23. यीशु जन्म

यूसुफ मिंदंङ इच्चा धर्मी मीह रंङ साते मरियमो मंगनी शुचि तोहई। अपेहल दोई दि रेड्रीरी कि मरियम खोकटुंङ तोह दंङ दोई ञेंहच़ाते कि दू कटु दोऊ माह शुह। पर, दोई मरियमा बि बदनाम लहज़ी माह जुंज़ाते, झांह लेह दोई दोऊ टोईच़ी दया लेह दोरंङ साते तलाक लेहपच़िमी सोचेक्ते, पर दिबे तुहई दोई ध्यां लोहतो, इच्चा स्वर्गदूते दोऊ मंङडुङ अंजे दोरंङ साते गप्पा लहरी।

दू स्वर्गदूते कुई, “हे यूसुफ, मरियमा बि केनोह मेच़ो रूपा रिंङ अंजे था बेऊ। दोऊ अंदरेग अंऊ कटु तोह दू पवित्र आत्मा ओ कटु शुह। दोई इच्चा योह बि जन्म जन्म रमतो। दोऊ मिन यीशु केऊ(अतु मतलब शोतो, ‘यहोवा ज़ि बचाएच़ी’), छना कुचे दोई मीहतिंङ दोतु पापो दोरच़ी बचाएपोतो।”

दोहथल यूसुफे मरियमा रंङ साते ब्याह लेह च़रति दंङ दोबि एनोह मेच़ा बणाके चुंङा रेंज़ा हति, पर अपेहल तचेक दोई दू कटु बि जन्म रैंई माह दू दोरंङ साते ठ्रोहका माह शुई।

अपेहल मरियमो लिक्पिमी टेम कछंङ पिचि इलि, दंङ दोई ए यूसुफे बैतलहमो हखा इबिमी थल्जी इच्चा लम्हें यात्रा लहरी। दोतिंङ दोरतिंङ इबिमी ए तोहई छना कुचे रोमी अधिकारी इस्राएला रिंङ बंङज़ा भत्ते मीहतु गिनती लहज़ी जुंज़ातेर। दोचि जुंज़ातेर कि भत्ते मीहरे दोरतिंङ योर अंऊर दोतु खानदान तोह। रज्ज़ा दाऊदो ओ जन्म बैतलहमा रिंङ शुई, दंङ दू मरियम ए यूसुफ झुल्लो खानदानो तोहई।

मरियम ए यूसुफ बैतलहम इलिर, पर दोरतिंङ घ्वांणार केट्रीमी ठाहरि ओ अलावा दोतु थल्जी बंङज़िमी छल्ले ठाहरि माह तोहई। दू ए ठाहरि तोहई अंऊर मरियमे एनोह कटु बि जन्म रांई। दोई दोबि चरनी रिंङ श्रोङिङ केई छना कुचे दोरतिंङ दोऊ थल्जी खमजेर माह तोहई। दोचि दोउ मिन यीशु केईरे।

दू रात, दोरतिंङ कछंङ ए रिहरिङ रै पोहालार एनोह त्रेंई तु रखवाली लहज़ातेर। अचानाक ए, इच्चा चमकदार स्वर्गदूत दोतु टोईच़ी प्रकट शुचि इलि, दंङ दोरे बेबा इलिर। दू स्वर्गदूते कुई, “बेईनि था, छना कुचे गिऊ दोरतिंङ केहतु थल्जी इच्चा रूठे खबर तोह। बैतलहमा रिंङ मसीह, स्वामी जन्म शुईत!”

ईलांई दंङ दू कटु खोज लंही, दंङ केहच़ी दूख मज़े तु बिचंङ ज़िलसा ए चरनी रिंङ केहषी तंङपोंई।” अचानक ए, सर्ग स्वर्गादूता तंङ पिङषा इलि। दोरे परमेश्वरो स्तुति लहज़ातेर। दोचि कुईरे, “भत्ते महिमा स्वर्गा रिंङ विराजमान प्रभु बि खोकसी जुंस। धरति रिंङ दू मीहतिंङ शान्ति खोकसी जुंस अतु दोई चिंद लहज़ा।

दोहपल स्वर्गदूत अच़ा इलिर। दोरे पोहाल ला एनोह त्रेंई तिंङ केट्रा कटु बि खंड्री अच़ा इलिर। युरनाह ए दोरे दू ठाहरि रिंङ पिचि इलिर अंऊर यीशु तोहई दंङ दोचि दोबि चरनी रिंङ केहषी तंङरिर, छना कि दू स्वर्गदूते कुहषी तते। दोरे महस खुश तोईरे। दोहपल दोरे पोहालार वापिस दोरतिंङ अच़ा इलिर अंऊर दोतु त्रेंईर तोईरे। दोचि छि ला रेड्रीर ए तंङातेर दू भत्ते तु थल्जी दोच़ि परमेश्वरो स्तुति लहज़ातेर।

पूर्वो रिंङ ऊईतार देशा रिंङ रे गंङमीरे तोईरे। दोचि कर पढेकातेर दंङ दोरे महस बुध्दिमान तोईरे। दोचि इच्चा शताह अरे कर सर्गा रिंङ तंङातेर। दोचि कुईर कि दिऊ मतलब शुह कि यहूदी तु रज्ज़ा ज़ेहकी इलज़ा। झांह लेह दोचि दू कटु खंड्रीमी थल्जी एनोह देशंङ ज़ि यात्रा लहज़िमी थल्जी फेंसला लहरिर। इच्चा लम्हें यात्रा ओ थल, दोरे बैतलहम अतिर दंङ दू चुंङ खोकतिर अंऊर यीशु ए दोऊ याह-बाह बंङज़ा तोईरे।

अपेहल दि गंङमी ज़ि यीशु बि दोऊ याहो कछंङ तंङरिर दंङ दोच़ि पुष्टु भारे बंङज़ा दोऊ आराधना लहरिर। दोच़ि यीशु बि कीमती भेंट रांईर। दोहथल दोरे चुंङा वापिस अच़ा अतिर।