19. भविष्यवक्ता

परमेश्वर हमेशा इस्राएली तु कछंङ भविष्यवक्ता तिंङ च़रचाते। भविष्यवक्ता परमेश्वरो दोरच़ी खबर रेड्रातेर दंङ दोबि मीहतिंङ कंड्रातेर।

अपेहल अहाब इस्राएल राजो टोईच़ी रज्ज़ा तोहई दंङ दू मुक्का एलिय्याह भविष्यवक्ता तोहई। अहाब इच्चा मदम मीह तोहई। दोई हप्सी बाल सद् तु उपासना लहज़िमी थल्जी मीहतिंङ मज़बूर लाहते झांह लेह एलिय्याह ज़ि अहाबो हखा कुई कि परमेश्वर दू मीहतिंङ सज़ा रंड्रीमी तते। दोई दोतंङ साते कुई, “अपेहल तचेक गेह यहच़ा संदाण शुहबिमी थल्जी माह कोहग धोंण तचेक माह इस्राएलो राजा रिंङ संदाण शोतो दंङ माह ए ओश दहपोतो।” दि गप्पा दोरच़ी अहाबा बि महस रोहष अच़ा अति कि दोई एलिय्याह बि सच़िमी फेंसला लेह च़रति।

झांह लेह परमेश्वरे एलिय्याहो हखा कुई कि दू बंणा रिंङ इलजे अहाबो दोरच़ी ब्याके इलि। एलिय्याह बंणा रिंङ दू सोता ओ कछंङ इलि अंऊर इबिमी थल्जी परमेश्वरे दोबि कांहषी ताहरे। हर मुंजे ए योंकोले, प्यारे एलिय्याह ओ थल्जी रोटी ए षाह कुरच़ा हपातेर। दि भत्ते टेमा रिंङ, अहाब ए दोऊ सेना एलिय्याहा बि पेट्रातेर, पर दोचि दोबि पेट्री मारतिर।

संदाण माह शुहबी रंङ थोड़े टेमो थल दू सोता कारछी इलि। झांह लेह एलिय्याह कछंङ ए इच्चा देशा रिंङ अच्च़ा इलि। दू देशा रिंङ इच्च़ा गरीब रंणी मेच़िमी तोहई अतु इच्चा योह तोहई। दोतु दोरतिंङ बगत लगभग योहसा इलज़ी तोहई छना कुचे दोरतिंङ छल्ले फसल शुचि माह तोहई। तांला यहच़ा, दू मेच़िमी एलिय्याहो देखभाल लहरी, झांह लेह परमेश्वरे दोऊ ए दोऊ योहू ज़रूरत पूरा लहरी, झांह लेह दोऊ फुकानो नंन ए तेलो कुप्पी अपेहला सलजी माह शुई। दू भत्ते अकालो मुक्का रिंङ दोऊ दोरतिंङ बगत तोहई। एलिय्याह रै साल तचेक दोरतिंङ बंङज़िरी।

साढ़े षुमु सालो थल, परमेश्वरे एलिय्याहो हखा कुई कि दोई यहच़ा संदाण लोहतो। दोई एलिय्याह बि यहच़ा वापिस इस्राएलो हखा इलजे अहाबो हखा गप्पा लहज़िमी थल्जी कुई। झांह लेह एलिय्याह अहाबो कछंङ इलि। अपेहल अहाबे दू खंई ता दंङ दोई कुई, “अच्छा कांह शुनाह मुसीबत पैदा लहज़ाढ़! एलिय्याह ज़ि जबाब रांई, “मुसीबत पैदा लहज़ाढ़ ता कांह शुनाह! केई यहोवा बि छोड़ेकी चरच़ातन। दू ए सच्चा परमेश्वर शुह, पर केई बाल सद् तु उपासना लहज़ातन। एंतेग कनिंङ इस्राएल राजो भत्ते मीहतिंङ कर्मेल गोह टोईच़ी हपि लेहपोतो।

दंङ भत्ते मीहरे कर्मेल गोह टोईच़ी अचा इलिर। दोरे गंङमीरे ला अतिरे अंऊ दोच़ि कुट्रातेर दि बालो भविष्यवक्ता शुरे। दोरे भत्तेर 450 तोईरे। एलिय्याह ज़ि मीहतु हखा कुई, “अपेहल तचेक केई केनोह सेहम किरच़ी तरपोन? अगर यहोवा परमेश्वर शुह ता दोऊ आराधना लोह! अगर बाल सद् परमेश्वर शुह ता दोऊ उपासना लोह!”

दोहपल एलिय्याह ज़ि बालो भविष्यवक्ता तु हखा कुई, “इच्चा बंङ बि बलि लहज़ी दोऊ षाह बि बलिदान शुहबिमी थल्जी वेदी ओ टोईच़ी केहच़ी च़रतु, पर मेह थाकेऊ। दोऊ थल गेह ला ध्वांए लोहग, दंङ इच्चा शताह वेदी ओ टोईच़ी दू षाह केहच़ी च़रपोग। दोहपल अगर परमेश्वरे वेदी ओ टोईच़ी मेह छंङज़ा दंङ केहच़ी ञेंई च़रपोंई कि दू ए सच्चा परमेश्वर शुह।” दोहपल बालो भविष्यवक्ता ज़ि इच्चा बलि तैयार लहरिर पर मेह माह केईर।

दोहपल बालो भविष्यवक्ता ज़ि बालो हखा प्रार्थना लहरिर, “हे बाल, ञेंहतु रेड्री च़रतु!” पूरा ध्याड़ा दोच़ि प्रार्थना लहरिर ए हाऊष रैंईर दंङ देर तचेक कि एनाबि चाकू रै ट्रिकी च़रतिर, पर बाल सद् ज़ि जबाब माह रांई, दंङ दोई छल्ले मेह द्प्पी माह लहरी।

बालो भविष्यवक्ता ज़ि बालो हखा प्रार्थना लहज़िमी थल्जी लगभग भत्ते ध्याड़ा चच़ि च़रतिर। दंङ थल मुखंङ दोच़ि प्रार्थना लहज़ि बंद लेह च़रतिर। दोहपल एलिय्याह ज़ि अई बंङों षाह परमेश्वरो वेदी ओ टोईच़ी केहच़ी च़रति। दोऊ थल, दोई मीहतु दोरच़ी तिऊ मोह्ड़े- मोह्ड़े नंन दू बलि रंड्रीमी ठाहरि थोरच़िमी थल्जी कुई अपेहल तचेक कि दू षाह, सिंङ, दंङ देर तचेक कि वेदी ओ देसी-नेव्सी कि ठाहरि रूठे रंङ अल्ले शुचि मेहलि।

दोहपल एलिय्याह ज़ि प्रार्थना लहरी, “हे यहोवा, अब्राहम, इसहाक, ए याकूबो परमेश्वर, ञेंतिङ कंड्रु कि कांह कनाह ए इस्राएलो परमेश्वर शुनाह दंङ दि कि गेह कांह परगर शुगाह। गिहबी जबाब रांऊ अंऊ दोरच़ी दि मीहच़ी दि ञेंई च़रपोर कि कांह ए सच्चा परमेश्वर शुनाह।“

ध्वांए सर्गो दोरच़ी मेह द्हच़ी अति दंङ दोई षाह, सिंङ, रह्घ, श्रोह, दंङ देर तचेक कि वेदी ओ देसी-न्वेसी ति ला रोहच़े च़रति। अपेहल मीहच़ी दि खंईरे, दोरे धरतिऊ टोईच़ी दह्चे इलिर दंङ कुईरे, “यहोवा ए परमेश्वर शुह! यहोवा ए परमेश्वर शुह!”

दोहपल एलिय्याह ज़ि कुई, “बालो इच्चा ला भविष्यवक्‍ता बचेकी इबि माह जुंस!” झांह लेह मीहच़ी बालो भत्ते भविष्यवक्ता च़ुमने च़रतिर दंङ दोरच़ी रैंज़ा शिलज़ी सच़े च़रतिर।

दोहपल एलिय्याह ज़ि अहाब रज्ज़ा बि कुई, “युरनाह केनोह चुंङा पोक्शे ईला, छना कुचे संदाण शुहबिमी तोह।” ध्वांए बद्ड महस शुचि इलिर, दंङ महस संदाण अपि शुरू शुचि इलि। दू कारच़ी दोबि योहच़े च़रति। ध्यां लेह प्रकट शुई कि यहोवा ए सच्चा परमेश्वर शुह।

अपेहल एलिय्याह ज़ि एनोह कम योहचे च़रति, दंङ परमेश्वरे एलीशा मिन्दु इच्चा गंङमी बि एनोह भविष्यवक्ता शुहबिमी थल्जी अंङे च़रति। परमेश्वरे एलीशा ओ दोरच़ी महस चमत्कार लेह च़रति लहरी। इच्चा चमत्कार नामाना रंङ साते शुई। दू इच्चा बैरी तु सेना ओ सरदार तोहई, पर दोबि चमड़ी ओ इच्चा मदम बिमारी शुचि इलि। नामाने एलीशा ओ पाहठी रेड्री ताहरे, झांह लेह दू एलीशा ओ कछंङ अति दंङ दोऊ हखा दोबि ठीक लहज़िमी थल्जी प्रार्थना लहज़ि लेहती। एलीशा ज़ि नामानो हखा कुई कि इलजे यरदन बेंड़ी रिंङ निहज़ी फेरा ठुमशु।

नामाना बि रोहष अच़ा अति। दोई झांह लहज़िमी दोरच़ी इंकार लेह च़रति, छना कुचे दि दोबि मूर्खता कम चेहसाते। पर थले दोई एनोह सेहम किरच़ी च़रति दंङ इलजे यरदन बेंडी रिंङ निहज़ी फेरा ठुमशा इलि। अपेहल थल मुखंङ दू तिऊ दोरच़ी धकतेखा अति दोहपल परमेश्वरे दू ठीक लेह च़रति।

परमेश्वरे इस्राएलो मीहतु कछंङ महस भविष्यवक्ता च़रति। दू भत्ते ज़ि मीहतु मूर्ति तू उपासना लहज़ी बंद लहज़िमी थल्जी कुई। दोऊ वहज़ा, दोतिंङ इदि-अईदि रंङ साते न्याय रंङ साते व्यवहार लहज़ी जूंशी तोह। दू भविष्यवक्ता ज़ि मीहतिंङ चेतावनी रांई कि दोतिंङ मदम कम लहज़ि बंद लेह केट्री जूंस दंङ दिऊ वहज़ाए परमेश्वरो हुकुमो भाषे लहज़ि जूंशी तोह। अगर दू मीहच़ी झांह माह लोहर ता परमेश्वर दोतिंङ दोषी मानेकी दोतु न्याय लोहतो, दंङ दोतिंङ सज़ा रमतो।

महस टेम, दू मीहच़ी परमेश्वरो हुकुमो भाषे माह लहरिर। हमेशा दोचि भविष्यवक्ता तंङ साते मदम व्यवहार लोहर दंङ देर तचेक कि अपेहला अपेहला दोतिंङ सचि च़रति। दोचि यिर्मयाह भविष्यवक्ता बि इच्चा कारछी कुंआ रिंङ केहच़ी च़रतिर दंङ दोबि दोरतिंङ सच़िमी थल्जी छोड़ेकी च़रति। दू कुंआ ओ ताड़ा रिंङ गाहरो बिचंङ ठुमशा इलि। पर दोहपल रज्ज़ा बि दोऊ टोईच़ी दाह अति दंङ दोई सैनिका बि हुकम रांई कि यिर्मयाहो सिमी तुहई दोबि कुंआ ओ धकतेखा हुंचि हतांई।

भविष्यवक्ता ज़ि परमेश्वरो तरफे कुट्री जारी तहरिर भले ए मीहच़ी दोतंङ साते नफरत लहरिर। दोचि मीहतिंङ चेतावनी रांईर कि अगर दोचि पश्चाताप माह लोहर दंङ परमेश्वर दोतु नाश लेह च़रपोतो। दोचि मीहतिंङ दि ला हिद लेह लहरिर कि परमेश्वरे दोतु कछंङ मसीह बि च़चिमी वायदा लहसी ततो।