24. यूहन्नो यीशु बि बपतिस्मा रंड्रा

एलीशिबा ए जकर्याहो योह यूहन्ना, मोह्ड़े शुचि इच्चा भविष्यवक्ता बणेंके इलि। दू बंणा रिंङ बंङज़ाते, दंङ बंणो यम्मा ए टिट्टार ज़ोआते, दंङ ऊंटों च़मो खमज़ेर बणाके लेहज़ाते।

महसे मीहरे यूहन्ना ओ गप्पा रेड्रीमी थल्जी बंणो हखा अच्च़ा इलिर। दोई दि कुचे प्रचार लहरी, “पच्शाताप लंहि, छना कुचे स्वर्गो राज कछंङ पिचि तोह।”

अपेहल मीहच़ी यूहन्ना ओ खबर रेड्रीर, दंङ दोतु बिचंङ ज़ि महसे ज़ि एनोह पापो दोरच़ी पश्चाताप लहरिर, दंङ यूहन्ना ज़ि दोतिंङ बपतिस्मा रांई। यूहन्ना बि खंड्रीमी थल्जी महस धार्मिक अगुवार ला अतिर, पर दोच़ि एनोह पापो पश्चाताप या अंगीकार माह लहरिर।

यूहन्ना ज़ि धार्मिक अगुवा तु हखा कुई, “हे जहरीले ओमड्रा रे! पश्चाताप लंहि दंङ केनातु व्यवहार लेहतेंई। परमेश्वरे हर दू बुट ट्रिकी च़रपोतो अंऊ रूठे फल माह हपा, दंङ दोई दोतिंङ मेह रिंङ केहच़ी च़रपोतो।” अंऊ भविष्यवक्ता ज़ि कुहषी तते यूहन्ना ज़ि दू पूरा लहरी, “खंणु, युरनाह ए गेह कनु तुईज़ि घैङों खबररंड्रा बि च़रपोग। अंऊ कनु थल्जी अम तैयार लोहतो।”

रे धार्मिक अगुवा ज़ि यूहन्ना ओ हखा रूहक्तिर कि छि दू मसीह शुह आ? यूहन्ना ज़ि जबाब रेंईर, “गेह मसीह माह शुगाह, पर दू गिऊ थले अपतो। दू धोंण महान तोह कि गेह दोऊ बुटो तस्मा युहपच़िमी जोगे माह तोग।”

ऊईरग ध्याड़ा, यीशु बपतिस्मा लेहपच़िमी थल्जी यूहन्ना ओ कछंङ अति। अपेहल यूहन्ना ज़ि दू तंङरी, दंङ दोई कुई, “खंणु! परमेश्वरो कुरच़ा अंऊ संसारो पाप कुरच़ी रेंज़ा शोतो।”

यूहन्ना ज़ि यीशु हखा कुई, “गेह कनिंङ बपतिस्मा रंड्रीमी जोगे माह तोहग। दिऊ बजाए केई गिहबी बपतिस्मा रोंऊ।” पर यीशु ज़ि कुई, “कनिंङ गिहबी बपतिस्मा रंड्री जूंशी तोह, छना कुचे कांह थल्जी सही कम दि ए शुह।” दोहथल यूहन्ना ज़ि यीशु बि बपतिस्मा रांई, धोंण तचेक कि यीशु ज़ि अपेहला पाप लहसी माह ताहरे।

बपतिस्मा रंड्रीमी थल अपेहल यीशु तिऊ दोरच़ी धकतेखा अति, दंङ परमेश्वरो आत्मा कबूतरो ठ्रोह प्रकट शुई दंङ श्रोङिंङ अंज़े दोऊ टोईच़ी बंङज़ा इलि। दू ए मुक्का, परमेश्वरे स्वर्गो दोरच़ी गप्पा लहरी। दोई कुई, “का गिऊ योह शुनाह। गेह करंङ साते दाह लहज़ातग, दंङ गेह करंङ साते महस खुश तोतोग।”

परमेश्वरे यूहन्ना ओ हखा कुहषी ताहरे, “पवित्र आत्मा षोड़िङ अंज़े अतुआ टोईच़ी बंङज़तो अपि केई बपतिस्मा रमोन।” दू ए परमेश्वरो योह शुह परमेश्वर इच्चा ए शुह। पर अपेहल यूहन्ना ज़ि यीशु बि बपतिस्मा रांई, दंङ दोई परमेश्वर बाह बि गप्पा लहज़ि रेड्रीरी, योह परमेश्वरा बि तंङरी, अंऊ कि यीशु शुह, दंङ दोई पवित्र आत्मा तंङरी।