27. दया लहज़ा सामरी ओ कथा

इच्चा ध्याड़ा, यहूदी कानूनो इच्चा ञेंहच़ा मीह यीशु कछंङ अति। दोई भत्ते तिंङ दि कंड्रीमी तते कि यीशु गलत शिक्षा रंड्राते। दिऊ थल्जी दोई कुई, “हे गुरु, अनन्त जीवन खोकच़िमी थल्जी गेह छि लोहग?” यीशु ज़ि जबाब रांई, “परमेश्वरो कानूना रंङ छि चेहसी तोह?”

दू मीहच़ी कुई, “दोई कुट्रा कि केई केनोह परमेश्वरा रंङ साते केनोह भत्ते सेहम, प्राण, सामर्थ्य, ए बुध्दि रंङ साते दाह लोह। दंङ केनोह पड़ोसी रंङ साते केनोह बराबर दाह लोह।” यीशु ज़ि जबाब रांई, “का सही तोतोन! अगर केई झांह लोहन ता, दंङ कनिंङ अनन्त जीवन खोकसोतो।”

पर दि कानून मीहतिंङ कंड्रीमी तोहई कि दोतु जीवन श्रींङमी तरीका सही तोहई। झांह लेह दोई यीशु हखा रूहक्ती, “ठीक शुह, दंङ गिऊ पड़ोसी अरि शुह?”

यीशु ज़ि दू कानून ञेंहच़ा दोबि इच्चा कथा ओ दोरच़ी जबाब रांई। “इच्चा यहूदी मीह तोहई अंऊ इच्छा सड़को दोरच़ी यरूशलेमो दोरच़ी यरीहो यात्रा लहज़ाते।”

“पर रे डाकू ज़ि दू तंङी च़रतिर दंङ दोऊ टोईच़ी हमला लेह च़रतिर। दोच़ि दोऊ भत्ते धिर रैंज़ा शिलिर दंङ दोबि सच़िमी तचेक घाह केईरे। दोहपल दोरे अच़ा इलिर।”

“ध्वांए दोऊ थल, इच्चा यहूदी पुरोहित दू ए सड़के य्वाते। दू पुरोहिते दू मीहबी सड़का रिंङ तंङरि। अपेहल दोई दू तंङरी दू सड़को अई हासी अच़ा इलि। दोई दू मीह पूरे ठ्रोह अनदेखा लेह च़रति।”

“दोऊ थल थोड़े अरे टेमो थल, इच्चा लेबी दू सड़का रिंङ अति (लेबी यहूदी तु इच्चा गोत्र तोहई अंऊ दोच़ि मंदिरंङ पुरोहिता तुम दत लाहते।) दू लेबी ला सड़को अई अम ज़ि अच़ा इलि। दोई ला दू मीहबी अनदेखा लेह च़रति।”

“अई इच्चा मीह अंऊ दू सड़के अंदे दू सामरिया ओ इच्चा गंङमी तोहई।(सामरी ए यहूदी ज़ि इदि-अईदि रंङ साते नफरत लहज़ातेर। दू सामरी ज़ि सड़का रिंङ दू मीहबी तंङरी। दोई खंई कि दू यहूदी तोहई, तांला दोई दोऊ टोईच़ी दाह लहरी। दंङ दू दोऊ कछंङ इलि दंङ जख्मो टोईच़ी पट्टी लहरी।”

“दोहथल दू सामरी ज़ि दू मीहबी एनोह कारो टोईच़ी केहच़ी दंङ दोबि सड़को इच्चा सराय रि रेंज़ा शिलि। अंऊर दोई दोऊ सेवा लहज़ि जारी तही।”

ऊईरग, दू सामरी बि एनोह तुंखी यात्रा लेह ज़रूरी तोहई। दोई दू सरायो मीहबी थोड़े अरे ढबाह रांई। दोई दोऊ हखा कुई, “दि मीहू देखभाल लोहू। अगर दि ढबाहो बदला कनु छा ढबाह खर्च शुवाह दंङ गेह वापिस अंजे कांह भत्ते खर्चो भुगतान लेह च़रपोग।”

दोहथल यीशु ज़ि दू कानूनो ञेंहच़ा बि रूहक्ती, “केई छि सोचेक्च़ातन? दि षुमु मीहतु बिचंङ अरि दि मीहू पड़ोसी शुह अच़ि लूटेक्ते या तेंङाते?” दोई जबाब रांई, “दू ए अच़ि दोऊ टोईच़ी दया लाहते।” यीशु ज़ि दोऊ हखा कुई, “का इला दंङ ध्यांए लोह।”