32. यीशु मांजी आत्मा रंङ ग्रस्त मीहबी ए इच्चा टेहच़ी मेच़िमी बि अईन लहज़ि

यीशु ए दोऊ चेलार एनोह किश्ती ओ ठाहरि अच़ा इलिर, अंऊर गिरासेनी मीहरे बंङज़ातेर। दोरे दू ठाहरि पिचि किश्ती ज़ि तक्सा इलिर।

दोरतिंङ इच्चा मीह तोहई अंऊ मांजी ग्रस्त तोहई।

दि मीह धोंण तकातवर तोहई कि अच़िला दोबि काबू लेह मारच़ातेर। महस फेरा मीहच़ी दोऊ गुह्ड़ ए कोज़ा षंङणी रें छुहसी ताहरेर, पर दोई दू थक्शी चरच़ाते।

दू मीह दू ठाहरि ओ कब्रा तु बिचंङ बंङज़ाते। दि मीह पूरा निरा ए पूरे रात हाऊष रंड्राते। दोई खमज़ेर माह लेहजाते। दंङ एनाह बि रहघ रैं घायल लहज़ाते।

दू मीह ज़रका रैं यीशु कछंङ अति दंङ दोऊ तुईज़ि पुष्टु भारे बंङज़ा इलि। दोहपल यीशु ज़ि दोऊ अंदरेग कि मांजी आत्मा रंङ साते गप्पा लहरी, “दि मीहू दोरच़ी धकतेखा हुच़ा अता!”

दू मांजी आत्मा ज़ोरे हाऊष रंड्री लेहति, “हे यीशु, परम प्रधान परमेश्वरो योह, कनिंङ गेरंङ साते छि कम? ज़ि शबस गिहबी तंग था लोहु!” दोहपल यीशु ज़ि दू आत्मा रंङ साते रूहक्च़ी लेहति, “कनु मिन छि शुह?” दोई जबाब रांई, “गिऊ मिन सेना शुह, छना कुचे ञेंरे महस तोतोंई।” (रोमी सेना तु बिचंङ ज़ि महस हज़ार इच्चा झुंड “सेना” शुहबी।)

दू मांजी आत्मा ज़ि यीशु हखा विनती लहरिर, “शबस ञेंतिंङ देरच़ी धकतेखा थाच़रतु!” दोर्तिंङ ए सुअरा तु इच्चा झुंड़ रवाक्च़ी लेहकी तोहई। झांह लेह दू मांजी आत्मा ज़ि यीशु हखा विनती लहरिर, “शबस ञेंतिंङ दू सुअरा तु बिचंङ चरच़ी च़रतु!” यीशु ज़ि कुई, “ठीक शुह, दोतु अंदरेग अच़ा इला!”

दंङ दू मांजी आत्मा दू मीहू दोरच़ी हुंच़ा दू सुआरा तु अंदरेग अच़ा इलिर। दू सुअरा ज़ि ज़रका रें इच्चा गोह दोरच़ी बेंडी रिंङ छ्वाह रें च़रतिर दंङ सिए इलिर। दू झुंड़ा रिंङ लगभग झुह्ट हज़ार सुअर तोईरे।

दोर्तिंङ दू सुआरा तु देखभाल लहज़ा मीहरे तोईरे। छिल्ला शुचि तोहई। अपेहल दोच़ि तंङरिर दंङ दोरे नगरो हखा पोक्शे इलिर। यीशु ज़ि छिह लहसी ताहरे दोर्तिंङ दोचि भत्ते दि कुहच़ी च़रतिर। दू नगरो मीहरे हुंच़ा अतिरे दंङ दू मीहबी खंईरे अंऊ दोऊ अंदरेग मांजी आत्मा तोहई। दू शांति रंङ, खमज़ेर लेहज़ा, दंङ इच्चा आम मीहू ठ्रोह गप्पा लहज़ा बंङज़ा तोहई।

दोरे मीहरे महस बेवा तोईरे दंङ दोचि यीशु बि अच़ा इबिमी थल्जी कुईरे। दोऊ थल यीशु किश्ती ऊ टोईच़ी अच़ा इलि। दू मीह अतु अंदरेग मांजी आत्मा तोहई। दोई यीशु रंङ साते इबिमी विनती लहरी।

पर यीशु ज़ि दोऊ हखा कुई, “मेस। गेह माह जुंज़ातग कि केई चुंङ इलज़ी भत्ते तु हखा दि कुह कि परमेश्वरे कनु थल्जी छि लहरी। दोतिंङ कंड्रु कि छना परमेश्वरे कनु टोईच़ी दया लहरी।”

झांह लेह दू मीह अच़ा इलि दंङ भत्ते तिंङ दिऊ पाहठी कंड्री लेहति अंऊ यीशु ज़ि दोऊ थल्जी लाहते। दोऊ गप्पा रेड्रा हर इच्चा मीह हैरान शुचि इलि।

यीशु झीलो नुरेच़ी अच़ा अति। दोऊ दोर्तिंङ पिपिमी थल, इच्चा मोह्ड़े भीड़ दोऊ कछंङ ठ्रोहका शुचि इलि दंङ दोबि तंग लहज़ि लेहति। दू भीड़ो बिचंङ इच्चा मेच़िमी तोहई अंऊ सनी साल बेहच़ी षुह्ई बहाएक्च़िमी बिमारी तोहई। दोई एनोह भत्ते ढबाह डाक्टरा तिंङ रें च़रचाते। ताकि दोचि दू ठीक लेह तरपोर पर दोऊ बिमारी ऊई ला खराब शुचि इलजि तोहई।

दोई रेड्री ताहरे कि यीशु ज़ि महस मीहतिंङ ठीक लहरी दंङ दोई सोचेक्ति कि, “गेह पक्का ए तोतोग कि अगर गेह यीशु खमज़रे ए तोह्कि च़रपोग, दंङ गेह ला ठीक शुचि योह!” झांह लेह दू यीशु थले शुचि इलि दंङ दोऊ खमज़ेर तोह्कि च़रति। छना ए दोई दू तोह्काते, षुह्ई ओ बहाएक्च़ी बंद शुचि इलि।

ध्वांए ए यीशु ज़ि ञेंई च़रति कि दोऊ दोरच़ी सामर्थ हुंच़ा इलि। झांह लेह थलका किरच़ा कुई, “गिहबी अच़ि थोकाते?” चेला ज़ि जबाब रांईर, “देर्तिंङ धोंण मीहच़ी कनु पिला हासी भीड़ लहसी तातोर, दंङ कनिंङ थोक्च़ी लेहकी तोतोर। दंङ केई छिल्ले रूहक्तिन कि गिहबी अच़ि थोकातो?”

दू मेच़िमी यीशु तुईज़ी महस डगेगी ए महस बेवा ते एनोह पुष्टु भारे बंङ़जिरी। दोहपल दोई कंड्रीरी कि दोई छि लाहतो, दंङ दिला कि दू ठीक शुचि इलज़ा। यीशु ज़ि दोऊ हखा कुई, “कनु विशवासे कांह ठीक लेह च़रति । शांति रंङ साते अच़ा इला।”