22. यूहन्ना ओ जन्म

तुहई कि टेमा रिंङ, परमेश्वरे एनोह भविष्यवक्ता तंङ गप्पा लहरी झांह लेह दोरे मीहतंङ साते गप्पा लहज़ातेर। पर दू टेम बेहच़ी यहच़ा पि राह साल इलज़ा तचेक दोई दोतंङ साते गप्पा माह लहरी। दोहपल परमेश्वरे जर्कयाह मिन्दु इच्चा भविष्यवक्ता तु कछंङ इच्चा स्वर्गदूत च़रति। जर्कयाह ए दोऊ मेच़ा एलीशिबा परमेश्वरो आदार लहज़ातेर। दोरे महसे यङषी इलज़ि तोईरे, दंङ दोऊ अरिला कटु माह शुई।

दू स्वर्गदूते जर्कयाह ओ हखा कुई, “कनु मेच़ो इच्चा योह ज़ेहक्पोतो। केई दोऊ मिन यूहन्ना केहच़ी च़रतु। परमेश्वरे दोबि पवित्र आत्मा रैं परिपूर्ण लेह च़रपोतो, दंङ यूहन्ना ज़ि मीहतिंङ मसीह ग्रहण लहज़िमी थल्जी तैयार लोहतो।” जर्कयाह ज़ि जबाब रांई, “गेह ए गिऊ मेच़ा कटु बि जन्म रंड्रीमी थल्जी महस यंङदे तोतोंई! गेह छना ञेंपोग कि केई हेले कुट्रातन?”

दू स्वर्गदूते जर्कयाह ओ हखा जबाब रांई, “कनु बाह ज़ि दि रूठे खबर हपिमी थल्जी गेह परमेश्वरो दोरच़ी च़रसी शुगाह। छना कुचे केई गिऊ टोईच़ी विशवास माह लहज़ातन, झांह लेह कटु ज़ेहक्पिमी मुक्का तचेक कांह कुट्रिमी जोगे माह शुनाह।” ध्वांए ए, जर्कयाह बि कुट्रिमी थल्जी तकलीफ शुहबी लेहती। दोहपल दू स्वर्गदूत जर्कयाहो कछंङ ज़ि अच़ा इलि। दोऊ थल, जर्कयाह चुंङा अच़ा अति दंङ दोऊ मेच़ा खोकटुंङ शुचि इलि।

अपेहल एलीशिबा त्रुई लाह ओ खोकटुंङ तोहई, दंङ दू ए स्वर्गदूत अचानाक ए एलीशिबा ओ नाता ओ टोईच़ी प्रकट शुचि इलि, अतु मिन मरियम तोहई। अतु मिन मरियम तोहई। मरियम ब्याह माह लहसी तोहई दंङ ब्याह लहज़िमी थल्जी यूसुफ मिंदंङ इच्चा गंङमी रंङ साते मंगनी शुचि तोहई। स्वर्गदूते कुहषी तोहई, “का खोकटुंङ शोन दंङ इच्चा योह बि जन्म रमोन। कनिंङ दोऊ मिन यीशु केट्री लेहपोतो। दू सर्व-शाक्तिमान परमेश्वरो योह शोतो दंङ हमेशा ओ थल्जी राज लोहतो।”

मरियमे जबाब रांई, “दि छना शुहबी तरपोतो, छना कुचे गेह ता ब्याह माह लहसी शुगाह?” दू स्वर्गदूते समझाएति, “पवित्र आत्मा कनु टोईच़ी अपतो, दंङ परमेश्वरो सामर्थ्य कनु टोईच़ी बंङज़तो। झांह लेह दू कटु पवित्र शोतो, दंङ दू परमेश्वरो योह शोतो।” अंऊ दू स्वर्गदूते कुहते दोऊ टोईच़ी मरियमे विशवास लहरी।

दि शुहबिमी थल, मरियम इलज़ी एलीशिबा रंङ साते दोआ इलि। छना ए मरियमे दोबि नमस्ते लहरी, एलीशिबा ओ कटु दोऊ अंदरेग त्रुलज़ि लेहती। दोतु थल्जी परमेश्वरे छिल्ला लहरी। दू पाहठी मेच़िमी रे इच्चा साते खुश शुचि इलिर। एलीशिबा रंङ साते षुमु लाह बंङज़िमी थल, मरियम चुंङा वापिस अच़ा अति।

दोऊ थल, एलीशिबा ज़ि इच्चा योह बि जन्म रांई। जर्कयाह ए एलीशिबा ज़ि दू कटु मिन यूहन्ना केहच़ी च़रति, छना कि दू स्वर्गदूते हुकुम रांहषी तते। दोहपल परमेश्वरे जर्कयाह बि कुट्रीमी जोगे लहरी। दंङ जर्कयाह ज़ि कुई, “परमेश्वरो स्तुति शुहबी जूंस, छना कुचे दोई एनोह मीहतु मदत लहज़िमी थल्जी हिद तंही! हे गिऊ योह, कांह सर्व-शाक्तिमान परमेश्वरो भविष्यवक्ता शोन। केई मीहतिंङ कमोन कि दोचि छना एनोह पापो थल्जी माफी लेहपच़ी तरपोर।”