26. यीशु आडिया सेवा सुरु कारायते

डुबोह या पोरिछा ते इनकार कारायना लो:ढो यीशु गलील ते एन्ग कोन डेलकि अते नो आडि आवना ला:खो लोनेन जातोम जुघाय गा पड़ोम तेरना ला:खो यीशु मोञ ठाँढ़ोतय होडोम ठाँड़ोते‍ चोलकि रो लेबुकेति शिक्षा तेरोह। सोउब गा होकड़ा बारे बेस कायोम गामोकि।

यीशु नासरत नगर ते‍ चोलकि हो खोड़ि ते आडि कोनोन भेरे आवखो सब्त या नेडा ते आडि आराधना होइना ठाँड़ो ते चोलकि। आगुवाकि आडिते यशायाह भविष्यद्वक्ता या सन्देश य मोन्ज पोथी ते रो कि। होकि लामना ला:खो कि नो होजेह होकड़ पाढ़ेना। ला: हो पोथी ते खोलाय कोन होकड़ मोञ भाग ते लेबुकिया थोन्ग पढ़ेकि।

यीशु पढ़ेकि “पोनोमोसोर इन्जते आडिया कोलेन ते तेरसि होवाथोन्ग गरिब किते सुसमाचार प्रचार कारायना पालिन्ज। होकड़ इन्ज ते उवाथोन्ग डान्गसि ताकि इन्ज जेलते आवना वाला कि ते छोड़ायना, आन्धरा किते मो:ड तेरना पालिन्ज ओडो होकिते छोड़ायना पालिन्ज बेहार कि ते नो होडोम लेबुकि थोमतेजमोय उ हो नेडा हेके पोनोमोसोर आडियाते दयालु होइना रो आनिया मदाइत काराये।

ओडो यीशु डोको गोडकि। सोउबगा होकड़ ते धेयान बो योना ला:खोकि होकि कोनगना ला:खोकि नो धरमिक पोथी या जे भाग ते पढ़ेसि होकड़ मसीह या बारे आवखो। यीशु गामो जे कायोमते इन्ज तमा आमपेयाथोन्ग पढ़ेसिडिन्ज होकड़ तामागा पुरा होइताज। सोउब गा‍ चकित होइ कोन गामोकि ई उकाड़ यूसुफ या बेटा डोन्ग ना लागिन।”

ला: यीशु गामो, “उकड़ सोहते हेके लेबुकि उघाय भविष्यद्वक्ता ते ग्रहन उमाय काराय ते बेहार नो आडिकियागा पोहदाते महासि। एलिय्याह भविष्यद्वक्ता या नेडा ते इसराइल ते जुघाय राँड़ीं कि आवखोकि। ला: जे भेरे साढ़े तीन मेमोन डा:आ उन्म डेलकि ला: पोनोमोसोर एलिय्याह ते इसराइल किया मुडु राँड़ीं किया बोहते मदाइत या थोन्ग उम डान्गी रो। एलिय्याह ते होडोम राइज या राँड़ींयाते डान्गो।

यीशु गामना उममेलाययो ओडो एलिशा भविष्यद्वक्ता या नेडाते जुघाय लेबुकि कोढ़ या कोसुबुन्ग आओखोकि मुदा हो मेसे बेहार ते जो बेस उम कारायो होकाड़ केवल इसराइल या बोइरि किया सेनापति नामानते बेस कारायो। ला: बेहार कि यीशुया ओन्डोरना ला:खोकि होकि यहूदी आवखौकि।

नासरत या लेबुकि यीशु ते धोहडोठीकि रो होकाड़ ते आराधना ठाँड़ोतय घिसड़ायगा बाहरे डोडगोठो कि। होकि होकाड़ ते तारगोडना थोन्ग मोञ चाटडी या उनगुल ते डोड गोठीकि मुदा यीशु भिड़तय मुह गोडकि रो नासरत नगर ते मेलाय कोन चोलगोडकि।

ओडो यीशु गलील या सोउब रोछोब चोलकि रो महाडु: भिड़ होकड़ा बोहते डेलकि। होकि उघाय जुघायगा लेबुकिते ओलकोन डेलकि मोय होकि कोसुते रो लांगड़ा आवसिखो कि हो मेसे आधाकि योना, चोना, ओनडोरना रो कायोम उमाय पालना ला:खो रो यीशु होकिते बेस कारायो।

उ सोउबते मेलाय कोन ओडो जो यीशु या बोहते ओलडोन्ग किमोय होकि याते दुष्ट जातोम आओखो। यीशु दुष्ट जातोमकिते होकिया तय मुँहगोडना थोन्ग गामी। हो दुष्ट जातोम कि गुल कारयोकि “आम पोनोमोसोर या बेटा डोन्ग हेकेम भिड़ या लेबुकि चकित आवगोडकिमोय रो होकि पोनोमोसोर या स्तुति कारायोकि।

ओडो यीशु 12 प्रेरित किते चुनाय कोन होकिते प्रेरित गामी हो प्रेरितकि आडिया सोरि चोलकि मोय रो आडियातय सिखेना पालहोककि।