29. निर्दयी परगरो कथा

इच्चा ध्याड़ा, पतरसे यीशु हखा कुई, “हे स्वामी, गिहबी घैङों न्वा बि अंयों फेरा माफ लहज़ि लेहपोतो अपेहल दू गिऊ खिलाप पाप लोहतो? छि निहज़ी फेरा तचेक?” यीशु ज़ि कुई, “निहज़ी फेरा मश्त, पर निहज़ी ओ षुमु निहज़ो साह फेरा तचेक!” दोऊ वहज़ा, यीशु ओ मतलब शुह कि हेंज़ि हमेशा माफ लेह जूंशी तोह। दोहपल यीशु ज़ि दि कथा कुई।

यीशु ज़ि कुई, “परमेश्वरो राज इच्चा रज्ज़ा ओ ठ्रोह तोह अंऊ एनोह परगरो दोरच़ी लेखा लेहपच़ी जुंज़ाते। दोऊ इच्चा परगर झुह्ट लाखो मज़दूरी ओ इच्चा मोह्ड़े कर्जदार तोहई।”

पर दू परगर एनोह कर्ज चुकाएति मरति, दिऊ थल्जी रज्ज़ा ज़ि कुई, “दिऊ कर्ज चुकाएच़िमी थल्जी दि गंङमी ए दिऊ टबरातिंङ परगरो रूपा रिंङ लंङें च़रतेंई।”

“दू परगरे रज्ज़ा ओ तुईज़ि एनोह पुष्टु भारे दह्च़ी कुई, ‘शबस गेरंङ साते ज़ह्की तोह, दंङ गेह घैङों कर्जो भत्ते रकमो भुगतान लेह च़रपोग।’ रज्ज़ा ज़ि परगरो टोईच़ी दया लहरी, झांह लेह दोई दोऊ भत्ते कर्ज माफ लेह च़रति दंङ दोबि इबि रांई।”

“पर अपेहल दू परगर रज्ज़ा ओ कछंङ ज़ि धकतेखा इलि, दंङ दोबि दोऊ इच्चा साथी परगर खोकसा इलि अंऊ दोऊ पि ला ओ मज़दूरी ओ कर्जदार तोहई। दू परगरे एनोह साथी परगर चुमनी च़रति दंङ कुई, ‘अंऊ कनु टोईच़ी गिऊ कर्ज तोह दोऊ भुगतान लौह!”

“दू साथी परगरे पुष्टु भारे बंङज़ा, ‘शबास गेरंङ साते ज़ह्की तोह, दंङ गेह घैङों कर्जो भत्ते भुगतान लेह चरपोग।’ पर दिऊ बजाए, दू परगरे एनोह साथी परगरा बि जेलरिंङ केहच़ी च़रति अपेहल तचेक कि दोई दू कर्जो भुगतान लेह माच़रति।”

“छि ला शुई दोबि ऊई परगरे तंङाते दंङ दोरे महस परेशान शुचि इलिर। दोरे रज्ज़ा ओ कछंङ इलिर दंङ भत्ते धिर कंङी च़रतिर।”

“रज्ज़ा ज़ि दू परगर बुलाके कुई, ‘हे मांज़ी परगर! गेह कनु कर्ज दिऊ थल्जी माफ लाहतग छना कुचे केई गिऊ हखा विनती लहसी तातेन। कनिंङ ला ध्वांए लेह जूंशी तोहई।’ रज्ज़ा धोंण रोहषेक्च़ा तोहई कि दोई दू मांज़ी परगर जेला रिंङ केहच़ी च़रति अपेहल तचेक कि एनोह भत्ते कर्जो यहच़ा भुगतान लेह माच़रति।”

दोहपल यीशु ज़ि कुई, “गिऊ बाह अंऊ स्वर्गा रिङ विराजमान तोह केहतु बिचंङ ज़ि हर इच्चा रंङ साते झांह ए लोहतो। अगर केहच़ी केनातु न्वा बि सेहमे माफ माह लहज़ातंई।”