26. यीशु ज़ि एनोह सेवा शुरू लहज़ा

शैतान ओ परिक्षा ओ इंकार लहज़िमी थल, यीशु यहच़ा व़पिस गलीलो ठाहरि रिंङ अच़ा अति। दि दू ए ठाहरि शुह अंऊर दू बंङज़ाते। पवित्र आत्मा ज़ि दोबि महस सामर्थ रंड्राते, दंङ यीशु इच्चा ठाहरि ए अई ठाहरि इबि लेहति दंङ मीहतिंङ शिक्षा रांई। भत्ते ज़ि दोऊ पाहठी रूठे गप्पा कुईरे।

यीशु नासरत नगरंङ अच़ा इलि। दि दू नगरी अंऊर दू एनोह बड़ेक्तर बेहच़ी बंङज़ते। सब्तो ओ ध्याड़ा रिंङ, दू आराधना लहज़िमी ठाहरि रिंङ इलि। अगुवा ज़ि दोबि यशायाह भविष्यवक्ता ओ खबरो इच्चा कताब रांई। दोचि जुंज़ातेर कि दोचि दू कताब पढ़ेक्पोर। दंङ दोचि दू कताब अलजे दोऊ इच्चा हिस्सा मीहतिंङ पढ़ाएक्ते।

यीशु ज़ि पढ़ेक्ते, “परमेश्वरे गिहबी एनोह आत्मा रांई ताकि गेह गरीबा तिंङ रूठे खबरो प्रचार लोहग। दोई गिहबी दिऊ थल्जी च़रति कि गेह कैदी तिंङ आज़ाद लोहग, काणे दोतिंङ टीरा रमोग, दंङ दोतिंङ छुटकारा रमोग अंऊ दोतिंङ ऊई मीहच़ी दड़ेके चरच़ातोर। दि दू टेम तोहई अपेहल परमेश्वर हेंदु टोईच़ी दाह लहज़ाते दंङ हेंदु मदत लोहतो।”

दोहथल यीशु बंङज़ा इलि। भत्ते मीहरे दोबि ध्याना रंङ साते खंड्रातेर। दोच़ि ञेंहच़ातेर कि पवित्रशास्त्रो अंऊ हिस्सा दोई एंतेग पढ़ेक्तेर दू मसीहू पाहठी तोहई। यीशु ज़ि कुई, “अंऊ गप्पा गेह केहतु थल्जी पढ़ेकातग, दू दि मुक्का शुहबी लेहकी तोह।” भत्ते मीहरे हैरान तोतोर। दोच़ि कुईरे, “छि दि यूसुफो योह माह शुह आ?”

दोहपल यीशु ज़ि कुई, “दि हेले शुह कि मीहच़ी इच्चा झांह ठ्रोह भविष्यवक्ता बि अपेहल ला स्वीकार माह लोहर अंऊ दोतु नगरंङ मोह्ड़े शुचि शोतो। एलिय्याह भविष्यवक्ता ओ मुक्का रिंङ, इस्राएला रिंङ महस रंणी मेच़िमी रे तोईरे। पर अपेहल साढे षुमु साल तचेक संदाण माह शुई दंङ परमेश्वरे एलिय्याह बि इस्राएला रिंङ अरिया रंणी मेच़िमी ओ मदत लहज़िमी थल्जी माह च़रति। दिऊ बजाए, दोई एलिय्याह बि ऊई देशो रंणी मेच़िमी ओ मदत लहज़िमी थल्जी च़रति।”

यीशु ज़ि कुट्री जारी तही, “दंङ एलीशा भविष्यवक्ता ओ मुक्का रिंङ, इस्राएला रिंङ महस मीहरे च़मो रोगी शुचि तोईरे। पर एलीशा ज़ि दोतु बिचंङ ज़ि अंऊला मीहबी ठीक माह लहरी। दोई सिर्फ इस्राएलो बैरी ओ सेनापति नामान बि ठीक लहरी।” पर अंऊ मीहरे यीशु बि रेड्रातेर दोरे यहूदी तोईरे। झांह लेह अपेहल दोच़ि दोबि दि कुट्री रेड्रीर दंङ दोरे दोऊ टोईच़ी रोहषेक्च़ा इलिर।

नासरतो मीहच़ी यीशु च़ुमनी च़रतिर दंङ दोबि आराधना ओ ठाहरि रिंङ ज़ि षोहकी धकतेखा रेंज़ा शिलिर। दोरे दोबि सच़िमी थल्जी इच्चा चट्टानो टोईच़ी रैंज़ा शिलिर। पर यीशु भीड़ो दोरच़ी हुंच़ा इलि दंङ नासरत नगर केट्रा अच़ा इलि।

दोहथल यीशु भत्ते गलीलो ठाहरि अच़ा इलि, दंङ इच्चा मोह्ड़े भीड़ दोऊ कछंङ अति। दोरे झांह ठ्रोह महस मीहतिंङ रैंज़ा हतिर अंऊ टेहच़ी ए अपंग तोईरे। दोतु बिचंङ ज़ि रे खंड्री, जोज़ि, रेड्री या कुट्री मरच़ातेर, दंङ यीशु ज़ि दोतिंङ ठीक लहरी।

दिऊ अलावा, झांह ठ्रोह महस मीहरे यीशु कछंङ अतिरे अंऊ दोतु अंदरेग मांजी आत्मा तोहई। यीशु ज़ि मांजी आत्मा बि दोतु अंदरेग ज़ि हुंच़िमी हुकुम रांई। दू मांजी आत्मा हाऊष रंड्री लेहती, “का परमेश्वरो योह शुनाह!” भीड़ो मीहरे हैरान तोईरे, दंङ दोच़ि परमेश्वरो स्तुति लहरिर।

दोहथल यीशु ज़ि सनी गङंमी तिंङ अंङे च़रति अंऊ दोतिंङ दोई एनोह प्रेरित कुई। दू प्रेरिता तंङ साते दोई यात्रा लहरी दंङ दोतु दोरच़ी शिक्षा ला खोकसिरी।