11. फसह

पोनोमोसोर मूसा ओडो हारुन ते फिरौना: बो:ते उ गामकोन डान्गो नो इसराइलीकिते चोना तेरे। होकियार फिरौन ते चेतायाकियार नो यदि आम इसराइलीकिते चोना उमतेरेम ला: पोनोमोसोर मिस्रया लेबुकिते पोस ओडो पोहिलौठाकिते ओबगोजगोडे। फिरौन सोउब ओन्डोरकोन जो पोनोमोसोरया कायोमते मानेना थोम इन्कार काराय गोठो।

पोनोमोसोर होकिते विश्वास कारायना वाला बेहार ते जो पहिलौठा बेटा ते बनचायनाथोम उपाय कारायो। होकड़ सोउब परिवार ते मोन्ज लोरेन भेड़ी कुड़ुते डोडकोन बलि कारायना आवखो।

पोनोमोसोर इसराइलीकिते हो भेड़ी कुड़ुया इन्यामते डोडकोन आडिकिया हो:या दुराते लगायनाथोम गामो। होकिते होकड़ा माँस ते गाज कोन रो अखमीरीया कोलोन्ग सोरि जल्दीसे यों:ना आवखो। होजे हो भोजनते यों:ना लो:ढो जल्दी से मिसरतय मु:हनाथोम तेयार आवनाथोम गामो:।

जे लेखे नो पोनोमोसोर इसराइलीकिते आदेश तेरसि:खो होकि होघायगा कारायो:कि। आधा इडिबया नेडाते पोनोमोसोर सोकड़ा पोहिलौठाते ओबगोजगा मिसरया मो:जिते होइ कोन चोलकि।

इसराइलीकिया सोकड़ा दुराते ईन्जाम आवना चालते पोनोमोसोर हो हो:किते नेलाय गोठो। होकिया भि:तरा सोउब लेबुकि सुरक्षित आवखोकि। हो भेड़ी कुड़ुया इयामया चालते बानचे गोडकि मोय।

ला: नो मिस्रीकि पोनोमोसोरयाते विश्वास उमाय कारायसि:खो ओडो होकड़ा हुकुमतेजो उमाय मानेयो। होवाथोम पोनोमोसोर होकिया हो:ते उमेलायो। पोनोमोसोर मिस्रीकिया जेठ बेटा किते ओबगोछो।

जेलया कैदीकि रो पोहोलौठा तय डोडकोन फिरौनया जेठ बेटा सोउब गोजगोडकि मोय। आडिया जुघाय बिपाइतया चालते मिसरया लेबुकि इयामना ला:खो ओडो बिलाप जो कारायोकि।

हो इडिब फिरौन मूसा रो हारुनते रेमा: कोन गामो:, “इसराइलीकिते डोडकोन मिसरतय जल्दी मु:ह गोडनाते!” मिसरया लेबुकि जो इसराइली किते जल्दी चोना:थोम गामोकि।