18. ताजडोम राइज

दाऊद कोलेन उबर एकड़ी मेमोन जोउ राइज कारायो। ल: होइड़ गोज गोडकि रो होकड़ा बेडडोम राइज कारायना सुरु कारायो। पोनोमोसोर सुलेमान बुङ्ग कायोम ना सुरु काराय कोन जुनगो सोब काड़ाताय जुघाय आम ई लामतेम नो पोनोमोसोर आ:मा: थोम काराय। सुलेमान पोनोमोसोर ते बोरो: नो होकड़ ते जुघायगा आकिल तेर गुडु:। पोनोमोसोर राजी होइकोन सुलेमान ते धरती या माहा आकिल वाला लेबु बायगोठो। सुलेमान जुघायगा कायोम किते सिखेकोन बेस राइज चालायनावाला बोनेकि। पोनोमोसोर होकड़ते किसड़ो जो बायो:।

यरुशलेम ते सुलेमान हो मन्दिर ते बायो: आजे: नो आडिया आबा दाऊद बायना थोम जुघायगा जिनिस कि तायार काराय सि:खो, अब लेबुकि मिलापवाला तम्बु ते मेलाय कोन मन्दिर ते आराधना कारायना ला:खो मोय रो बलिदान जो ओडेब ओकि पोनोमोसोर होकिया मोहझिते डेलकोन होकिया सोरि आवना ला:खो।

लेकिन सुलेमान होडोम राइज या कोनसिल डुकिबुङ्ग पेरेम कारायो। होकड़ 1000 कोनसिलडुकि ते बिहा कोन पोनोमोसोर या हुकुम ते उम मानेयो। उ मेसे जुघाय कोनसिलडुकि होडोम राइजताय डेना भेरे आडिकिया देवता किते जो लोगके डेलकिमोय रो होकियागा उपासना कारायगा चालकिमोय जे भेरा सुलेमान बुढ़ा होईगोडकिला: आडिजो होकिया आराधना कारायो।

होवाथोमगा पोनोमौसोर सुलेमान ते खिसाय सिखो। आडि गामोनो इसराइल ते उबार राइज काराय कोन साजाइ तेरे। आडि सुलेमान या गोजना लो:ढो उघाय काराये।

सुलेमान या गोजना लो:ढो रहबाम कोलेन बोनेकि। इसराइल राइज या सोउबा आडिकिया कोलेन लेखे माने कोन मोञ बोहते जुमेकिमोय। होकि रहबाम ते बातायोकि नो सुलेमान एलातय उड़ुवा कामुते कोरवाएते रो जुघाय मालगुजारी डोडते। होकि रहबाम ते आरजी कारा यो: कि नो एला: तय थोरे कामु काराय।

लेकिन रहबाम होकिते बोकाकिया लेखे जावाब देरो आमपे गामते पे नो आमा: आबा एलेते उड़ुवा कामु कारायना गामते मुदा इनज आम पेते होकड़ातय जो जुघाय उड़ुवा कामु करवायइन्ज रो जुघायगा दु:खो तेरिञ।

ला: लेबुकि होकड़ ते उघाय गमना ओनडोरकि रो जुघाय कि आडि बुङ्ग बालवा कारायो कि धोल गोत्र होकड़ ते मेलय गोठोकि रो उबार गोत्र गा आडिया सोरि आवकि मोय।

बनचे घोल गोत्र या कि यारोबाम ञिमिया मुडुलेबु ते कोलेन बायोकि उ गोत्र कि उत्तर रो पूर्वी रोछोब आवकि मोय उकि आडकि ते इसराइल गामडोम किमोय।

लेकिन यारोबाम पोनोमोसोर या विरुध बलवा काराय कोन लेबुकिते पाप कारवायो: आडि लिबुकियासोरि उपासना करायना थोम उबार मुर्तिकि ओहबायो होकि अब यहूदा राइज यरुशलेम ते जे पोनोमोसोर या मन्दिर आराधना कारायना उमाय चोलकि।

यहूदा ओडो इसराइल राइज बोइरि बोने गोडकिकियर रो लड़ाई कारायना ला:खो मोय।

इसराइल या सोउब राइज कोलेन दुष्ट आवखोकि उमेसे जुघाय कोलेन बोने ना लामके इसराइली कि बुङ्ग तारडोमकि मोय।

इसराइली सोब कोलेन रो जुघाय लेबुकि मुर्तिया उपासना कारायोकि। होकि उघाय कारायना करण वेश्या बुङ्ग गिताकिमोय रो जुघाय कुड़ूकिते जो बलि कारायोकि।

यहूदा राइज या कोलेन दाऊद या वंश आवखोमोय उ कोलेन मेसे थोरेक बेस आवखोकि होकि बेसबो राइज चालायोकि रो पोनोमोसोर सोर या उपासना कारायोकि। लेकिन यहूदा या कोलेन दुष्ट आवखोकि होकि बेस राइज उमाय चालायो रो मुर्तिकि या उपासना कारायोकि रो कुड़ुकिते जो ठाकायनावाला देवता किया थोम बलि कारायोकि। यहूदा या जुघाय लेबुकि पोनोमोसोर या विरुध बालवा काराय कोन मुर्तिपूजा कारायोकि।