16. छुड़ाएच़ा

यहोशू सिए इबिमी थल इस्राएली ज़ि परमेश्वरो भाषे माह लहरिर। दोच़ि परमेश्वरो हुकुमो भाषे माह लहरिर, दंङ दोच़ि दुह वाईदा ओ देशो दोरच़ी बचेकि कनानी तिंङ धकतेखा माह हुंतिर। इस्राएली ज़ि एनोह सच्चा परमेश्वर यहोवा बि छोड़ेकी कनानी तु सदतु आराधना लहज़ि शुरू लहरिर। इस्राएली तु कछंङ अरिला रज्ज़ा माह तोहई, झांह लेह अपि छिह रूठे अति दुह लहरिर।

परमेश्वरो हुकुमो भाषे माह लहज़िमी रंङ साते इस्राएली ज़ि इच्च़ा कम शुरू लेह च़रतिर अपि मह्स फेरा दोहराके च़रतिर। दि कम झांह ठ्रोह शुरू शुई थोड़े सालो थल्जी इस्राएली परमेश्वरो हुकम माह मानेक्पोर, दोहपल दोरे दोतु बैरी तु दोरच़ी याहरच़िमी दोरच़ी दोतिंङ सजा रमोर। दि बैरिर इस्राएली तु दोरच़ी दोतु समान लूटेगी लेंज़ा शोर, दंङ दोतु भत्ते धिर ला नाश लेह च़रपोर, दंङ दोतु बिचंङ ज़ि मह्स मीहतिंङ सचे च़रपोर। दोहपल अगर इस्राएली तु बैरिर दोतु टोईच़ी मह्स साल तचेक आत्याचार लोहर, दोऊ थल इस्राएली एनोह पापो पश्चाताप लोहर दंङ परमेश्वरो दोरच़ी एनोह बचाच़िमी थल्जी प्रार्थना लोहर।

हर फेरा अपेहल इस्राएली ज़ि पश्चाताप लोहर दंङ परमेश्वरे दोतिंङ बचाएपोतो। दोई इच्चा छुड़ाएच़ा दोऊ दोरच़ी झांह लोहतो, इच्चा झांह ठ्रोह मीह अऊं दोतु बैरीतु खिलाफ लड़ेपोतो दंङ दोति याहरच़े च़रपोतो। दोहपल देशा रिंङ शान्ति शोतो दंङ दुह छुड़ाएच़ा मीह दोतु टोईच़ी रूठे रंङ राज लोहतो। परमेश्वरे दुह मीहतिंङ बच़ाएच़िमी थल्जी मह्स छुड़ाएच़ा दि च़रति। परमेश्वरे कच्छो ए इच्चा बैरी जाति बि, मिद्धानी तु दोरच़ी इस्राएली तिंङ याहरच़िमी थल्जी झांह लहरी।

मिद्धानी ज़ि निह साल तचेक इस्राएली तु फसल लुटेगी च़रतिर। इस्राएली मीहरे मह्स बेबा इलिर, दंङ दोरे गुफा रिंङ ब्याके इलिर ताकि मिद्धानी मीहच़ी दोतिंङ पेट्री मरपोर। थल मुखंङ दोतिंङ बचाएच़िमी थल्जी दोच़ि परमेश्वरा बि हाऊष रांईर।

गिदोन मिन्दु इच्चा इस्राएली मीह तोहई। इच्चा ध्याड़ा, दुह इच्चा गुप्त ठाहरिरिंङ छ्वा ठुडकेशी लेहकी तोहई ताकि मिद्धानी मीहच़ी दुह शिल्जी माह जूंस। यहोवा ओ स्वर्गदूता ज़ि गिदोनो कछंङ अंजे दोऊ हखा कुईर, “हे शूरवीर सूरमा, परमेश्वर करंङ साते तोह, ईला दंङ इस्राएली तिंङ मिद्धानो दोरच़ी बचाएतु।”

गिदोनो बाह ओ दोर मूर्ति बि समर्पित इच्चा वेदी तोहई। भत्ते बे मुंडो गप्पा अंऊ परमेश्वरे गिदोना बि लहज़िमी थल्जी कुहषी ताहरे दु, दुह वेदी बि ठ्राव्ज़ि तोहई। पर गिदोन मीहतु दोरच़ी बेवाते, झांह लेह दोई रात शुहबिमी रूहमज़ा तोहई। दोहपल दोई दुह वेदी ठ्राव्लज़े खंणी-खंणी लेह च़रति। दोई परमेश्वरो थल्जी इच्चा खरकोई वेदी बणांएति दंङ दोऊ टोईच़ी परमेश्वरो थल्जी बलि चढ़ाएति।

ओईरग मुंज़े मीहच़ी खंईर कि अच़िया वेदी ठ्राव्लजे खंणी-खंणी लेह च़रतिर, झांह लेह दोरे मह्स रोहषेक्च़ा इलिर। दोरे गिदोना बि सच़िमी थल्जी दोऊ चुंङ इलिर, पर गिदोनो बाह ज़ि कुई, “केहच़ी छारिंङ केनातु सदतु मदत लहज़िमी कोशिश लहज़ि लेहकी तोतोंई? अगर दु सद शुह दंङ दोबि एनोह मदत एनाह लेह रोंऊ!” दोई झांह कुई दिऊ थल्जी मीहच़ी गिदोना बि सच़ि मरतिर।

दोहपल इस्राएली तिंङ लुटेच़िमी थल्जी मिद्धानी मीहरे याहच़ा अतिर। दोरे धोंण मह्स तोईरे कि दोतु गिनती ला शिहबिमी माह तोहई। गिदोने दोतु खिलाफ लड़ेक्पिपी थल्जी इस्राएली तिंङ इच्चा साते बुलाएक्तो। गिदोने परमेश्वरो दोरच़ी झुह्ट चिन्हो मांग लहरी ताकि दोबि विशवास शुहबी जूंस कि परमेश्वरे हेले रिंङ दोबि इस्राएला बि बचाएच़िमी थल्जी कुट्री लेहकी तोह।

मुंड़ो निशानी ओ थल्जी, गिदोने त्रैंईऊ च़म धरतिऊ टोईच़ी केहच़ी परमेश्वरो हखा कुई कि मुंज़े कि रसोख सिर्फ त्रैंई ऊ च़मो टोईच़ी शुहबी जूंस धरति रिंङ मेस। परमेश्वरे ध्वांए लहरी। ओईरग रात, दोई परमेश्वरो हखा कुई कि धरति अलेग शुहबी जूंस पर त्रैंई ओ च़म अलेग शुहबी मेस। परमेश्वरे झांह ला लहरी दि ए झुह्ट निशानी दोरच़ी, गिदोने विश्वास लहरी कि परमेश्वरे हेले जुंज़ा कि दोई इस्राएली तिंङ मिद्धानी तु दोरच़ी बचाएपोतो।

दोहपल गिदोने सैनिका तिंङ एनोह कच्छा बुलाके दंङ 32,000 गङमी अतिर। पर परमेश्वरे दोतु हखा कुई कि दिरे मह्स तोतोर। दंङ गिदोने दुह भत्ते 22,000 तिंङ चुंङा वापिस लेह च़रति अंऊ दोरे लड़ाई रंङ साते बेवातेर। परमेश्वरे गिदोनो हखा कुई दि गङमिरे एतेंग ला मह्स तोतोर। झांह लेह गिदोने 300 सैनिका तिंङ छोड़ेके ऊई भत्ते ति चुंङा वापिस च़चि च़रति।

दुह ए रात परमेश्वरे गिदोनो हखा कुई, “मिद्धानी तु तम्बू रिंङ ईला दंङ दोतु गप्पा रेड्रु। अपेहल केई रेड्रोन कि दोच़ी छिह गप्पा लहज़ी लेहकी तोतोर दंङ कांह दोतु टोईच़ी हमला लहज़िमी दोरच़ी बेओनि माह।” झांह लेह दुह रात, गिदोन योंख तम्बू रिंङ इलि दंङ इच्चा मिद्धानी सैनिका बि एनोह मित्रा बि दुह गप्पा कंड्री रेड्रीर अंऊ दोई मङडुं काहंषी ताहरे। दुह गङमी ओ मित्रे कुहषी ताहरे, “दिह मङडुं मतलब तोहई कि गिदोनो सेना ञेंरे मिद्धानो सेना बि याहरचि च़रपोतो।” अपेहल गिदोने दिह रेड्रीर दोहपल दोई परमेश्वरो स्तुति लहरी।

दोहपल गिदोन एनोह सैनिकातु कछंङ वापिस अच्च़ा इलि दंङ दोतु बिचंङ हर इच्च़ा-इच्च़ा बि रणंशिग, इच्च़ा श्रोह नन, दंङ इच्चा हलड़ा रैंई। दोचि दु तम्बू फेरे शुचि इलिर अंऊर मिद्धानी सैनिक इमरि तोईरे। गिदोनो 300 सैनिका ज़ि एनोह हलड़ा बि नन रैं काप्च़ि तारेर, झांह लेह मिद्धानी मीहरे दुह हलड़ा ओ छंङी खड्री मरतिर।

दोहपल गिदोनो भत्ते सैनिका ज़ि एनोह ननदेर इच्चा ए टेमारिंङ ऐखा लेह अचानाक ए एनोह हलड़ा प्रकट लेह च़रतिर। दंङ दोच़ि एनोह रंणशिंगा बि फुह लहरिर ए हाऊष रांईर, “यहोवा ए गिदोनो तलवार!”

परमेश्वरे मिद्धानी तिंङ बेई लहज़ी च़रति, झांह लेह दोच़ि इदि-अईदि बि ट्रिकट्री लेहतिर। ध्वांए गिदोन ऊजाब लहज़ा तिंङ मह्स ऊई इस्रातिंङ मिद्धानी तु पीछा लहज़िमी थल्जी दोतु मदत लहज़िमी थल्जी बुलाके च़रति। दोच़ि दोतु बिचंङ ज़ि मह्सा तिंङ सचि च़रतिर दंङ उई दोतु पिछा लेह दोतिंङ इस्राएल देशो धकतेखा हुच़ि च़रतिर। दुह ध्याड़ा 1,20,000 मिद्धानी सिए इलदेर। झांह ठ्रोह परमेश्वरे इस्राएली तिंङ बचाएति।

दोच़ि गिदोना बि एनोह रज्ज़ा बणांएषी जुंज़ातेर, पर गिदोने दोतिंङ झांह लेह माह रांई, पर दोई दोतु दोरच़ी दुह जंङो समान पेट्रीर अंऊ दोतु बिचंङ ज़ि हर इच्चे मिद्धानी तु दोरच़ी लूटेकते। दोच़ि मह्स जंङ गिदोना बि रैं च़रतिर।

दोहपल गिदोने जंङो इच्चा खास खम बणांएति छना कि मोह्ड़े पुरोहिता ज़ि लेहच़ातेर। पर मीहच़ी दोऊ आराधना लेह शुरू लेह च़रतिर छना कि दुह इच्चा मूर्ति शुह दोहपल परमेश्वरे यहच़ा इस्राएला बि सज़ा रांई छना कुचे दोच़ि मूर्ति ओ आराधना लाहतेर। परमेश्वरे दोतु बैरी तिंङ दोतु हवाले लेह च़रति। थल मुखंङ दोच़ि यहच़ा परमेश्वरो हखा मदतो थल्जी प्रार्थना लहरिर, दंङ परमेश्वरे दोतु कछंङ दोतिंङ अई इच्चा छुड़ाएच़ा च़रति।

दि ए गप्पा अयों शुदा फेरा शुचि इलि; इस्राएली मीहरे पाप लोहर, परमेश्वरे दोतिंङ सज़ा रमतो, दोच़ि पच्शाताप लोहर दंङ परमेश्वरे दोतिंङ छुड़ाएच़िमी थल्जी अतिया चरपोतो। मह्स साल तचेक, परमेश्वरे मह्स ज़ि छुड़ाच़ा तिंङ च़रतिर अतिंङ इस्राएली तिंङ दोतु बैरी तु दोरच़ी बचाएकाते।

थल मुखंङ, दुह मीहच़ी ऊई देशो ठ्रोह परमेश्वरो हखा एनोह थल्जी इच्चा रज्ज़ा ओ मांग लहरिर दोच़ि इच्चा झांह ठ्रोह रज्ज़ा जुंज़ातेर अंऊ लम्हें ए शाक्तिशाली शुहबी जूंस, दंङ अंऊ लड़ाई रिंङ दोतु अगुवाई लोहतो परमेश्वरा बि दि निवेदन रूठे माह अति, पर दोई दोतिंङ झांह ठ्रोह रज्ज़ा रांई छना दोच़ि माग लहसी ताहरेर।न्यायियों अध्याय 1-3; 6-8; 1 शमूएल 1-10 से एक बाइबल की कहानी