14. इस्राएली मीहतु निहज़ा साल तचेक बणारिंङ भटकेपि

इस्राएली तिंङ दू कानून कंड्रीमी थल,परमेश्वरे सिनै गोह दोरच़ी दोतु अगुवाई लहरी। परमेश्वर दोतिंङ वायदा ओ देशा रिंङ शिलज़िम तते परमेश्वर बद्ड़ो खम्भा बणेंके दोतु तुईज़ि-तुईज़ि जोज़ीरी, दंङ दोरे दोऊ थलेच़ी-थलेच़ी जोज़ि लेहतिर।

परमेश्वरे अब्राहम, इसहाक ए याकूबा रंङ साते वायदा लहसी ताहरे कि गेह वायदा ओ दू देश केहतु खानदाना बि रमोग, पर एंतेग दोरतिंङ महस जाति ओ मीहरे बंङज़ाते। दोतिंङ कनानी मीह ला कुट्री तोहई। दि कनानी मीहच़ी परमेश्वरो आराधना माह लहज़ातेर दंङ दोऊ हुकुम माह मानेक्च़ातेर। दोरे हप्सी सद्तु अराधना लहज़ातेर दंङ महस मदम कम लहज़ातेर।

परमेश्वरे इस्राएली मीहतंङ साते कुई, “अपेहल केरे दू वायदा ओ देशा रिंङ योंई दंङ दोरकी भत्ते कनानी तंङ छुटकारा खोकषे च़रतेंई। केहच़ी दोतंङ साते समझौता थालंही दंङ दोतंङ साते ब्याह थालंही। केहच़ी दोतु भत्ते मूर्ति तिंङ नष्ट लेह च़रतुंई। अगर केरे गिऊ हुकुम माह मानेक्पोंई, ता केरे गिऊ बजाए दोतु सद्तु पूजा लोहनि।”

अपेहल इस्राएली मीहरे कनान देशा रिंङ पिचि इलिर, मूसा ज़ि इस्राएली तु हर इच्चा गोत्रो बिचंङ ज़ि सनी गङंमी तिंङ अंङे च़रति। दोई दोतिंङ इलज़ि दू देशो पाहठी पता लहज़िमी थल्जी कुई कि दू देश छना तोह। मूसा ज़ि दोतिंङ दू कनानी तु पाहठी ला पता लगाएच़िमी थल्जी ला कुई कि दोरे ताकतवर तोतोर या कमज़ोर तोतोर।

दू सनी गङंमी ज़ि भत्ते कनानो दोरच़ी शुचि भत्ते निहज़ा ध्याड़ा यात्रा लहरिर दंङ दोरे यहच़ा वापिस अच़ा इलिर। दोच़ि मीहतिंङ कंड्रिर, “कनान देशा रिंङ महस फसल अंज़ा तोह दंङ फसल ला महस तोह!” पर साह गंङमी ज़ि कुईर, “कनान नगर महस पक्का तोहई दंङ दोरे मीहरे महसे लम्हें ए तगड़ा तोतोर! अगर ञेंहच़ी दोतु टोईच़ी हमला लोहनि ता, दंङ दोच़ि पक्का हेनर याहरच़े च़रपोर दंङ हेंदिंङ सच़ि च़रपोर।”

ध्वांए कालेब ए यहोशू ए ऊई झुह्ट न्वारे ज़ि कुईर, “दि हेले तोह कि कनानो मीहरे लम्हें ए शाक्तिशाली तोतोर, पर पक्का ए हेनर दोतिंङ याहरच़े च़रपोंई! परमेश्वर हेंदु थल्जी लड़ेक्पोतो!”

पर मीहच़ी कालेब ए यहोशू छल्ले गप्पा माह रेड्रीर। दोरे मूसा ए हारूनो टोईच़ी रोहषेक्च़ी लेहतिर दंङ कुईर, “केहच़ी ञेंतिंङ दि बेह्द अंज़ि ठाहरी रिंङ छिल्ला रेंज़ा हतिन? हेंदिंङ मिस्त्रा रिंङ ए बंङज़ी जूंशी तोह। अगर हेनर दू देशा रिंङ यवातंई ता हेनर लड़ाई रिंङ सिए योंई, दंङ कनानो मीहरे हेंदु मेच़ा तिंङ ए कटु तिंङ परगर बणाके च़रपोर।” दोरे मीहरे दोतिंङ यहच़ा मिस्रो हखा शिलज़िमी थल्जी इच्चा खरकोई अगुवा बि अंङड्री जुंज़ातेर।

अपेहल दोच़ि झांह ठ्रोह कुईर ता परमेश्वर महस रोहषेक्च़ा इलि। दंङ दू मिलापो तम्बू रिंङ अच़ा अति दंङ कुई, “केहच़ी गिऊ खिलाप बलवा लेह चरच़ातंई, झांह लेह केतिंङ भत्ते ति बंणारिंङ भटकेपी लेहपोतो। हर इच्चा अंऊ निहज़ा या दोबे महस सालो तोह दू दोरतिंङ सिए योतो। दंङ अपेहल ला दू देशा रिंङ इबि मरपोतो अंऊ गेह केतिंङ रमोग। सिर्फ कालेब ए यहोशू दोरतिंङ इबि तरपोर।”

अपेहल दू मीहच़ी परमेश्वरा बि झांह कुट्री लेहतिर, दंङ दोरे दुखी शुचि इलिर छना कुचे दोच़ि पाप लहसी ताहरेर। झांह लेह दोच़ि कनानो मीहतु टोईच़ी हमला लहज़िमी फेसला लहरिर। मूसा ज़ि दोतिंङ खबरदार लहरी कि केरे कनान देशा रिंङ था इलांई छना कुचे परमेश्वर दोतंङ साते माह य्वाते, पर दोच़ि मूसा ओ गप्पा माह रेड्रीर।

परमेश्वर दि लड़ाई रिंङ दोतंङ साते मेहलि, झांह लेह कनानी ज़ि दोरे यहरच़े च़रतिर दंङ दोतु बिचंङ ज़ि महस मीहरे सिए इलिर। दोहपल इस्राएली मीहरे कनानो दोरच़ी वापिस अच़ा अतिर। दंङ ऊई झुह्ट निह्ज़ा साल तचेक, दोरे बणारिंङ देखा-नोखा भटकेक्पि लेहतिर।

अपेहल इस्राएली मीहरे बंणारिंङ भटक्केपिमी झुह्ट निह्ज़ा सालो मुक्का, दोहपल परमेश्वरे दोतु ज़रूरत पूरा लहरी। दोई दोतिंङ स्वर्गो दोरच़ी “मन्ना” मिन्दु रोटी रांई। दोई बटेरों झुंडा बि (अंऊ कि ढाड़ा अरे फुको प्यारेतु ठ्रोह शुह्बी) दोतु बिचंङ च़रति ताकि दोतिंङ ज़ेईमी थल्जी षाह शुहबी जूंस। दू भत्ते निहज़ा साल तचेक परमेश्वरे दोतु खमज़ेर ए बूटा तिंङ ट्राव्शी माह रांई।

देर तचेक कि परमेश्वरे दोतिंङ तुंङमी थल्जी चमत्कारी रूपारिंङ ति हुंच़िरी। पर दिऊ थल, इस्राएली मीहच़ी परमेश्वरो खिलाप शिकायत लहरिर दंङ कुड़कुड़ लहरिर। तांला, परमेश्वर एनोह वायदा ओ थल्जी विशवासो जोगे तोहई। परमेश्वरे अब्राहम, इसहाक, ए याकूबो खाननदाना बि छि लहज़िमी थल्जी वायदा लहरी दोई दू पूरा लहरी। दोई अंऊ कसम लहसी ताहरे कि अब्राहम, इसहाक, ए याकूबो खानदानो थल्जी लहरी दोई दू लहरी।

अई इच्चा ध्याड़ा अपेहल दू मीहतु कछंङ ति ला माह तोहई, परमेश्वरे मूसा ओ हखा कुई, “चट्टाना रंङ साते गप्पा लोह, दंङ दोरच़ी ति हुंच़तो” पर मूसा ज़ि चट्टाना रंङ साते गप्पा माह लहरी। दोऊ बजाए दोई, दोरतिंङ लट्टी रैं चट्टानो टोईच़ी झुह्ट फेरा घाह केहच़ी च़रति। झांह ठ्रोह दोई परमेश्वरो निरादर लहरी। भत्ते तु ति तुंङमी थल्जी चट्टानो दोरच़ी ति ता हुंच़ा अति, पर परमेश्वर मूसा रंङ रोह्षेक्च़ा इलि। दोई कुई, “छना कुचे केई झांह लहसी तातन, झांह लेह का वायदा ओ देशा रिंङ इबि माहरपोन।”

अपेहल इस्राएली मीहरे निंहज़ा साल तचेक बंणा रिंङ भटकेगी इलज़ी तोईरे, दोहपल अच़ि परमेश्वरा रंङ साते बलवा लहरिर दोरे भत्तेर सिए इलजी तोईरे। दोहपल परमेश्वर दू मीहतिंङ यहच़ा दू वायदा ओ देशा रिंङ तचेक रेंज़ा शिलि। एंतेग मूसा महस यंङदे शुचि इलजि तोहई, झांह लेह परमेश्वरे मीहतु अगुवाई लहज़िमी थल्जी ए दोतु मदत लहज़िमी थल्जी यहोशू बि अंङे च़रति। परमेश्वरे मूसा ओ हखा दि वायदा लहरी कि इच्चा ध्याड़ा दू, दू मीहतु कछंङ मूसा ओ ठ्रोह इच्चा भविष्यवक्ता च़रपोतो।

दोहपल परमेश्वरे मूसा बि इच्चा गोह पुंज़ा रिंङ इबिमी थल्जी कुई ताकि दू वायदा ओ दू देशा बि खंड्री तरपोतो। मूसा ज़ि दू वायदा ओ देशा बि खांई पर परमेश्वरे दोबि दोरतिंङ इबि माह रांई। दोहपल मूसा सिए इलि, दंङ इस्राएली मीहच़ी निहजो साह ध्याड़ा तचेक शोक लहरिर। दोहपल मूसा ओ ठहरी रिंङ यहोशु दोतु खरकोई अगुवा बणेके इलि। यहोशु इच्चा रूठे अगुवा तोहई यहोशू इच्चा रूठे अगुवा तोहई छना कुचे दोई परमेश्वरो टोईच़ी विशवास लहच़ी दोऊ भत्ते गप्पा मानेकी च़रति।