21. परमेश्वरे मसीह बि रूहम्ज़ा तोह

अपेहल परमेश्वरे संसारो रचना लाहते, दोई ञेंहच़ाते कि दोबि थले अपेहला मसीह बि च़रची लेहपोतो। दंङ आदम ए हव्वा ओ हखा वायदा लहसी ताहरे कि दोई झांह लोहतो। दोई कुई कि हव्वा ओ दोरच़ी इच्चा खानदान ज़ेहक्पोतो अंऊ दोई ओमड्रो सिर काके च़रपोतो। अंऊ ओमड्रे हव्वा बि धोखा रांई कि ता शैतान तोहई परमेश्वरो मतलब तोहई कि मसीह पूरा ठ्रोह शैताना बि याहरच़े च़रपोतो।

परमेश्वरे अब्राहमो हखा वायदा लहरी कि दोऊ दोरच़ी संसारो भत्ते जाति तिंङ आशीष खोकसोतो। परमेश्वर थले भत्ते तिंङ अंऊ आ मुक्का मसीह बि चरच़िमी दोरच़ी दि वायदा बि पूरा लोहतो। दू मसीह संसारो हर इच्चा जाति ऊ बिचंङ ज़ि मीहतिंङ दोतु पापो दोरच़ी छुड़ाके च़रति।

परमेश्वरे मूसा ओ हखा वायदा लहरी कि भविष्य रिंङ दू मूसा ओ ठ्रोह इच्चा अई भविष्यवक्ता बि च़रपोतो। दि भविष्यवक्ता मसीह शोतो। दि रिति रंङ, परमेश्वरे यहच़ा वायदा लहरी कि दोई मसीह बि च़रपोतो।

परमेश्वरे रज्ज़ा दाऊदो हखा वायदा लहसी ताहरे कि दोऊ इच्चा खानदान मसीह शोतो। दू रज्ज़ा शोतो दंङ परमेश्वरो मीहतु टोईच़ी हमेशा ओ थल्जी राज लोहतो।

परमेश्वरे यिर्मयाह भविष्यवक्ता रंङ साते गप्पा लहरी दंङ कुई कि इच्चा ध्याड़ा दोई इच्चा खरकोई वायदा लोहतो। दू खरकोई वायदा इस्राएला रंङ साते सीने गोह टोईच़ी लहसी तुहई कि वायदा ओ ठ्रोह माह शोतो। अपेहल मीहतंङ साते दू एनोह खरकोई वायदा लोहतो, दंङ दू दोतु टोईच़ी एनाबि प्रकट लोहतो। हर इच्चा मीहच़ी दोरंङ साते दाह लोहर दंङ दोऊ कानून मानेक्च़िमी हिटी तोहतो। परमेश्वरे कुहषी ततो कि दि दोऊ कानूनो दोतु सेहमो टोईच़ी च़ेहसी ओ ठर्ओह शोतो। दोरे दोऊ मीहरे शोर, दंङ परमेश्वर दोतु पाप माफ लोहतो। दू मसीह शोतो अंऊ दोतंङ साते दू खरकोई वायदा लोहतो।

परमेश्वरो भविष्यवक्ता ज़ि दि ला कुईरे कि मसीह इच्चा भविष्यवक्ता शोतो। इच्चा भविष्यवक्ता दू मीह शुह अंऊ दोई परमेश्वरो वचन रेड्रा दंङ यहच़ा मीहतु टोईच़ी परमेश्वरो खबरो घोषणा लहज़ा। अपि च़रच़िमी परमेश्वरे वायदा लहसी ताहरे दू मसीह इच्चा सिध्द भविष्यवक्ता शोतो। मतलब दू मसीह खबरा बि रूठे रंङ रेड्रतो, दंङ दू मीहतिंङ दू खबरा बि रूठे रंङ सिखाएपोतो।

इस्राएली पुरोहिता ज़ि मीहतु थल्जी परमेश्वरो तुईज़ि बलि चढाएच़ी जारी तहरी। दि बलिदान मीहतु पापो थल्जी परमेश्वरो ओ दोरच़ी सज़ा रंड्रीमी ठाहरि चढ़ासी तोहई। पुरोहिता ज़ि मीहतु थल्जी प्रार्थना ला लहरिर। पर मसीह हेले ओ मोह्ड़े पुरोहित शोतो अंऊ परमेश्वरा बि रंड्रीमी थल्जी इच्चा हेले ओ बलि ठ्रोह एनाबि चढ़ाके च़रपोतो मतलब, दोई अपेहल ला पाप माह लोहतो, दंङ अपेहल दू एनाबि बलि शुहबिमी थल्जी रमतो, दंङ संसारा रिंङ अतुला बलि रंड्रीमी ज़रूरत माह शोतो।

मीहतु झुंण्डो टोईच़ी रज्ज़ा ए प्रधाने राज लहज़ाते, दंङ अपेहला- अपेहला दोच़ि गलती लहज़ातेर। रज्ज़ा दाऊदे सिर्फ इस्राएली तु टोईच़ी राज लहरी, पर रज्ज़ा दाऊदो खानदान मसीह भत्ते संसारो टोईच़ी राज लोहतो, दंङ दोई हमेशा ओ थल्जी राज लोहतो। दिऊ अलावा, दोई हमेशा न्याय रंङ साते राज लोहतो, दंङ सही फेंसला लोहतो।

परमेश्वरो भविष्यवक्ता ज़ि मसीहू पाहठी महस गप्पा कुहषी ततोर। उदाहरणो थल्जी, मलाकी ज़ि कुहषी ततो कि मसीहू अपिमी तुहई इच्चा अई भविष्यवक्ता अपतो। दू भविष्यवक्ता महस खास शोतो दिऊ अलावा, यशायाह भविष्यवक्ता ज़ि कुहषी चेहसी ततो कि मसीह ज़ि इच्चा कुंवारी ओ दोरच़ी जन्म लेहपोतो। दंङ मीका भविष्यवक्ता ज़ि कुहषी ततो कि मसीह बैतलहम नगरंङ जन्म लेहपोतो।

यशायाह भविष्यवक्ता ज़ि कुहषी ततो कि मसीह ज़ि गलीलो ठाहरि रिंङ वास लोहतो। अंऊ मीहरे महस दुखी तोतोर मसीह दोतिंङ शान्ति रमतो। दोई कैदी तिंङ ला आज़ाद लोहतो। मसीह अंऊ टेहच़ी दोतिंङ ए अच़ि रेड्री मारच़ा, खंड्री मारच़ातोर, कुट्री मारच़ातोर, या जोज़ी मारच़ातोर दोतिंङ ला ठीक लोहतो।

यशायाह भविष्यवक्ता ज़ि दि ला कुहषी ततो कि मीहच़ी मसीह रंङ साते नफरत लोहर। ऊई भविष्यवक्ता ज़ि कुईर कि मसीहू इच्चा साथी दोऊ खिलाप खड़े शुचि योतो। जर्कयाह भविष्यवक्ता ज़ि कुई दोऊ इच्चा साथी अई साथी दोरच़ी झांह लहज़िमी थल्जी दोऊ दोरच़ी मुलुतु निहज़ो साह सिक्का लेहपोतो। दिऊ अलावा, रे भविष्यवक्ता ज़ि कुईरे कि मीहच़ी मसीह बि सच़ि च़रपोर, दंङ दि ला कि दोऊ खमज़ेतु थल्जी छोलो ला योहर।

भविष्यवक्ता ज़ि दि ला कंड्रीर कि मसीह छना सिओतो। यशायाह ज़ि भविष्यवाणी लहरी कि मीहच़ी मसीहू टोईच़ी थूह लोहर, दोऊ मज़ाक उड़ाएपोर, दंङ दोबि घाह केओर। दोचि दोबि तिरच़ी च़रपोर दंङ दू महस टेहषी रंङ सिए योतो, धोंण तचेक कि दोई छल्ले गलत लहसी माह शोतो।

भविष्यवक्ता ज़ि दि ला कुईर कि मसीह ज़ि पाप माह लोहतो। दू सिध्द शोतो। पर दू दिऊ थल्जी सिओतो परमेश्वर दोबि ऊई मीहतु पापो थल्जी सज़ा रमतो। दोऊ सिमी रंङ मीहरे परमेश्वरा रंङ साते मेल- मिलाप लहज़िमी थल्जी योहचे शुचि योतो। झांह लेह परमेश्वरे जुंज़ा कि मसीह सिए जुंस।

भविष्यवक्ता ज़ि दि ला कंड्रीर कि परमेश्वर मसीह बि सिए दोतु बिचंङ ज़ि श्रींङमी लोहतो। दोई दि कंड्रा कि दि भत्ते खरकोई वायदा लहज़िमी परमेश्वरो योजना तोहई, ताकि दोई दू मीहतिंङ बचाके तरपोतो अंऊ दोचि दोऊ खिलाप पाप लहसी तातोर।

परमेश्वरे भविष्यवक्ता तु दोरच़ी मसीहू पाहठी महस गप्पा प्रकट लहरी, पर मसीह दू भविष्यवक्ता तु जीवना रिंङ अपेहला ला माह अति। दि भविष्यवाणी शुहबिमी थल 400 राह सालो थल, ठीक टेमा रिंङ, परमेश्वरे मसीह बि दि संसारा रिंङ च़रपोतो।