32. यीशु या आनेस जातोम आवाना लेब रो मुडु कोसु: दुखो कोनसिलडु:ते बेस कारायना

यीशु ओडो आडिया चेलाकिया डोंगागा बुन्ग यो रोछोब चोलकिमोय आतिन गिरासेनीकि आवना ला:खोकि। होकि हो रोछोक डामकीन डोन्गातय आरेहकिमोय।

होते मोञ लेबु आनेस जातोम बुन्ग भोरे आओखो:।

हो लेबु जुघायग पाडोमदार आवखो होवाचा:डो बेहार जो होकड़ते धोह टिकायना उमाय पालना ला:खो। धारि धारि लेबुकि होकड़ा तिईते रो काटाते सिकड़ी बुन्ग तोलोह कि, तेउजो होकड़ पिइज गोडना ला:खो।

हो लेबु हो क्षेत्रते कबरते आवनाला:खो। हो लेबु इबिड रो तुनवो गुलकारायना ला:खो। होकड़ लुतुई उम सुउना ला:खो रो आडिते सोरेन बुन्ग घाव काराय गोडना ला:खो।

हो लेबु बातकेकोन यीशुया बोहते डलकि रो आडिया मुगमते ठेहुनाय गोठो यीशु होलेबुआ भि:तारते आवना आनेस जातोम बन्ग कायोम कि रो गामो:, “उ लेबूतय बहरे मुँ:ह कोन आय।”

हो आनेस जातोम जोर जोर से गुल कारायो, “हे यीशु परमपरधान या बेटा डोन्ग आमा: ञियाबुन्ग ईकामु आइज? कृपा करायकोन इनजते अबु सताय!” ला: यीशु हो आनेस जातोम ते जुनगो “आमा: ई यीमि हेके?” होकड़ गामो: इन्जा यीमि सेना हेके रो एले जुघाय आइजले।” (रोमी सेना ते जुघाय हजार सेनाकिया मोन्ज समूह मोन्ज “सेना” होइना ला:खो।)

हो आनेस जातोम कि यीशु ते सेनेल योकि, “कृपा काराय कोन एलेते उबोहकिताय होडोमतिज आबु जनगे!” होबोतेगा बिरु हिनते बुनुईकिया झुंड आर यो:ना ला:खोकि होवाथोन्ग हो आनेस जातोमकि यीशुते सेनेल योकि “कृपा काराय कोन एलेते हो बुनुईकियाते डान्ग गोडे!” यीशु गामो, “बेस आइज होतेगा धाँयपे।”

ला:आ हो आनेस जातोमकि लेबुयातय मुहकोन बुनुईकियाते डियारगोडकि मोय। हो बुनुईकि बातके कोन झील हिमते पुडकन डुबे गोज गोडकि मोय। हो गोहथोन्ग कमसे कम 2,000 बुनुई आवखोकि।

होते हो बुनुई किते योना कोनगनाथोन्ग लेबुकि आवखोकि। जे गा होईकि होजे योकोन सहर तिज यार गोठोकि। यीशु जे काराय सि:खो होजे सोउबते बतायोकि। हो नगरया लेबुकि मु:ह कोन डेलकि मोय रो हो लेबुते योयोकि बेहारयाते नो आनेस जातोम आवखो। होकड़ शान्ती बोह, लुतुई सु कोन आओखो रो मोन्ग साधारण लेबुकिया लेखे व्यहार कारायना ला:खो रो डोकोसि:खो।

हो लेबुकि जुघायगा बोतोन्ग गोडसिखोकि रो यीशु ते यारना: थोन्ग गामोकि। हो यीशु डोन्गा ते डेब गोडकि। हो लेबु बेहारतेनो आनेस जातोम आओखो:। यीशु या सोरि चोना: थोन्ग सेनेलियो।

मुदा यीशु होकड़ते गामो: “उम्बो: इन्ज लामतिन्ज नो आम ओ: चोलकोन सोउबतेगा बातायेमनो आमा: थोन्ग पोनोमोसोर ई काराययो। होकिते बाताय नो पोनोमोसोर आमा: तौबलुन्ग ते दया कारायसि:।”

होवाथोन्ग हो लेबु चोलगोडकि रो सोउबतेगा बातायो नो यीशु आडिया थोन्ग ई कारायो होकड़ा बाताय कहानीते ओन्डोर कोन सोउबगा ताजुब होइगोडकि मोय।

यीशु झील या होडोन्ग रोछोब एन्ग डेलकि। होकड़ा होते डामना: लो:ढो मोन्ज महा भीड़ होकड़ा आसे पासे जुमेकि मोय रो होकड़ते दबाय ना ला:कि मोय। हो भीड़ ते मोन्ज कोनसिलडु जे बारह मेमोनतय इयाम लेनगेना कोसुबुन्ग दू:खोते आवखो। होकड़ सोउब धनते बाइद किते तेरगोडखो: ताकि होकि होकड़ ते बेस काराय मोय मुदा होकड़ा कोसु ओडो: बाढ़गोडकि।

होकड़ा ओन्डोरसिखो: नो यीशु जुघाय कोसु लेबुकिते बेस कारायसि रो आडि सोचायो “इन्ज निश्चित आइजडिन्ग अगरन इन्ग यीशु या लुतुईतेगा जिब गोडिन्ज ला: बेस गोडना आइन्ज!” होवाथोन्ग कुन्डबति:ताय डेल कोन यीशु या लुतुईते जिब गोठो: इघायगा होकड़ जिफो यियाम लेनगेना थामे गोडकि

झटगा यीशु कोन्ग गोठो: नो आडियातय पड़ोम मु:सि। होवाथोन्ग आडि कुनडाबति:ज यो कोन गामो, “इन्जते बेर जिफो:” चेलाकि गामोकि उते हेबने जुघाय लेबुते आमा: सोउब आइज कि रो आमते ढेकला तेजकि ला:आ आम इना जुनगोब नो इन्जते बहार जिफो।”

हो कोनसिलडु यीशुया बोहते थरथरयगा रो जुघाय गा बोतोंग कोन ठुहुनाय गोठो रो होकड़ यीशुते बाताय गोठो नो होकड़ ई कारायसि रो आडि बेस होईगोडकि यीशु होकड़ते गामो: “आमा: आसरा कारायना कारण गा आम बेसकिम। शान्ति बोह धाँय।”