28. साहुकार जबान अघिकारी

इच्चा ध्याड़ा, इच्चा साहुकार जबान अधिकारी ज़ि यीशु कछंङ दोऊ हखा रूहक्ति, “हे रूठे गुरु, अनन्त जीवन खोकच़िमी थल्जी गिहबी छि लेह जूंशी तोह?” यीशु ज़ि दोतु हखा कुई, “केई गिहबी ‘रूठे’ छिल्ले कुट्रातन? सिर्फ इच्चा ए रूठे तोह दंङ दू परमेश्वर शुह। पर अगर केई अनन्त जीवन खोकच़िमी तातन ता परमेश्वरो कानूनो भाषे लोह।”

“गिहबी छि-छि हुकुमो भाषे लहज़ि लेहपोतो?” दोई रूहक्ति यीशु ज़ि जबाब रांई, “हत्या था लोह। कुकम था लोह। चोरी था लोह। हप्सी था लोह। केनोह याह- बाह तु आदर लोह, दंङ केनोह पड़ोसी रंङ कनाह रंङ बराबर दाह लोह।”

पर दू जबान मीहच़ी कुई, “गेह घैङों बड़ेक्तर बेहच़ी दि भत्ते हुकुमो भाषे लहज़ातग। गिहबी हमेशा ओ थल्जी श्रींङमी बंङज़िमी थल्जी एंतेग ला छि लहज़िमी ज़रूरत तोह?” यीशु ज़ि दोऊ हखा खांई दंङ दोबि दाह लहरी।

यीशु ज़ि जबाब रांई, “अगर कांह सिध्द शुहबी जुंज़ातन ता दंङ इलज़े केनोह भत्ते धिर लंङे च़रतु दंङ ढबाह गरीबा तिंङ फाए च़रतु, दंङ कनिंङ स्वर्गा रिंङ ढबाह खोकसोतो। दोहपल अंज़े गिऊ थले शुचि इला।”

अंऊ यीशु ज़ि कुई अपेहल दोई जबान गंङमी दोरच़ी रेड्रातो दंङ महस दुखी शुचि इलि, छना कुचे दू महस साहुकार तोहई दंङ दोई एनोह भत्ते ढबाह रंड्री माह जुंज़ाते दू यहच़ा किरच़ा यीशु कछंङ अच़ा इलि।

दोहपल यीशु ज़ि एनोह चेलातु हखा कुई, “परमेश्वरो राजा रिंङ इबि महस खरे तोह! बेई, इच्चा साहुकार मीहू परमेश्वरो राजा रिंङ इबिमी हिसाबे अरिया ऊंठो चेपतु मिग तु बिचंङ ज़ि हुंच़ि योहच़ी शोतो।”

अंऊ यीशु ज़ि कुई अपेहल चेला ज़ि रेड्रीर दंङ दोरे हैरान तोईरे, “अगर दि झांह शोतो ता परमेश्वरे अरि बचाएपोतो?”

यीशु ज़ि चेला तु टोईच़ी नज़र लहरी दंङ कुई, “मीहतु थल्जी एनोह उध्दार लहज़ि असम्भव तोह। पर परमेश्वरो थल्जी छिल्ला लह़जि असम्भव माह।”

पतरसे यीशु हखा कुई, “ञेंरे चेलार हेंदु भत्ते धिर छोड़ेके कांह थले शुचि इलांई। दंङ ञेंहतु ईनाम छि शोतो?”

यीशु ज़ि जबाब रांई, “हर इच्चा मीह अच़ि गिऊ थल्जी एनोह चुंङ, न्वा, रिंङ, बाह, याह, कटुरे, या टंगा-ढबाह छोड़ेकी च़रचातो, दोई राह गुना महस खोकपोतो दंङ अनन्त जीवन ला खोकपोतो। पर महस अंऊ तुहई तोतोर दोरे थलका शोर, दंङ अंऊ थलका तोतोर दोरे तुहई शोर।”