20. बंधुआई ए यहच़ी

इस्राएलो राज ए यहूदा ओ राज झुल्ले परमेश्वरो खिलाप पाप लहरिर। दोचि दू वायदा योहचे च़रतिर अंऊ परमेश्वरे दोतंङ साते सीनै गोह टोईच़ी लाहते। परमेश्वरे दोतिंङ पश्चाताप लहज़ी ए चेतावनी रंड्रीमी थल्जी एनोह भविष्यवक्तार च़रति, पर दोचि दोऊ गप्पा मानेक्च़िमी रंङ साते इंकार लेह च़रति।

दंङ परमेश्वरे दोऊ बैरी तिंङ नाश लहज़िमी थल्जी झुल्ला राजो मीहतिंङ सज़ा रांई। अश्शूर इच्चा शताह देश तोहई अंऊ महसे शाक्तिशाली शुचि इलज़ि तोहई। दू ऊई देशो थल्जी महस निर्दयी ला तोहई। दोचि अंजे इस्राएलो राजो नाश लेह च़रतिर। अश्शूरियो ज़ि अंजे इस्राएल राजा रिंङ अंजे महसा तिंङ सचि च़रतिर, छिल्ला जुंज़ातेर भत्ते रैंज़ा शिलिर, दंङ देशो महस हिस्सा रोह्चे च़रतिर।

अश्शूरि ज़ि भत्ते अगुवा ए, साहुकार मीहरे, दंङ झांह ठ्रोह मीहरे अंऊ कीमती समान बणाएची ञेंहच़ातेर इच्चा साते ठ्रोहका लहरिर दंङ दोतिंङ अश्शूर देश रैंज़ा शिलिर इस्राएला रिंङ रै गरीब इस्राएली बचेकी तोईरे।

दोहथल अश्शूरी मीहरे दू देशा रिंङ बंङज़िमी थल्जी विदेशी मीहतिंङ रेंज़ा हतिर। दू विदेशी ज़ि दू नगर यहच़ा बणाके च़रतिर। अंऊ इस्राएली दोरतिंङ बचेकी तोईरे दोतंङ साते दोचि ब्याह लहरिर। दितु खानदान सामरी शुचि इलि।

यहूदा ओ राजो मीहच़ी खंईरे कि छना परमेश्वरे दोतु टोईच़ी विशवास माह लहज़ि रंङ इस्राएलो मीहतिंङ सज़ा रांई। पर तांला दोच़ि कनानी तु सद् तु उपासना लहरिर। परमेश्वरे दोतिंङ चेतावनी रंड्रीमी थल्जी भविष्यवक्ता तिंङ च़रति, पर दोचि रेड्रीमी दोरच़ी इंकार लेह च़रति।

लगभग राह सालो थल अश्शूरि ज़ि इस्राएलो राज नाश लेह च़रतिर। परमेश्वरे बेबीलोनो रज्ज़ा, नबूकदनेस्सरा बि यहूदा ओ राजो टोईच़ी हमला लहज़िमी थल्जी च़रति। बेबीलोन इच्चा शाक्तिशाली देश तोहई। यहूदा ओ रज्ज़ा नबूकदनेस्सरो परगर बणेक्च़िमी थल्जी ए हर साल महस ढबाहो भुगतान लहज़िमी थल्जी राजी शुचि इलि।

पर रैह सालो थल, यहूदा ओ रज्ज़ा बेबीलोनो खिलाप बलवा लेह च़रति। दंङ बेबीलोनी ज़ि वापिस अंजे यहूदा ओ राजो टोईच़ी हमला लेह च़रतिर। दोच़ि यरूशलेमो नगरो टोईच़ी कब्ज़ा लेह च़रतिर, मंदिर योहचे च़रतिर, दंङ नगर ए मंदिरो खजाना लूटेकी रैंज़ा शिलिर।

बलवा लहज़िमी थल यहूदा ओ रज्ज़ा बि सज़ा रंड्रीमी थल्जी, नबूकदनेस्सरो सैनिका ज़ि रज्ज़ा ओ योह बि दोऊ तुईज़ी सचि च़रतिर दंङ दोऊ थल दोबि कांणे लेह च़रतिर, दोरे रज्ज़ा बि एनाह रंङ साते रैंज़ा शिलिर ताकि दू बेबीलोनो जेलारिंङ सिए इबि जूंस।

नबूकदनेस्सर ए दोऊ सेना यहूदा ओ राजो लगभग भत्ते मीहतिंङ बेबीलोनो हखा रैंज़ा शिलि, सिर्फ भत्ते बे गरीब मीहतिंङ ए थलका केहच़ी च़रति ताकि दोचि रिहरिंङ फसल तैयार लेह तरपोर। दू मुक्का कि दि टेमा बि बंधुआई कुट्री अंऊर परमेश्वरो मीहतिंङ कसमो दू देशा ज़ि हुंचिमी थल्जी मज़बूर लेह च़रति।

भले ए परमेश्वरे एनोह मीहतिंङ दोतु पापो थल्जी बंधुआई रिंङ शिलज़िमी दोरच़ी सज़ा रांई, तांला दू दोतिंङ या एनोह वायदा बि पेहषिरी माह। परमेश्वरे एनोह मीहतु निगरानी तहज़ि जारी तहि दंङ एनोह भविष्यवक्ता दोरच़ी दोतंङ साते गप्पा लहज़ि लेहती दंङ एनोह भविष्यवक्ता तु दोरच़ी दोतंङ साते गप्पा लोहवा लहरी। दोई वायदा ओ 70 सालो थल, दोरे यहच़ा वायदा ओ देशा रिंङ वापिस अपोर।

लगभग 70 सालो थल, फारसो ओ रज्ज़ा कुस्रु ज़ि बेबीलोना बि याहरच़े च़रति, झांह लेह बेबीलोनो राजो वहज़ा फारसो ओ राजो रे देशो टोईच़ी राज लहरी। इस्राएली मीहरे एंतेग यहूदी तोतोर। दोतु बिचंङ ज़ि महसे ज़ि एनोह भत्ते जीवन बेबीलोना रिंङ ए बिताएगी च़रतिर। सिर्फ महस थोड़े अरे यंङदे यहूदी तिंङ ए यहूदा देश हिद तोहई

फारसी मीहरे महस सामर्थी तोईरे, पर दोच़ि एनोह द्रक्शे मीहतु टोईच़ी दाह लहरी। फारसी मीहच़ी रज्ज़ा बणेक्पिमी थोड़े टेमो थल, कुस्रु ज़ि इच्चा हुकुम रांई कि अरिला यहूदी अंऊ यहूदा ओ हखा वापिस इबि जुंज़ा, दू फारसो दोरच़ी हुंचा वापिस यहूदा ओ हखा इबि तरपोतो। देर तचेक कि दोचि दोतिंङ मंदिर बणाएच़िमी थल्जी ढबाह ला रांई। दंङ बंधुआई ओ 70 सालो थल, यहूदी तु इच्चा क्वाच़ि अरे झुण्ड़ यहूदा ज़ि यरूशलेमो नगरो हखा वापिस अच़ा अति।

अपेहल दोरे मीहरे यरूशलेम पिचि इलिर दंङ दोचि मंदिर ए नगरो पिला हासी भिती बि यहच़ा बणाके च़रतिर। फारसी मीहरे एंतेग ला दोतु टोईच़ी राज लहज़ातेर पर इच्चा फेरा यहच़ा दोरे वायदा ओ देशा रिंङ बंङज़ातेर दंङ मंदिरंङ आराधना लहज़ातेर।