22. जोहान या जनम

बिते नेडा ते, पोनोमोसोर आडिया भविष्यद्वक्ता किबुनग कायोम कि होवाथोम आडिया लेबुकिबुनग कायोम ना पाले। लेकिन हो नेडा जोउ 400 मेमोन जोउ आडि बेर बुनग जो उम कायोमकि। हो नेडा ते पोनोमोसोर जकरियास ञिमिया मोञ कालो बोहते स्वर्गदूत ते डानगो। जकरियास आडिया सोउड़ायडोम इलीशिबा पोनोमोसोर या आदर कारायना ला:खो कियार। होकियार बूढ़ा होइ गोडखो कियार रो होकियार: कुड़ु: उमाय होइसिखो:।

हो स्वर्गदूत जकरियास ते गामो, “आमा: सोउड़ायनोम तय मोञ बेटा होइना आम होकड़ा ञिमि जोहान उनेम। पोनोमोसोर लोरेन जातोम बुनग भरेकिरो जोहान लेबुकिते मसीह ते ग्रहन कारायना थोम तेयार काराये। जकारियास गामो: इनज रो इनजा बुडिया नाईज कुडुअ जनमयना थोंङ बुडिया गोडसीअ। इञिज इघय कोगिंज नो आम इञते सोअतोगा गमतेजडेम।

हो कोनघेर जकरियास ते गमो ईज अमआ बोते उ सुभसंदेश ते ओलना थोंङ पोनोमोसोर या तिअतय डांडोमसिअडिंज।ला अम ईज ते उमकडिजसिडेम होआ थोंङ कुडु तेराना जोउ उम कयोमना पालेम। रो कोनघेर जकरियास या बो तय चोलगोडकी। होकडा लो:ढो जकरियास हो:अ एंगडेलकि रो गर्ववती होईकि।

जे भेरा एलीशिबा टिबुरु महिना या गर्भते आवखो भेरे हो कोनघेर आचकागा एलीशिबा या गोतिया डोम कियाते ओबयो डोमकि होकड़ा ञिमि मरियम आवखी। मरियम डिंड़ आवखी री बिहा होइना थोम युसूफ ञिमि लेबु या सोरि मंगनी होइ गोडसिखो। आम गर्भवती होइनामरो मोनज कुड़ुतेरे आमते होकड़ा ञिमि यीशु उनना आइज, आडि सर्वशक्तिमान पोनोमोसोर या बेटा होइ कोन सोउब भेरेगा सासन काराय।”

मरियम गामो “उघाय होइना इनजको डिंड़ा आइज डिनग?” हो कोनघेर समझायो लोरेन जातोम डेना रो पोनोमोसोर या सामर्थ आमाह लोबगोये। होवाथोम हो कुड़ु लोरेन होइना रो पोनोमोसोर या बेटा डोम होइना।” जे कोनघेर गामसिखो होजे कड़िंछो।

उकाड़ होइना लोहढो मरियम चोलकोन एलीशिबा बुनग भेहटो कारायो: रो जे भेरा मरियम होकाड़ ते नमस्कार कारायो कुड़ु हकड़ा लाजते उछले कि। होकिया थोम पोनोमोसोर जे काराय सि:खो कोनसिलडुकि मोनग सोरि लेरेह कि मोय। एलीशिबा या सोरि उफे महिना आओकी रो हो: एनग गोडकि।

उकड़ा लोहढो एलीशिबा कुड़ुते जनमाययो। जकारियास ओडो एलीशिबा ञिमि जोहान उनोकियार जेसान नो हो कोनघेर आदेश तेरसिखो: रो जकारियास ते पोनोमोसोर कायोम ना थोम पाड़ोम तेरो। जकारियास गामो “पोनोमोसोर या स्तुति होइ गुडु, उवा थोम आडि आडिया लेबुकेति मदाइत कारायना थोम याइद कारायसि:! हे इनजा बेटान्ज आम सर्वशक्तिमान पोनोमोसोर या भविष्यद्वक्ता होइनाम। आम लेबुकेति बातयेम नो होकि इघाय आडिकिया पापतय क्षमा कुइना पालेमोय।