6. पोनोमोसोर इसहाकया थोम जोगाड़ कारायते

ला:आ अब्राहम जुघाय बुढ़ा होइगोठकि भेरे इसहाक बिहाय लेखे होइकि रो अब्राहम आडिया धांगरते मोन्ज बिहाना थोम बेटी लामना डोन्गो आते आडकिया गोतिया कि आवलाकि।

अब्राहम या गोतिया आवाना ठाँढ़ो ढेर डिंसा आओखो रो पोनोमोसोर रिबका या बोहते डान्गो। होकड़ अब्राहम या भाईया पोती आवखो।

रिबका परिवारते मेलाय कोन धांगरया सोरि चोनाथाम राजी होइगोडकि रो इसहाक होकड़ते बिहा कारायो।

जुघाय नेडा या लो:ढो अब्राहम गोजगोडकि। पोनोमोसोर अब्राहम या सोरि तोल तोल कारारया मोताबिक इसहाकते आशीष तेरो:। कारारया मोताबिक जुघाय खन्दान होइनाकि मुदा इसहाकया बुढ़िया डोमातय कुड़ु उमाय होइकि।

इसहाक रिबका या थोम सेनेलयो रो रिबका उबर कुड़ु:या जनमायना थोम पाड़ोम कुइयो। हो भेरे हो कुड़ुकियार ला:ज तेगा लाडोइ कारायना ला:कि कियार रिबका सोउब पोनोमोसोर ते बताययो:।

पोनोमोसोर रिबकाते गामो: आम उबार कुड़ुते जनमायेम होकियारा कुल दुइठो होडोम जाइत होइना। बोरियाग लडेना कियार रो महाँ बेटातय होइना वाला जाति कोनोन बेटाया जाइतकिया हुकुम मानेयेकि।”

रिबकाया कुड़ु होइकि मोय ला: महा बेटा रुसुन्ग रो उलुईवाला आवखो: होकि होकड़ा यिमि एसाव उनोकि। कोनोन बेटा एसाव या तलवाते धोकोन जनमेकि होकड़ा यिमि याकूब उनोकि।