15. वायदा ओ देश

एंतेग इस्राएली मीहतु कनान देशा रिंङ इबिमी टेम अंजे तोहई दू देशा रिंङ यरीहो मिन्दु इच्चा नगर तोहई। दोऊ रक्षा ओ थल्जी दोऊ पिला हासी पक्का भित्ती रे तोईरे। यहोशू ज़ि दू नगरो झुह्ट भेदीर च़रतिर। दू नगरंङ राहाब मिन्दंङ इच्चा कुकम लहज़ा मेच़िमी बङंज़ाते। दोई दि झुह्ट भेदी तिंङ प्याके च़रति, दंङ दोऊ थल दोई दोतिंङ नगरो बिचंङ ज़ि हुंज़िमी मदत लहरी। दोई दि दिऊ थल्जी लहरी छना कुचे दू परमेश्वरो टोईच़ी विशवास लहज़ाते। अंऊ मुक्का इस्राएली मीहरे यरीहो बि नाश लोहर। दोहपल दोच़ि राहब ए दोऊ भत्ते टबरातु रक्षा लहज़िमी वायदा लेह च़रति।

इस्राएली मीहतिंङ वायदा ओ देशा रिंङ इबिमी थल्जी यरदन बेंडी पार लहज़ी जूंशी तोहई। परमेश्वरे यहोशू हखा कुई, “मोह्ड़े पुरोहिता तिंङ तुहई इबि रांई।” अपेहल मोह्ड़े पुरोहिता ज़ि यरदन बेंड़ी रिंङ पेह्री केट्री रंङ साते ति अपि बंद शुचि इलि, ताकि इस्राएली मीहरे कारच़ी धरति ओ टोईच़ी नुरेच़ि अच़ा इबि तरपोर।

अपेहल दू मीहच़ी यरदन बेंड़ी रहपषा इलिर दंङ परमेश्वरे यहोशु हखा कुई कि यरीहो टोईच़ी हमला लहज़िमी थल्जी तयार बंङज़ेंई, देर तचेक कि दू महस पक्का नगर तोहई। परमेश्वरे इस्राएली मीहतंङ साते कुई कि दू मीहतु मोह्ड़े पुरोहित ए सैनिका तिंङ त्रुई ध्याड़ा तचेक दू नगरो पिला हासी चक्कर रंड्री ज़रूरी तोह। दंङ मोह्ड़े पुरोहित ए सैनिका ज़ि ध्वांए लहरिर।

दोहपल निहज़ी ध्याड़ो थल, इस्राएली ज़ि दू नगरो पिला हासी निहज़ी फेरा चक्कर रांईरे। दोहपल दोच़ि नगरो पिला हासी चक्कर रंड्रीमी थल, मोह्ड़े पुरोहिता ज़ि एनोह सुरनेही कुल्ज़ी च़रतिर दंङ सैनिका ज़ि ज़ोरे परमेश्वरो जयजकार लहरिर।

दोहपल यरीहो पिला हासी ओ भित्ती दह्च़ी इलि! छना परमेश्वरे हुकुम राहंषी तते इस्राएली ज़ि नगरो हर इच्चा चीज़ नाश लेह च़रतिर। दोच़ि सिर्फ राहब ए दोऊ टबरातिंङ छोड़ेके च़रतिर, अंऊ इस्राएली तु हिस्सा बणेंकी इलज़ी तोईरे। अपेहल कनाना रिंङ बंङज़ा ऊई मीहच़ी दि रेड्रीर कि इस्राएली ज़ि यरीहो ओ नाश लेह च़रतिर, दंङ दोरे बेवा इलिर कि इस्राएली मीहरे दोतु टोईच़ी ला हमला लोहर।

परमेश्वरे इस्राएली तिंङ हुकुम रांई कि कनाना रिंङ बंङज़ा अंऊ ला जाति शान्तिसबंध थालंहि। पर गिबोनी मिन्दु इच्चा कनानी जाति ज़ि यहोशू हखा हप्सी कुई कि दोरे कनान ओ दोरच़ी ऊईतार ठाहरि रिंङ बंङज़ातेर। दोच़ि यहोशू ज़ि दोतंङ साते शान्तिसबंध लहज़िमी विनती लहरिर। यहोशू ए ऊई इस्राएली अगुवा ज़ि परमेश्वरो हखा रुहक्तिर ए माह कि दोतिंङ छि लहज़िमी तोह। दिऊ बजाए, दोच़ि गिबोनी तंङ साते शान्ति सबंध लेह च़रतिर।

षुमु ध्याड़ो थल, इस्राएली तिंङ पता लेहती कि गिबोनी मीहरे कनाना रिंङ बंङज़ातोर। दोरे रोहषेक्च़ा इलिर छना कुचे गिबोनी ज़ि दोतिंङ धोखा राहंषी तातेर। पर दोच़ि दोतंङ साते लहसी दू शान्ति सबंध बणाके तहसी ताहरेर छना कुचे दू परमेश्वरो तुईज़ि लहसी ताहरेर। दोहपल थोड़े ध्याड़ो थल, कनाना रिंङ बंङज़ा इच्चा उई जाति, एमोरी तु रज्ज़ा ज़ि रेड्री च़रतिर कि गिबोनी ज़ि इस्राएली तंङ साते शान्ति सबंध लेह चरच़ातोर, झांह लेह दोच़ि एनोह सेनाबि इच्चा लहच़ी इच्च़ा मोह्ड़े सेना बणाके च़रति दंङ गिबोनो टोईच़ी हमला लेह चरच़ातोर। गिबोनी ज़ि दोतु मदत लहज़िमी थल्जी यहोशू कछंङ इच्चा खबर च़रति।

दंङ यहोशू ज़ि इस्राएली तु सेना ठ्रोहका लहरी दंङ गिबोनी तु कछंङ पिपिमी थल्जी पूरा रात जोज़ी लेहतिर। मुंज़े सरके दोच़ि एमोरी तु सेना बि हेरान लेह च़रतिर दंङ दोतु टोईच़ी हमला लेह च़रतिर।

दू ध्याड़ा परमेश्वर इस्राएली तु थल्जी लड़ेती। दोई एमोरी तिंङ बेई लेह च़रति दंङ दोई मोह्ड़े- मोह्ड़े ओलार छंङे महसे एमोरी तिंङ सचे च़रति।

परमेश्वरे ऐके बि ला सर्गा रिंङ इच्चा ठाहरि रिंङ रोकेगी च़रति ताकि इस्राएली तिंङ महस टेम खोकसा योतो कि एमोरी तिंङ पूरे ठ्रोह यहरच़े च़रपोतो। दू ध्याड़ा परमेश्वरे इस्राएली तु थल्जी इच्चा मोह्ड़े जीत खोकच़े च़रति।

अपेहल परमेश्वरे दू सेना याहरच़िमी थल, महस कनानी जाति मीहरे इस्राएलो टोईच़ी हमला लेह लहज़िमी थल्जी ठ्रोका शुचि इलिर। यहोशू ए इस्राएली ज़ि हमला लेह दोतु सर्वनाश लेह च़रति।

दि लड़ाई तु थल, परमेश्वरे इस्राएलो हर इच्चा गोत्रा बि वायदा ओ देशा रिंङ दोतु हिस्सा रांई। दोहपल परमेश्वरे इस्राएला बि दोऊ भत्ते सीमा रिंङ शान्ति प्रदान लहरी।

अपेहल यहोशू यङंदे शुचि इलि दंङ दोई इस्राएलो भत्ते मीहतिंङ इच्चा साते बुलाके च़रति। दोहपल यहोशू ज़ि मीहतिंङ दि हिद रांई कि दोच़ि दू वायदा ओ भाषे लहज़िमी कसम लहरिर अंऊ परमेश्वरे दोतंङ साते सीनै गोह टोईच़ी लाहते। दू मीहच़ी परमेश्वरो थल्जी विशवासो जोगे ए दोऊ ए कानूनो भाषे लहज़िमी वायदा लहसी ताहरे।