19. भविष्यद्वक्ता

पोनोमोसोर सोउब बेरा भविष्यद्वक्ता किते डाङ्ग ना ला:खो। भविष्यद्वक्ता पोनोमोसोर या सन्देश किते ओनडोर कोन लेबुकिते बाताय ना ला:खो मोय।

जे भेरेअहाब इसराइल राइज य कोलेन आवखो हो नेडा ते एलिय्याह भविष्यद्वक्ता आवखो। अहाब मोञ बेस लेबु उम आओखो:। होकड़ ठाकायनावाला देवता किया उपासना कारायना थोम जोर तरो। होवथोम एलिय्याह अहाब ते गामो नो पोनोमोसोर होकि ते सजाइ तेरना‍ चोलताज। इनज “जबतक उमिञ गामेला इसराइल ते डा:आ: रो ओस उम गुरना।” उ कायोम बुङ्ग अहाब जुघायगा खिसाय कोन एलिय्याह ते तार ना थोम सोचायो।

होवा थोम पोनोमोसोर एलिय्याह ते गामो नो किनिर ते यार कोन अहाबताय लुकेगोडना। एलिय्याह हो किनिर या थालको बो:ते चोलकि आतेनो चोना थोम पोनोमोसोर गामो। एलिय्याह या थोम मेयाय ओडो इडिब कोनथेडकि कोलोङ्ग रो माँस ओलना ला:खो:कि। हो नेडा ते अहाब ओडो आडिया सेनाकि एलिय्याह ते लामो:कि लेकिन उमाय कुयो:।

डा:आ उम होइना चालते फलको किया डा:आ कोसोर गोडकि होवा थोम एलिय्याह पासेगा मोञ राइज ते चोलगोडकि हो राइज ते मोञ राँड़ी कोनसिलडु:रो मोञ बेटा डोम आवखो होकियार या योञना बोन्गोडसिखो उवाथोम नो डा:आ उम डेना ला:खो। ला:आजो एलिय्याह या योंयो कोन्गो: होवा थोम पोनोमोसोर होकियारा जरुरत ते पुरा कारायो। होकियारा गोहोम नो गुँड़ि रो चुकाया: जोल उमबोनकि रो आकाल नेडा तेजो होकिया रा बोहते भोजन आवखो। एलिय्याह थोरेक मेमोन जोउ होते आवखो।

साढ़े ऊफे मेमोन ते पोनोमोसोर एलिय्याह ते गामो नो ओडोगा डा:आ डेना। होकड़ एलिय्याह ते पोनोमोसोर इसराइल ते चोल कोन अहाब बन्ग कायोंमा ना गामो: होवाथोम एलिय्याह अहाबया बो:ते चोलकि। अहाब होकड़ ते यो कोन गामो “आमगा मुसिबत ओलनावाला हेकेम!” एलिय्याह गामो “मुसिबत ओलनावाला को आम हेकेम आम पोनोमोसोर ते मेलाय गोडसिडेम होकड़ागा सोहतो पोनोमोसोर हेके रो आम बाल या उपासना कारायतेम अब आमते इसराइल राइज या सोउब लेबु किते कार्मेल बिरु ते ओल के डेना आइज।”

रो सोउब लेबुकि कार्मेल बिरु ते चोलकि मोय। हो लेबुकि जो डेलकि मोय नो एले बाल देवता या सन्देश तेरतेले उकि बाल या भविष्यद्वक्ता आवखोकि होकि 450 आवखोकि। एलिय्याह लेबुकि ते गामो आता जोओ आम पे अमपा: मोन ते उमपे आबयेगेपे! यहोवा पोनोमोसोर हेकेला: होकड़ा आराधना काराय ते ओडो यदि बाल हेके ला: होकड़ा आराधना कारायपे।!”

ला: एलिय्याह बाल या भविष्यद्वक्ता किते गामो मोञ ओरेज ते बलि कराय कोन होकड़ा माँस ते वेदिते उनेपे रो तिमसोंग आपे लागय। होकड़ा लो:डो इजो होघाय गा काराञ ओडो होडोम बेदी बय कोन इज हो मास ते उनिज रो पोनोमोसोर बेदी ते तिमसोग ओबगुर ये ला: अमपे कोनगोड़े पे नो होकड़ गा सओतो पोनोमोसोर हके ला बाल या भविष्यद्वक्ता‍ कि बलि ते तईयर कराययोकि लेकिन तीमसोंग उमय लगयो।

ताय बाल या भविष्यद्वक्ता कि बाल ते सेनेलयोकि , “हे बाल, एला ओनडोरे सोउब नेडा होकि सेनेल योकि रो गुल काराय कोन आपने तेगा छुरिबुनग डेजडोम किमाय। मुदा बाल इजुम गमो रो तिमसोंग जो उम ओबगुरोअ।

बाल या भविष्यद्वक्ता कि सोउब नेडा बाल बुग सेनेलेयो कि रो सेनेल ना मेलाय गोठोकि ला: एलिय्याह होडोम ओरेजया माँसते बेदीते ओडेफो रो लेबुकिते गामो नो माहा थारिया ते हो बलिदान काराय कोन होते तबतक डुलना गामो जबतक नो माँस ओडो सोंगोल उतक नो बेदी या आसे पासे या उसलो सोउब राछोब सुडअ गोकि।

तब एलिय्याह सेनेलो, “हे यहोव, अब्राहम, इसहाक, ओडो याकूब या पोनोमोसोर, एले ते ओबयोये नो आम इसराइल या पोनोमोसोर हेकेम ओडो उनो इञ आमा धांगर हेकेञ। इञ ते बाताय जेकि उलेबूकि कोंग गोड़ेमाय नो आम गा सोअतो पोनोमोसोर हेकेम।”

तुरथे गा तुभलुङताय तिमसोंग गुरकि ओडो होकड़ माँस, सोंगोल, सोरेंग लो:खा ओडो उ ताक नो बेदी या आसे पासे या डा:आ कितिअ जो जलाय गोठो। जब लेबुकि योयोआ कि नो होकि उसलोअ ते गुरसिमाय ओडो गामो कि यहोवा गा पोनोमोसोर हेके! यहोवा गा पोनोमोसोर हेके!”

एलिय्याह गामो बाल या एकोठो भविष्यद्वक्ता बनचेकोन आबु चोल गुडुकी रो लेबुकि सोउब धोहकोन होडोमतिज डोढोकि रो तार गोठोकि।

ला:आ अहाब कोलेन ते गामो झटसे आमा: हो: यार गोड़े डा:आ डेनावाला आइज जलदिगा तिरिब होईकि रो डा:आ डेना सुरुगोडकि पोनोमोसोर हो कोसोरते ओबोगना ला:खो उघायबुनग कोनडोमकि नो पोनोमोसोर गा सोहतो हेके।

जे बेरा एलिय्याह आडिया कामुते कारायना ओबबोगयो ला: पोनोमोसोर एलिशा ञिमि या मोञ भविष्यद्वक्ता ते आडिया होइना थौम चुनायो। पोनोमोसोर एलिशा या माध्यम बुंग जुघायगा चमत्कार कामु कारायो। मोञ चमत्कार नामान या सोरी होइकि। होकड़ मोञ बोइरि या सेनाकिया सरदार आवखो , होकाड़ाते कोढ़या मोञ माहा कोसु होइ गोडसीखो। नामान एलिशाया बारे ओनडोर सिइखो होवाथोम होकड़ा बोहते डेलकि रो कोढ़तय बेस काराय ना थोम गामो। एलिशा नामनते गामोनो चोलकोन यरदन ओमपायते थामबेर डुबकि लागाय।

नामान खिसाय गोडकि रो उघाय कारायनाथोम माना काराय गोठो होकड़ते उ कामु बेस उमला:ना लाखो लोहढो आडि मोनते बदलायकोन यरदन ओमपाय या डा:आ ते थाम बेर डुबकि लागयो।

पोनोमोसोर इसराइल या लेबुकिया बोहते होडोम कायोम या थोम भविष्यद्वक्ता किते डान्गो हो सोउबगा मुर्तिकिया उपासना उम कारायना थोम गामो। उकड़ा ओवजिते बेस न्याय ओडो दया भाव ओबयो ना चाहि। हो भविष्यद्वक्ता कि लेबुकिते चेतायोकिनी अनेश कामु मेलायकोन पोनोमोसोर या कायोमते मानेना चाहि होकि उघाय उमाय कारायला पोनोमोसोर होकिते दोसी टहरयेरो होकिते दण्डतेरे।

जुघाय नेडा होलेबुके पोनोमोसोर या हुकुम ते उमाय मानेयो रो भविष्यद्वक्ता किया सोरि बेस व्यहार उमाय कारायो रो होकि तार गोठोकि। मुसनिग यिर्मयाह ते कोसोर चुनगड़ाते उनगोठोकि ताकि होकड़ गोञ गोडना। होकाड़ चुनगडाया तुताते कादो हिनते डुबेना ला:कि। लेकिन कोलेन ते होकड़ा तोबलुगते दया डेलकि रो आडिया सैनिक किते गोञना सेंग ओजना गामो।

भविष्यद्वक्ता कि पोनोमोसोर या तिहताय गामना उमाय मेलायो जबकि लेबुकि होकिते बेस उमाय कुइना ला:खो। होकि लेबुकिते चेताययोकि नो होकि पश्चाताप उमाय कारायला पोनोमोसोर होकि ते नास काराय गोड़े। होकि लेबुकिते उ जो याइद कारवायोकि नो पोनोमोसोर होकिया बोहते मसीह ते डानगना कारार कारायसि।