12. निर्गमन

इस्राएली मीहरे मिस्रो दोरच़ी हुंच़ा महस खुश तोईरे। दोरे एंतेग परगर माह तोईरे, दंङ दोरे वायदा ओ देशा रिंङ यवातेर! छिल्ला धिर इस्राएली ज़ि पेट्रीर, मिस्री ज़ि दोतिंङ दू भत्ते धिर रांईर, देर तचेक कि ज़ंङ ए मूल दंङ ऊई ला महस कीमती चीज़ार। ऊई देशो रेह मीहच़ी परमेश्वरो टोईच़ी विशवास लहरिर दंङ अपेहल इस्राएली मीहरे मिस्रो दोरच़ी हुंच़िरी ता दोरे दोतंङ साते अच़ा इलिर।

परमेश्वर निरो टेमा रिंङ बद्ड़ो इच्चा खम्भा बणेकी, दंङ राता रिंङ दि मेहु खम्भा बणेकी इस्राएली मीहतु तुईज़ि-तुईज़ि ज़ोज़ी लेहति। परमेश्वर हमेशा दोतंङ साते तोहई दंङ यात्रा लहज़ा मुक्का दोतु अगुवाई लहज़ाते दोतिंङ सिर्फ परमेश्वरो थलेच़ी जोज़ी तोहई।

थोड़े ध्याड़ो थल, फिरौन ए दोऊ मीहतु सेहम किरच़ा इलि। दोरे इस्राएली तिंङ यहच़ा एनोह परगर बणाएट्री जुंज़ातेर। झांह लेह दोच़ी इस्राएली तु पिछ्छा लहरिर। दि परमेश्वरे ए तोहई अंऊ दोई दोतु सेहम किरच़ी चरच़ाते। परमेश्वरे दि दिऊ थल्जी लहरी छना कुचे दोई दि जुंज़ाते कि भत्ते मीहच़ी दि ञेंई च़रपोर कि यहोवा परमेश्वर, फिरौन ए मिस्त्री मीहतु भत्ते सद् बे मोह्ड़े शाक्तिशाली शुह।

अपेहल इस्राएली ज़ि मिस्रो सेना अपि तंङरिर दंङ दोति पता लेहती कि दू फिरौनो सेना शुह दंङ षेह्ई समुद्रो बिचंङ फसेकी इलिर। इस्राएली मीहरे महस बेवा इलिर दंङ क्रपि लेहतिर, “ञेंहच़ी मिस्र छारिंङ छोड़ेकातंई?” एंतेग हेनर सिए योंई।”

मूसा ज़ि इस्राएली तु हखा कुई, “बेईनि था! परमेश्वर तोग केहतु थल्जी लड़ेक्पोतो ए केतिंङ बचाएपोतो।” दोहपल परमेश्वरे मूसा ओ हखा कुई, “दि मीहतु हखा षेह्ई समुद्रो तुखा शुहबिमी थल्जी कुह।”

दोहपल परमेश्वरे दू बद्डो खम्भा बि इस्राएली ए मिस्री तु बिचंङ केहच़ी च़रति दंङ रातो मुक्का दू मेहू खम्भा बणेंकी इलि। मिस्री मीहरे इस्राएली मीहतु कछंङ अपि मरतिर।

परमेश्वरे मूसा ओ हखा समुद्रो टोईच़ी गुह्ड़ तुखा लहज़िमी थल्जी कुई। दोहथर ए परमेश्वरे लन ज़ि समुद्रो ति ऐखा-नोखा लेह च़रति, दंङ समुद्रो बिचंङ इच्चा अम बणाके च़रति।

इस्राएली मीहरे एनोह झुल्ला हासी ओ तिऊ भित्ती ए समुद्रो दोरच़ी शुचि अच़ा इलिर।

दोहपल परमेश्वरे दू अमो दोरच़ी दू बद्ड ऐखा लेह च़रति दंङ मिस्री मीहरे इस्राएली तिंङ बचेकी इबि खंड्री लेहतिर। मिस्री मीहच़ी इस्राएली मीहतिंङ चुमज़िमी फेंसला लहरिर।

दंङ दोच़ि समुद्रो बिचंङ ज़ि दू अम रिंङ इस्राएली तु पीछा लहरिर, पर परमेश्वरे मिस्री तिंङ बेह्द चाई च़रति दोरे हाऊषेक्च़ी लेहतिर, “पोक्तेंई! इस्राएली तु तरफे परमेश्वरे लड़ाई लड़ेक्पि लेहकी तोह!”

भत्ते इस्राएली मीहरे समुद्रो नरेच़ि पिचि इलिर। दोहपल परमेश्वरे मूसा ओ हखा कुई कि दोई यहच़ा तिऊ टोईच़ी गुह्ड़ तुंखा लोह। दोहपल मूसा ज़ि ध्यांए ए लहरी, दोहपल भत्ते ति मिस्री सेना ओ टोईच़ी अच़ा अति दंङ भत्ते ति मिस्त्री सेना ओ टोईच़ी अच़ा अति दंङ भत्ते मिस्री सेना डुमज़े इलि।

अपेहल इस्राएली मीहच़ी खंईरे कि भत्ते मिस्री मीहरे सिए इलज़ि तोतोर दंङ दोच़ि परमेश्वरो टोइच़ी विशवास लहरिर। दोच़ि विशवास लहरिर कि मूसा परमेश्वरो तरफे भविष्यवक्ता शुह।

इस्राएली मीहरे दिऊ थल्जी महस खुश तोईरे छना कुचे परमेश्वरे दोतिंङ सिमी दोरच़ी ए परगर बणेक्च़िमी दोरच़ी बचाके चरच़ाते। एंतेग दोरे परमेश्वरो आराधना लहज़ी ए दोऊ हुकुमो भाषे लहज़िमी थल्जी आज़ाद तोईरे। इस्राएली ज़ि एनोह आज़ादी ओ तयार मानाएच़िमी थल्जी ए परमेश्वरो षटणो थल्जी महस गीत कुईरे छना कुचे परमेश्वरे दोतिंङ मिस्री तु सेना ओ दोरच़ी बचाके च़रति।

परमेश्वरे इस्राएली तिंङ हर साल इच्चा फसहो तयार मानाएक्च़िमी हुकुम रांई कि हिद लहज़िमी थल्जी कि छना परमेश्वरे इस्राएली मीहतिंङ मिस्त्रो मीहतिंङ गुलाम शुहबिमी दोरच़ी आज़ाद लेह च़रति, झांह लेह दि तयार बि फसहो तयार ला कुट्री। दि तयार बि मानेक्च़िमी थल्जी दोतिंङ इच्चा ठीक ठाक कुरच़ो बलि रंड्रीमी तोहई, दोबि रोह्ट्री तोहई, दंङ दोबि सुह्म मेह रोटी रंङ ज़ेई तोहई।