31. यीशु तिऊ टोईज़ी जोज़ी

ङा हज़ार मीहतिंङ बगत रंड्रीमी थल, यीशु ज़ि एनोह चेला तु कीश्ती ओ टोईच़ी इबिमी थल्जी कुई। दोई दोतिंङ झीलो नुरेच़ि इबिमी थल्जी कुई अपेहल कि दू थोड़े अरे टेमो थल्जी दोरतिंङ ए बंङज़ा इलि। दोहथल चेलार अच़ा इलिर दंङ यीशु ज़ि भीड़ा बि विदा लहरी कि दोरे एनोह चुंङा अच़ा योर। दोऊ थल, यीशु प्रार्थना लहज़िमी थल इच्च़ा गोह टोईच़ी अच़ा इलि। दोरतिंङ दू इच्चा तोहई, दंङ दोई महस ख्रा तचेक प्रार्थना लहरी।

दू मुक्का, चेलार एनोह कीश्ती कुरच़ा रिहू हखा यवातेर, पर लन्न दोतु खिलाप यवाते। महस रात शुहबिमी थल ला दोरे झीलो बिचंङ पिच़ि इलिर।

दू मुक्का यीशु प्रार्थना लहज़ि योहच़ते दंङ एनोह चेला तु कछंङ इबि शुरू लहरी। दू किश्ती हखा इबिमी थल्जी तिऊ टोईच़ी जोज़ी लेहती।

दोहपल चेला ज़ि तु तंङरिर। दोरे बेवा इलिर छना कुचे दोच़ि सोचेकातेर कि दू अरिया राकक्ष शुह। यीशु ज़ि ञेंहच़ाते कि दोरे बेवा इलिर, झांह लेह दोई हाऊष रें कुई, “बेईनि था, दि गेह शुगाह।”

दोहपल पतरसे यीशु हखा कुई, “हे प्रभु, अगर दि कांह शुनाह ता गिहबी तिऊ टोईच़ी जोज़ा केनोह कछंङ अपिमी हुकुम रौंऊ।” यीशु ज़ि पतरसो हखा कुई, “अता!”

दोहथल पतरस कीश्ती ओ दोरच़ी तक्सा इलि दंङ यीशु कछंङ इबिमी थल्जी तिऊ टोईच़ी जोज़ी लेहति। पर थोड़े अरे ऊईतार इलज़ि, दोई एनोह टिरा यीशु ओ दोरच़ी किरच़ा च़रति दंङ छ्वाली खंड्री लेहति दंङ तेज़ लन्न बि महसूस लहज़ि लेहति।

दोहपल पतरस बेवा इलि दंङ ति रिंङ ठुमज़ि लेहति। दोई हाऊष, “हे प्रभु, गिहबी बचाएतु!” यीशु ज़ि एनोह गुह्ड़ तुंखा लहज़ि दोबि चुमनी च़रति। दोहपल दोई पतरसो हखा कुई, “कनु विशवास थोड़े तोह! कनु रक्षा लहज़िमी थल्जी केई गिऊ टोईच़ी भरोसा छिल्ले माह लहज़ातन?”

दोहपल यीशु किश्ती ओ टोईच़ी अच़ा इलि, ध्वांए लन्न ला बन्द शुचि इलि। ति शांत शुचि। चेलार हैरान शुचि इलिर यीशु तुईज़ि पुष्टु भारे बंङज़ा इलिर। दोच़ि दोऊ आराधना लहरिर दंङ दोऊ हखा कुई, “हेले कांह परमेश्वरो योह शुनाह।”