30. यीशु ङा हज़ार मीहतिंङ बगत रंड्री

यीशु ज़ि एनोह प्रेरिता तिंङ प्रचार लहज़ि ए एनोह मीहतिंङ शिक्षा रंड्रीमी थल्जी महस श्ताह-श्ताह नगरंङ च़रति। अपेहल दोरे दोरतिंङ अतिर अंऊर यीशु तोहई दंङ दोई दोबि कंड्रीरी कि दोचि छि लहसी ताहरेर। दोहपल यीशु ज़ि दोबि झीलो नुरेची दोरंङ साते इच्चा शांत ठाहरि इलज़े थोड़े अरे टेम शांत बंङज़िमी थल्जी अता कुईरे। दंङ थल मुखंङ दोरे किश्ती ओ टोईच़ी अई तरफे अच़ा इलिरे।

पर दोरतिंङ महस मीहरे झांह ठ्रोह तोईरे अंऊ दोच़ि यीशु ए दोऊ चेला तिंङ किश्ती टोईच़ी इबि तंङरिर। दि मीहरे दोतु तुईज़ी अई झीलो इबिमी थल्जी झीलो मुखंङ-मुखंङ पोक्पी लेहतिर। दोहथल अपेहल यीशु ए चेलार पिच़ि इलिर ता मीहतु इच्चा मोह्ड़े झुंड़ मीहतिंङ रूहमज़ा दोरतिंङ तोहई।

दि भीड़ा रिंङ मेच़िमी तु ए कटुतु गिनती मेह ङा हज़ार बे महस गंङमी तोईरे। यीशु ज़ि दू मीहतु टोइच़ी महस तरस लहरी। यीशु थल्जी दू मीहरे पोहाल मेह त्रैंईतु ठ्रोह तोईरे। झांह लेह दोई दोतिंङ शिक्षा रैंई दंङ दोतु बिचंङ अंऊ टेहच़ी तोईरे दोतिंङ ठीक लहरी।

ध्याड़ा योहसिमी मुक्का, चेला ज़ि यीशु हखा कुईरे, “एंतेग ख्रा शुचि इलज़ा दंङ देहच़ी-न्वेच़ी छल्ले नगर माह तोहई। दि मीहतिंङ विदा लहज़ि ताकि दोरे इलज़े ज़ेईमी थल्जी छा हपोर।”

पर यीशु ज़ि चेला तु हखा कुई, “केहच़ी दोतिंङ ज़ेईमी थल्जी छा रांई!” दोच़ि जबाब रांई, “ञेंहच़ी झांह छना लेह तरपोंई? ञेंहतु दोरतिंङ सिर्फ ङा रोटी ए झुह्ट क्वाच़ी मह्छ तोह।”

यीशु ज़ि एनोह चेला तु हखा कुई कि दू भीड़ो मीहतु कछंङ 50-50 झुण्ड़ा रिंङ बंङज़िमी थल्जी कुंई।

दोहपल यीशु ज़ि ङा रोटी ए झुह्ट मह्छ कुरच़ा स्वर्गो हखा खांई, दंङ दू बगतो थल्जी परमेश्वरो धन्यवाद लहरी।

दोहथर यीशु ज़ि रोटी ए मह्छो खंणी लेह च़रति। दोई मीहतिंङ रंड्रीमी थल्जी एनोह चेला तिंङ दू खंणी रें च़रति। चेलार दू बगत फज़ि लेहतिर, दंङ दू योह्सिरी ए माह! दोरे भत्ते ज़ेई ते काह्षी इलिर।

दोऊ थल, चेला ज़ि दू बगत ठ्रोहका लहरिर अपि ज़े माहरतिरे दंङ दू सनी टोकरी पिङषिमी जोगे तोहई! दू भत्ते बगत दू ङा रोटी ए झुह्ट मह्छो दोरच़ी अंज़े तोहई।