46. पौलुसा रा मसीहा पेंदे विशवास करना।

शाऊल ना रअ एक मनश थी जासुये यीशु पेंदे विशवास नाँई करदअ थी। जेबरे सह जुआन थी, तेवरे तेयूये स्तिफनुसा वे मारणे आल़े लोका रे झिकड़े री निगरानी करी थी। बाद में,तेउये विश्वासी लोका तग करी थी। तेउये यरूशलेमा में घरे –घरे नाशी कर्रे मर्द होर वेटडी दुही ढाकी करे जेला में पाई थी। तेवा महायाजके शाऊल वे दमिश्क नगरा में नाहणे री आज्ञा दीनी। महायाजके तेऊबे बोलू दमिश्क शहरा में नाह होर तखे मसीहा लोका ढाकी करे बापिस यरूशलेम शहरा बे आण।

तेउकी शाऊले दमिश्क नाहणे री यात्रा शुरू करी। तेऊ शहरा का पूजणे का थोड़े ही पहिले, तेऊ रे चहु तर्फे होर सरगा का एक शेता परयाशा चमकु, होर सह धरती पेंदे पडू। शाऊले कुण बोलदअ शुणू, "हे शाऊल! हे शाऊल! तूह माह किवे सताउदअ लागदअ साहा?" शाऊले पुछु , "हे प्रभु, तूह कुण साहा?" यीशुये उतर दीना, "हाउ यीशु साहा। तूह माह सताऊदअ लागदअ साहा !"

जेवा शाऊल उठू तेवा सह हेरी नाँई सकदअ थी। तेऊ रे साथी सह दमिश्क वे आणू थी। शाऊले चीइ दिहाड़ी तणी किछे भी नाँई खाऊ थी।

दमिश्क में हनन्याह ना रअ एक यीशु रअ चेलअ थी। परमेश्वरे तेऊ वे बोलू, "तेऊ घरा वे नाह जखे शाऊल रुकूदअ साहा। आपणे हाथा तेऊ पेंदे डाह कि सह भीआ का हेरदअ लागे।" पर हनन्याह बोलू, "हे प्रभु, माई शुणू दा साहा कि एउ मनशे विश्वासी कैडे तग करी दे साहा।" परमेश्वरे तेऊ वे जवाब दिना, "नाश! माई सह यहूदियों में होर दूजी जाति रे लोका में मेरे ना री घोषणा करने री तणी चुनुदअ साहा। तेऊ मेरे ना री तणी बहु कष्ट सेहणे।"

तेवा हनन्याह शाऊला सेटा वे नाठअ, होर आपणे हाथ तेऊ पेंदे डाही, होर बोलू, "यीशुये, जोह अखे इहंणे का तेरी वाता ताह पेंदे प्रकट होऊ थी, हाउ ताह सेटा वे भेजूदअ साहा कि तुह भीआ का हेरे, होर पवित्र आत्मा ताह भरे।" एक दम शाऊला री आछी बापिस आई होर सह भीआ का हेरदअ लागअ, होर हनन्याह तेऊ वे बपतिस्मा दिना। तेवा शाऊले खाणा खाऊ होर भीआ का शक्तिशाली होऊ।

तेवरी का, शाऊले दमिश्का में रहणे आल़े यहूदियों में यीशु रा प्रचार करणा शुरू करू। तेयूये बोलू, "यीशु ही परमेश्वरा रअ शोहरू साहा!" यहूदी लोका हैरान थी, किबेकी शाऊले विश्वासी लोका बे मारणे री कोशिश करी थी, पर एवा तेउये यीशु में विश्वास करू थी। शाऊले यहूदी संघे वाद-विवाद करू। तेऊये रिहाऊ कि यीशु ही मसीह थी।

बहु दिहाड़े बाद, यहूदी लोके शाऊला मारणे री स्कीम बणाई। त्याये तेऊ मारणे री तणी नगरा रे बड़े दूआरा सेटा लोका भेजी। कि तेऊ री निगरानी करें पर शाऊले तेसा स्कीमा रे बारे में शुणू, होर तेऊरे सगी बची करे निखलणे में तेऊ री सहयता करी। एकसा राची त्याये सह टोकरी बशयाली करे नगरा री भीती का उन्धे उतरी | दमिश्का का बची करे निखलणे का बाद शाऊले यीशु रे बारे में प्रचार करणा जारी डाहू।

शाऊल प्रेरिता वे मिलणे री तणी यरूशलेमा वे नाठअ, पर त्या तेऊ का डरा थी। तेवा बरनबास ना रअ एक विश्वासी शाऊल प्रेरिता सेटा वे नीऊ। तेउये त्या वे खोजू कि शाऊले कैडे साबे हिमत करी करे दमिश्क शहरा में प्रचार करू थी। तेता बाद, चेले शाऊल स्वीकार करू।

एखा विश्वासी जोह यरूशलेमा रे तग करने बाद ठुरी थी, त्या दूर अंताकिया नगरा बे नाठे थी होर यीशु रे बारे में प्रचार करदा थी। अंताकिया नगरा में रहणे आल़े लोका बहु यहूदी नाई थी, पर पहिली बारी, त्या में बहु सारे लोका विश्वासी बणी थी। बरनबास होर शाऊल याह नउये विश्वासी लोका बे यीशु रे बारे में होर बहु सिखाउणे री तणी तखे नाठे, होर कलीसिया पाकी करी। यीशु पेंदे विशवास करणे आल़े पहिली बारी अंताकिया नगरा में ही "मसीही" होई।

एकसा दिहाड़ी , अंताकिया नगरा रे मसीही लोका ब्रतु रही करे प्रार्थना करदे लागेदे थी। पवित्र आत्मा त्या का बोलू, "मेरी तणी बरनबास होर शाऊला वे तेऊ कामा करणे री तणी अलग करा, जासु कामा करणे री तणी माई या शादी दे आसा।"तेवा अंताकिया री कलीसिया बरनबास होर शाऊला री तणी प्रार्थना करी होर त्या पेंदे आपणे हाथ डाही। तेवा तेऊ यीशु रे बारे में शुभ समाचार प्रचार करने री तणी दूजी जागहा भेजी। बरनबास होर शाऊले अलग-अलग जाति रे लोका वे शिक्षा दीनी, होर बहु सारे लोके यीशु में विशवास करू।