39. यीशु याते मुकदमा होइता

ला:आ तामा आधा अधी इडिबया नेडा आओखो हो पालटनकि यीशुते महाँकालोकिया ओ:ते ओलकोन डेलकि मोय उवाथोम होकड़ यीशु ते जुन्गना लामना ला:खो। पतरस डिसा: होइकोन होकड़ा पिछा कारायना ला:खो। जे भेरे पालटनकि यीशु ते हो: डोड गोठोकि ला: पतरस बाहरे आवकोन आडितेगा तिमसोन्ग बुन्ग गरम कारायना ला:कि।

ओ:या भि:तरते यहूदी आगुवाकि यीशुया मुकादमा चलायोकि। होकि होकड़ा बिरुद्धते जुघाय ठाकायना वाला कायोमते गामना ला:किमोय रो ठाकायना वाला किते लामो:कि। जबकि नो होकिया कायोम सोउब काड़ा सोरि सहमत उम आओखो:। होवाथोन्ग यहूदी आगुवाकि साबित उमाय कारायना पालो:नो होकड़ जहाँ कायोम याथोन्ग दोषी आवखो:। यीशु इजुम गामो:।

आखरीते महाँकालो यीशुया रोछोब योकोन गामो:, “एलेते बाताय नो इ आमगा जीवित पोनोमोसोर या बेटा डोम यीशु हेकेम?”

यीशु गामो:, “इन्ग हेकिन्ज आमपे ओडो इन्जते पोनोमोसोर या सोरि डोको ना रो कि:थुन्गतय डेना योयेपे।” महाकालो आडिया लुतुईते गा: गोठो उवाथोन्ग यीशु जे गामो: हो कायोम या थोम खिसाय गोडकि। होकड़ ओडो आगुवाकिते गुल कारायो, “आनिंगते उ बातायनाथोन्ग ओडो गवाही किया जरुरत ओम्बोड़िज नो उ लेबु ई कारायसि आमपे आमपेगा होकड़ते उ गामना ओन्डोर डोठोपे नो होकड़ पोनोमोसोर या बेटा डोम हेके। होकड़ा बारे आमपा ई निर्णय आइज?”

सोउब यहूदी आगुवाकि महाँ कालोते गामो:कि, “होकड़ तारडोमनाया लेखे आइज।” ला: होकि यीशु मोडते पाटि तोलगोठोकि होकड़ा तोबलुन्गते बि:थुन्गयो: मोय रो गोलकोन लाडा कायोम कि मोय।

ओडो पतरस जे भेरे हो:या बाहरे बो:सुना ला:खो। हो भेरे मोन्ज धांगरिन बेटी होकड़ते योयो। होकड़ होकड़ते गामो: “आम जो यीशु या सोरि आओखो:ब।” पतरस माना काराय गोठो। लो:ढो होडोम बेटी उ कायोमतेगा गामो: रो पतरस ओडो गा माना काराय गोठो। लो:ढो थोरेक लेबुकि गामो:कि “एले कोन्गते नो आम यीशुया सोरि आवखोब उवाथोम नो आम्बर बोरियागा गलीलताय हेके बार।”

ला:आ पतरस गामो:, “यदि इन्ज उ लेबुते कोन्ग तेजडिन्ज ला: पोनोमोसोर इन्जते स्राप तेरे!” तुरथेगा पतरसया उ लेखे शपत यो:ना लो:ढो सिनकोय सुलगोठो। यीशुया आनकेल कोन पतरसते योयो।

पतरस होताय चोल गोडकि रो सुसके सुसके कोन इनयामकि। हो नेडाते यीशु या ओबधो:ना वाला यहूदाते योयोनो यहूदी आगुवाकि यीशु ते मृत्युदण्ड तेरसि:मोय यहूदा जुघायगा दु:खोकि ओडो‍ चोल कोन आडितेगा तार गोठो।

ला:आ हो राइजया राज्यपाल पिलातुस आओखो: होकड़ रोमया थोम कामुकारायना ला:खो। यहूदी आगुवाकि यीशुते होकड़ा बो:ते ओलकोन डेलकि मोय होकि चाहेना ला:खोकिनो पिलातुस होकड़ते मृत्युदण्ड तेरे रो होकड़ते तार गोडे। ला: पिलातुस ते जुन्गो , “इ आम यहूदीकिया कोलेन हेकेम?”

यीशु गामो:, “आम सो:तोगा गामसिडेम। मुदा इन्जा राइज उ धरतीया ना लागे अगर होइना ला: इन्जा धांगर कि इन्जा थोम लड़ेना कि हा:नु। इन्ज धरती ते पोनोमोसोर या बारे सो:तो बातायना डेलसि:डिन्ग। सो उबगा बेहारनो सो:तो पेरेम कारायते होकड़ इन्जा ओन्डोरते।” पिलातुस गामो:, ‘ला: सो:तो ई हेके।”

यीशु या सोरि कायोम लो:ढो पिलातुस बाहरे भीड़या बो:ते चोलकोन गामो: “इन्ज ई जो कराण उमिन्ज कुइतेनो उ लेबु तारडोम ना लेखे आइज।” ला: यहूदी आगुवा कि रो भीड़ गुल काराय कोन गामो:कि होकड़ते क्रुसहिनते गोडेपे।” पिलातुस गामो: होकड़ जहाँ लेखे जो गलति कारायना दोषी ओम्बोडिन्ज ला:जो होकि जोर जोर से गुल कारायोकि। ला: पिलातुस उफे बेइर गामो: होकड़ दोषी उमबोड़ि:ज।”

पिलातुस बोतोंग गोडकि नो भीड़ दन्गा कारायना सुरु गोड़े मोय आडि आडिया पालटन किबुन्ग माने डोठो नो होकड़ क्रुसते ओडेबडोम गुडु:। रोमी पालटन होकड़ते कोरड़ा बुन्ग गिलो:मय, होकड़ते राजसि लुतुई ओबसुयोकि रो होकड़ा बोकोते जुरा:या मुकुट ओबसुयोकि ला: होकि उ गाम कोन लाडा कायोमकि मोय नो, “योयपे यहूदी किया कोलेन!”