18. फाह्सी राज

दाऊद रज्ज़ा ज़ि निहज़ा साल तचेक राज लहरी। दोहपल दू सिए इलि, दंङ दोऊ योह सुलैमाना ज़ि इस्राएलो टोईच़ी राज लहज़ी शुरू लहरी। परमेश्वरे सुलैमानो हखा गप्पा लहरी दंङ दोऊ हखा रूहक्ती कि दोई भत्ते बे महस छि जुंज़ा कि परमेश्वरे दोऊ थल्जी लोहतो। सुलैमाने परमेश्वरो दोरच़ी पेट्रीरी कि दोई दोबि महस बुध्दिमान बणाके च़रतु। दि गप्पा ए परमेश्वर खुश लेह च़रति, झांह लेह परमेश्वरे सुलेमाना बि संसारो भत्ते बे मोह्ड़े बुध्दिमान मीह बणाके च़रति। सुलैमाने महस गप्पा सिकेखी च़रति दंङ दू इच्चा बुध्दिमान शासक तोहई। परमेश्वरे दोबि महस साहुकार ला बणाके च़रचाते।

यरूशलेमा रिंङ सुलैमाने दू मंदिर बणाके च़रति अतु थल्जी दोऊ बाह ज़ि योजना लहसी ताहरे दंङ सामान ला ठ्रोहका लहसी ताहरे। एंतेग मीहरे मिलापो तम्बू वहज़ा ज़ि मंदिरंङ परमेश्वरो आराधना लहज़ातेर ए दोऊ थल्जी बलि चढ़ाएच़ातेर। परमेश्वर अंज़े मंदिरंङ हाज़िर बंङज़ाते, दंङ दोरतिंङ दू एनोह मीहतंङ साते वास लहज़ाते।

पर सुलैमाने ऊई देशो मेच़िमी तंङ साते दाह लहरी। दोई महस मेच़िमी लगभग इच्चा हज़ार मेच़िमी तंङ साते ब्याह लहजि परमेश्वरो हुकुम माह मानेक्ति! दिऊ बिचंङ ज़ि महस मेच़िमी ऊई पखला देशो दोरच़ी अंजे तोईरे दंङ एनाह रंङ साते एनोह सद् ला कुरच़ा अंजे तोईरे दंङ दोतु उपासना लहजि ज़ारी तहीं। अपेहल सुलैमान यंङदे शुचि इलि दंङ दोई ला दोतु सद् तु उपासना लहरी।

दि वहज़ा ज़ि परमेश्वर सुलैमाना रंङ साते रोहषेक्च़ा तोहई। दोई कुई दू इस्राएल देशा बि झुह्ट खंणी लहजि दोबि सज़ा रमोतो। दोई दि सुलैमानो सिमी थल लोहतो।

सुलैमानो सिमी थल, रहबाम रज्ज़ा बणेंके इलि। इस्राएल देशो भत्ते मीहरे दोबि एनोह रज्ज़ा ओ रूपारिंङ स्वीकार लहज़िमी थल्जी भत्तेर इच्चा साते ठ्रोहका शुईरे। दोच़ि रहबामा रंङ साते शिकायत लहरिर कि सुलैमान कि सुलैमाने दोतंङ महस मेहनत लहज़ि लहरी दंङ महस कर वसूल लहरी। दोचि रहबामो हखा विनती लहरिर कि दोतु दोरच़ी कम थोड़े लोहवा लोहु।

पर रहबामा ज़ि दोतिंङ महस मूर्खता रंङ साते जबाब रांई, “केहच़ी कवातंई कि गिऊ बाह सुलैमाने केहतु दोरच़ी महस मेहनत लहज़ी लहरी। पर गेह केहतु दोरच़ी दोबि ला महस मेहनत लहजि लोहग, दंङ गेह कनिंङ दोबि ला महस टेहषी रमोग।”

अपेहल मीहच़ी दोबि झांह कुट्री रेयातेर दंङ दोतु बिचंङ ज़ि महस मीहरे दोऊ खिलाप शुचि इलिर। साह गोत्रा ज़ि दोबि छोड़ेके च़रतिर; दोरंङ साते एंतेग सिर्फ झुह्ट गोत्र बचेकी तोईरे। दि झुह्ट गोत्र ए एनाबि यहूदा ओ राज कुहच़ी च़रतिर।

बाकि ओ साह गोत्रा ज़ि यारोबामा मिंदंङ इच्चा मीहबी एनोह रज्ज़ा बणाके च़रति। दि गोत्र देशो उत्तर-पूर्वी हिस्सा रिंङ तोईरे। दोचि एबाबि इस्राएलो राज कुईरे।

पर यारोबामे परमेश्वरो खिलाप बलवा लहरी दंङ मीहतु दोरच़ी पाप लहज़ि लहरी। दोई एनोह मीहतु दोरच़ी उपासना लहज़िमी थल्जी झुह्ट मूर्ति बणाएति। दोरे एंतेग यहूदा ओ राज रिंङ यरूशलेमा रिंङ परमेश्वरो मंदिरा रिंङ दोऊ आराधना लहज़िमी मेहलिर।

यहूदा ए इस्राएलो राज बैरी बणेके इलिर दंङ हमेशा ईदि-अईदि ऊ थल्जी लड़ाई लहजि लेहतिर।

इस्राएलो खरकोई राजा रिंङ, भत्ते रज्ज़ा मांजी तोईरे। दितु बिचंङ ज़ि महस रज्ज़ा बणेक्पिमी हिटी तहज़ा ऊई इस्राएली ठ्रोह सिए इलिर।

इस्राएल राजो भत्ते ए रज्ज़ार ए दंङ महस मीहच़ी मूर्ति ओ पूजा लहरिर। अपेहल दोच़ि झांह लहरिर, दू मुक्का दोच़ि महस कुकम लहरिर दंङ देर तचेक कि महस फेरा मूर्ति ओ तुईज़ी कटु तु ल बलि रैं च़रतिर।

यहूदा राज ओ रज्ज़ा, दाऊदो ओ खानदानो तोहई। दि रज्ज़ा तु बिचंङ ज़ि रेह रूठे मीहरे तोईरे अंऊ दोचि रूठे रंङ राज लहरिर दंङ परमेश्वरो आराधना लहरिर। पर यहूदा ओ महस रज्ज़ा मदम तोईरे। दोच़ि मदमा रंङ साते राज लहरिर, दंङ मूर्ति तु उपासना लहरिर। देर तचेक कि रेह रज्ज़ा ज़ि हप्सी सद् तु तुईज़ी एनोह कटुतु बलि रैं च़रतिर। यहूदा ओ महस मीहच़ी ला परमेश्वरो खिलाप बलवा लेह च़रतिर दंङ ऊई सद् तु उपासना लहरिर।