8. पोनोमोसोर यूसुफ ओडो आडिया परिवारते बनचायते

जुघाय मेमोन या लो:ढो याकूब बुढ़ा होइगोडसिखो, आडिया बेस बेटडोम यूसुफते भाईडोम किया योना कीन्गनाथोम डान्गो नो इघाय पोस किते गुपा तेन कि।

यूसुफ या भाईकि होकड़ते ईर्ष्या कारायना ला:खोकि उवाथोम नो होकिया आबा होकड़ते बेस ला:ना: ला:खो ओडो मुनु जो योसिखोनो यूसुफ सोउबया आगुवा होइगोडना। ला: यूसुफ जे भेरे डेलकि भाई डोमकि होकड़ते धो:कोन धांगर होइना ओबसोन्ग गोठोकि।

हो: एन्गना: सेन्ग यूसुफया भाईडोमकि लुतुईडोमते गा:कोन मेरोमया इन्जाम ते मेसा गोठोकि रो आबाडोमते ओबययोकि ला: आबाडोम सोचाय नो किनिरया पोसकि यूसुफ ते तार गोठोकि। याकूब जुघाय गा उदास आवखो।

धांगरकिया कारोबार कारायनावाला हो लेबुकि यूसुफते मिस्रज डोडगोठोकि। नील ओमाएया सितिलते मिस्रते महा ओडो पाड़ोमदार राइज आवखो:। कारबार कारायनावाला की यूसुफते सरकारी अधिकारी कियाते धांगर ओबसोन्ग गोठोकि। यूसुफ गोमके डोमा सुन्दर बो सेवा कारायो रो पोनोमोसोर यूसुफते आशीष तेरो।

होकड़ा गोमके डोम बुढ़ियाडोम यूसुफ या सोरि गितानाया कोसिस कारायो, मुदा यूसुफ उ लेखे पाप कारायना उमलामो:। होकड़ खिंसाय कोन यूसुफयाते तुबलुन्गते झूठा आरोप लागायो होवाथोम जेलते डालवाय गोठो। होते होकड़ पोनोमोसोरया सोरि बेस आओखो: रो पोनोमोसोर होकड़ते तेरो।

उबार मेमोन जोउ यूसुफ जेलतेगा आवकि जबकि बेकासुर आवखो: मोन्ज इडिब फिरौन इघाय नो मिस्रीकि आडिया कोलेन ते रेमातेकि। दुइठो मुनु योयो होकड़ते उघायगा चकित कारायो गोठो। होकड़ा बेहार जोन होकड़ते मुनुया अर्थ बायाना उमाय पालो।

पोनोमोसोर यूसुफ ते मुनुया अर्थ बाताय क्षमता तेरसिखो: होवाथोम फिरौन यूसुफ ते जेलतय आडिया बो:ते रेमाखो:। यूसुफ हो मुनुया अर्थ बाताय कोन गामोनो “पोनोमोसोर भरपरिया फसल थाम मेमोन बेस फसल तेरे रो थाम मेमोन आकाल डान्गनावाला आइज।”

फिरौन यूसुफतय जुघायगा प्रभावित होइ कोन होकड़ते मिस्रया होडोम महालेबु बाय गोठो।

यूसुफ लेबकिते बेस फसलया थाम मेमोन ठुरायनाथोम गामो:। ला: सात मेमोन आकाल भेरे यूसुफ भोजनते ओबसोन्ग कोन आडिया थोम जुघायगा ठुरायो।

हो आकाल केवल मिस्रते उम आवकि मुदा कनान ते जो जुघाय आवकि आते नो याकूब रो आडिया परिवार आवना ला:खो।

होवाथोम यूसुफ आडिया महा बेडडोम मिस्रते डान्गो। जे भेरे होकि भोजन सोन्गना थोम यूसुफया बो:ते तोमोन कि मोय ला: हो भाई डोमकि यूसुफते उमाय गोन्गना पालो। मुदा यूसुफ भाईडोम किते कोन्ग गोठो।

उ मालुम कारायना थोम नो उकि बादलेसि मोय नो उम्बो कोन्गना लो:ढो बाताय गोठो नो “इन्ज आमपा भाई यूसुफ हेकिन्ग आ:पे बोतोंगना। ला: आमपे इन्जते धांगर होइना थोम अनेस सोंचाय कोन ओबसोन्गगोठोपे मुदा पोनोमोसोर अनेसते बेस बुन्ग बादलेयो आयपे रो मिस्र ते आवाना पे आवनाथोम भोजनया प्रबन्ध कारायना पालिन्ग।”

जे भेरे यूसुफया भाई हो: एन्ग डेल कोन आडिया आबा याकूबते बातायोकि नो यूसुफ बोरोल आइज होकड़ मुरुक लेरे:कि।

तेउ याकूब मोन्ज बुढ़ा लेबु आवखो ला:जो पुरा परिवार मिस्रते चोलकि मोय रो होकि होते आवगोडकि मोय। याकूब या गोजना सेन्ग होकड़ सोउब आडिया बेटाडोम किते आशीष तेरो।

कारारया प्रतिज्ञा जे पोनोमोसोर अब्राहम बुन्ग काराय सिखो इसहाकतय ओडो याकूबया 12 बेटा रो कुड़ुकियाते परिवार ते डेलगोडकि हो बारह खन्दान इसराइली कुल बोनेकि।