशा बे खोजणा। की आपणे पापा का पचताबा करा। त्या एतकी शुरुआत येरूशलेम शहरा का करनी। तेबा त्या सभी जागहा होर सभी जाति में नाहणा, जोह कुछ माए बोलू होर करू तमे याहा सभी गला रे गुआही आसा।

अगले चाली दिहाड़ी तणी, यीशु आपणे चेले रे सामने कई बारी प्रकट होऊ। एकसा बारी सह एकी वक्ता में 500 लोका रे सामने प्रकट होउ! यीशु आपणे चेले बे कई तरीके संघे सावित करू कि हाऊ जिउदअ साहा, होर तेउये त्या वे परमेश्वरा रे राज्य रे बारे में शिक्षा दीनी।

यीशुये आपणे चेले का बोलू, "परमेश्वरे माह वे स्वर्ग होर पृथ्वी रे सारे अधिकार दिने दे आसा। तेवा हाऊ तमा का बोलदा साहा :नाशी करे सभी जाती रे लोका चेले बाणा। होर त्या बे पिता, पुत्र होर पवित्र आत्मा रे ना का बपतिस्मा देआ। जोह कुछ भी माई तमा वे आज्ञा दीनीदी साहा त्या सभी आज्ञा तमे लोका बे मानणा सिखाआ। याद डाहे, हाऊ सदा तमा संघे रहण।"

यीशु रे मरी करी जिउणे का चाली दिहाड़ी बाद ,तेऊ आपणे चेले का बोलू , "शूणा महा तमा बे पवित्र आत्मा भेजणी जासका दीणे रा बाईदा मेरे बापू परमेश्वरे करू दा आसा पर तेबा तमा येरूशलेम शहरा में नीहालणा आऊआ जेबरे तणी पिता परमेश्वर तमा बे सामर्थ ना दे। " प्रभु यीशु त्या सगे गला करने बाद स्वर्गा बे चुआकु होर एकी बादले सह त्या री नजरा का घगजयाऊ। यीशु स्वर्गा में सभी चीजा पेंदे राजा करने री तणी परमेश्वरा री दाई तरफा बेठ।