17. दाऊदा रंङ साते परमेश्वरो वायदा

शाऊल इस्राएलो मुंडो रज्ज़ा तोहई। दू लम्हें ए सलटे तोहई, छना दू मीहच़ी जुंज़ातेर ध्वांए शुई। इस्राएलो टोईच़ी राजो तुहई महस साल तुहई शाऊल इच्चा रूठे रज्जा तोहई। पर थले दू इच्चा मदम मीह बणेंकी इलि अच़ि परमेश्वरो गप्पा माह मानेक्ती, दिऊ थल्जी परमेश्वरे दोऊ ठहरि अई इच्चा मीहबी रज्ज़ा बणाकें च़रति।

परमेश्वरे दाऊद मिन्दु इच्चा जवान इस्राएली गङंमी बि अंङें च़रति इच्चा ध्याड़ा शाऊल ओ ठाहरि रज्ज़ा शुहबिमी थल्जी तैयार लहज़ी शुरू लहरिर। दाऊद बैतलहम नगरंङ इच्चा पोहाल तोहई। दू एनोह बाहो त्रैंई रवाक्च़ाते, दोई इच्छा फेरा ब्राघ ए भालू झुल्लाकु तिंङ सच़ि च़रति छना कुचे दाकुई त्रैंईतु टोईच़ी हमला लहरी। दाऊद स्वाभाव रूठे ए धर्मी मीह तोहई। दोई परमेश्वरो टोईच़ी विशवास लहरी दंङ दोऊ गप्पा मानेक्ती।

अपेहल दाऊद इच्चा जवान ए गङंमी शुचि इलि, दू मुक्का दोई लम्हें ए चौड़ा गोलियतो खिलाप लड़ाई लहरी। गोलियत इच्चा महस खतरनाक सैनिक तोहई। दू महसे ताकतवरे ए लगभग षुमु मीटर लम्हें! पर परमेश्वरे गोलियता बि सच़िमी ए इस्राएल देशा बि बचाएच़िमी थल्जी दाऊदो मदत लहरी। दोऊ थल, दाऊदे इस्राएलो बैरी ओ टोईच़ी महस फेरा जीत खोकसिरी। दाऊद इच्चा मोह्ड़े सैनिक बणेंके इलि, दंङ दोई महस लड़ाई रिंङ इस्राएली सेना ओ अगुवाई लहरी। दंङ मीहच़ी दोऊ महस षटणा लहच़ी लेहतिर।

इस्राएलो मीहच़ी दाऊदा रंङ साते धोंण दाह लहरिर कि शाऊल दोरंङ साते जलन लहज़ि लेहति। शाऊले दाऊदा बि सच़ि जुंज़ाते, झांह लेह दाऊद दोऊ सैनिका तु बेह्द चेह्की बंणो हखा पोक्शे इलि। अपेहल शाऊल ए दोऊ सैनिक दाऊदो खोजा रिंङ दंङ शाऊल इच्चा गुफा रिंङ इलि। दि दू ए गुफा तोहई अंऊर दाऊद ब्याके तोहई, दि शाऊले माह तंङरी। दाऊद शाऊलो रज्ज़ा ओ थले-थले दोऊ महस कछंङ अच़ा इलि दंङ दोई दोऊ खंमज़े ओ इच्चा खंणी लेह च़रति। दोऊ थल, अपेहल शाऊल गुफा ज़ि धकलेखा हुंचा इलि दंङ दाऊदे दोबि दू खंमज़े ओ खंणी कंड्रीरी। शाऊले ञेंई च़रति कि दाऊदे रज्ज़ा बणेंक्पिमी थल्जी दोबि सच़ि माह जुंज़ाते।

थोड़े टेमो थल, शाऊल लड़ाई रिंङ सिए इलि, दंङ दाऊद इस्राएल देशो रज्ज़ा बणेंके इलि। दाऊद इच्चा रूठे रज्ज़ा तोहई, दंङ मीहतिंङ महस दाह लहज़ाते। परमेश्वरे दाऊदा बि आशीषित लहरी दंङ दोबि महस कामयाब लहरी। दाऊदे महस लड़ाई लड़ेती, दंङ परमेश्वरे इस्राएलो बैरी तिंङ याहरच़िमी थल्जी दोऊ मदत लहरी। दाऊदे यरूशलेम नगरा बि द्रक्शे दोबि एनोह राजधानी बणाके च़रति, दंङ दोरतिंङ बंङज़ा दोई राज लहरिअं। दाऊद निहज़ा साल तचेक रज्ज़ा बणेंके बंङज़िरी। दू मुक्का, इस्राएल महस सामर्थी ए साहूकार बणेंके इलि।

दाऊदे इच्च़ा मंदिर बणाएशी जुंज़ाते अंऊर भत्ते इस्राएली मीहच़ी परमेश्वरो आराधना लेह तरपोर दंङ दोऊ थल्जी बलिदान लेह तरपोर। पी राह साल बेहच़ी, दोरे मीहरे मूसा ओ बणाएशी मिलापो तंबू रिंङ परमेश्वरो आराधना लहज़ातेर दंङ दोऊ थल्जी बलिदान चढ़ाएच़ातेर।

पर दोरतिंङ नातान मिन्दु इच्चा भविष्यवक्ता तोहई। परमेश्वरे दोबि दाऊदो कछंङ दि कुट्रीमी थल्जी च़रति: “केई महस लड़ाई लड़ेक्तन, झांह लेह केई गिऊ थल्जी दि मंदिर था बणाएक्तु। कनु योह ज़ि झांह ठ्रोह बणेएपोतो। तांला, गेह कनिंङ महस आशीष रमोग। कनु इच्चा खानदान हमेशा ओ थल्जी गिऊ मीहतु टोईच़ी रज्ज़ा ओ ठ्रोह राज लोहतो।” हमेशा ओ थल्जी राज लहज़ा दू दाऊदो खानदानो ए मसीह तोहई। मसीह परमेश्वरो अंङषी मीह तोहई अंऊ संसारो मीहतिंङ दोतु पापो दोरच़ी बचाएपोतो।

अपेहल दाऊदे नातान भविष्यवक्ता ओ दि खबर रेड्रीरी दंङ दोई परमेश्वरो धन्यवाद लहरी दंङ दोऊ स्तुति लहरी। परमेश्वरे दोऊ मान समान बढ़ाएच़ी लेहकी तोहई दंङ दोबि महस आशीष रंड्री लेहकी तोहई, बेशक दाऊदे दि माह ञेंहच़ाते कि परमेश्वरे दि गप्पा अपेहल पूरा लोहतो। दि मुक्का ञेंहच़ी ञेंहच़ातंई कि इस्राएली तिंङ इच्चा लम्हें टेम तचेक, लगभग इच्चा हज़ार साल तचेक मसीह बि अपिमी रूहमज़ी लेहपोतो।

दाऊदे महस साल तचेक एनोह मीहतु टोईच़ी राज लहरी। दोई ईमानदारी रंङ साते परमेश्वरो गप्पा मानेक्ती दंङ परमेश्वरे दोबि आशीषित लहरी हालांकि, एनोह जीवनो थल मुखो ध्याड़ा रिंङ दोई परमेश्वरो खिलाप महस भयानक पाप लहरी।

इच्चा ध्याड़ा दाऊदो भत्ते सैनिकार ऊईतार लड़ाई लड़ेक्पि अच्च़ा इलिर दू मुक्का एनोह महलो धकतेखा अति, दंङ दोई इच्चा सलटे मेच़िमी बि सुह्ई तंङरी। दोई दोऊ टोईच़ी नज़र एखा माह लहरि, दाऊदे दू मेच़िमी माह सेहच़ाते पर दोई पता लगाके च़रति कि दोऊ मिन बतशेबा तोहई।

दाऊदे दू मेच़िमी बि एनोह हखा किरच़िमी थल्जी, एनोह इच्चा सेनिक दोऊ कछंङ च़रति। दाऊदे दू मेच़िमी रंङ साते नाज़ायज़ रिश्ता बणाएति दंङ दोऊ थल दू मेच़िमी बि दोऊ चुंङा च़चि च़रति। थोड़े टेमो थल बतशेबा दि कुहच़ी दाऊदो कछंङ दि खबर च़रति कि दोऊ खोकटुंङ कटु तोह।

बतशेबा ओ मिन ऊरिय्याह मिन्दु इच्चा मीह तोहई। दू दाऊदो खास सैनिका तु बिचंङ ज़ि इच्चा तोहई। दि मुक्का दू लड़ाई ओ थल्जी धकतेखा इलज़ी तोहई। दाऊदे ऊरिय्याह बि वापिस बुलाके दोबि एनोह मेच़ा रंङ साते बंङज़िमी थल्जी कुई। पर ऊई सैनिक लड़ाई रिंङ तोईरे झांह लेह ऊरिय्याह ज़ि चुंङा इबिमी थल्जी इंकार लेह च़रति। दंङ दाऊदे ऊरिय्याह बि वापिस लड़ाई ओ हखा च़रति दंङ सेनापति ओ हखा दोबि लड़ाई रिंङ झांह ठ्रोह ठाहरि च़रची लहरी अंऊर बैरी महसे शाक्तिशाली शोतो ताकि दू सिए जूंस। दंङ झांह शुई कि ऊरिय्याह लड़ाई रिंङ सिए इलि।

ऊरिय्याहो लड़ाई रिंङ सिमी थल दाऊदे बतशेवा रंङ साते ब्याह लेह च़रति। दोऊ थल, दोई दाऊदो योह बि जन्म रांई। दाऊदे छिल्ला लहरी दोरंङ साते परमेश्वर महस रोहषेक्च़ा तोहई, झांह लेह दोई नातान भविष्यवक्ता बि दाऊदा बि दि कुट्रीमी थल्जी च़रति कि दोई अंयो मदम लहरी। दाऊदे एनोह पापो पश्‌चाताप लहरी दंङ परमेश्वरे दोबि माप लेह च़रति। एनोह ऊई जीवना रिंङ, एनोह खरे टेमा रिंङ ला दाऊद परमेश्वरो थले-थले जोज़िरी दंङ दोऊ गप्पा मानेके च़रति।

पर दाऊदो कटु सिए इलि। दंङ दिऊ वहज़ा ज़ि परमेश्वरे दाऊदा बि सज़ा रांई। दिऊ अलावा, दाऊदो सिमी तचेक, दोऊ एनोह टबरातु रै मीहतु वहज़ा ज़ि दोऊ खिलाप लड़ाई लहरिर, दंङ दाऊदो एनोह शाक्ति कम शुचि इलज़ी तोहई। पर परमेश्वर विशवासो जोगे तोहई दंङ एंतेग ला दोई दू लहरी अंऊ दोई दाऊदो हखा लहज़िमी वादा लहसी ताहरे कि दोई लोहतो, भले दाऊदे दोऊ भाषे लहसी माह ताहरे। दाऊद ए बतशेबा बि अई कटु ज़ेहकी इलि दंङ दोचि ओ दोऊ मिन सुलेमान तहरिर।