33. इच्चा जिम्मदारो कथा

इच्चा ध्याड़ा, यीशु झीलो मुंखङ तोहई। दू मीहतु इच्चा मोह्ड़े भीड़ा बि शिक्षा रंड्राते। दोबि रेड्रीमी थल्जी धोंण मीहरे अतिरे कि यीशु कछंङ दू भत्ते तंङ साते गप्पा लहज़िमी थल्जी ठाहरि ए माह केहषिरी। दू तिऊ बिचंङ खड़े इच्चा किश्ती ओ टोईच़ी अच़ा इलि। दोर्तिंङ बंङज़ा मीहतिंङ शिक्षा रंड्री लेहति।

यीशु ज़ि दोतिंङ दि कथा सुनाएति, “इच्चा ज़िम्मदार बेईज़ा ऐच़िमी थल्जी धकतेखा हुंच़िरी। अपेहल दू एनोह गुह्ट्र बेईज़ा छङज़ि लेहकी तोहई दंङ रेह बेईज़ा अमरिंङ दह्च़ी इलि। पर प्याज़ि अंजे दू बेईज़ा ज़े च़रतिर।”

“ऊई बेईज़ा षांङ ज़ड़े धरति ऊ टोईच़ी दह्च़े इलि अंऊर थोड़े अरे श्रोह तोहई। षांङ ज़ड़े धरतिऊ टोईच़ी दह्च़ी बेईज़ा महस युरनाह हुंच़ा इलि, पर दोऊ जड़ महस योंखा इबि मरति। अपेहल ऐके हुंच़िरी ट्रोत शुई दंङ दू पौधा कारच़ी इलि दंङ सिए इलि।”

“तांला ऊई बेईज़ा छ्वाक्तु बिचंङ दह्च़ी इलि। दू बेईज़ा ज़ि मोह्ड़े शुहबी शुरू लहरिर, पर छ्वाक्तु बिचंङ दू पथेक्सा इलि। झांह लेह छ्वाक्तु बिचंङ दह्च़ी बेईज़ा ओ दोरच़ी हुंसी पौधा ओ दोरच़ी फसल हुंच़ि मरति।”

“ऊई बेईज़ा रूठे धरतिऊ टोईच़ी दह्च़ी इलि। दू बेईज़ा मोह्ड़े शुचि इलि दंङ अंयों बेईज़ा एह्सी तातेंई दोतु बिचंङ ज़ि 30, 60, दंङ देर तचेक कि 100 गुना फसल रेंज़ा हतिर। अरिला परमेश्वरो थलेच़ि जोज़ी जुंज़ातोर, दोच़ि दि गप्पो टोईच़ी ध्यान तंहि अंऊ गेह कुट्रातग!”

दि कथा ए चेला तिंङ पज़ल लेह च़रति। झांह लेह यीशु ज़ि दिऊ उदाहरण रांई, “दू बेईज़ा परमेश्वरो बचन शुह। दू अम इच्चा झांह ठ्रोह मीह शुह अंऊ परमेश्वरो बचन सुनाएच़ा, पर दोबि समझेक्सा माह। दोहपल शैतान दोऊ दोरच़ी बचन रेंज़ा शिलज़ा। मतलब शैतान दोबि वबन समझेक्सिमी दोरच़ी ऊईतार तहज़ा।”

“दू षांङ ज़ड़े धरति इच्चा झांह ठ्रोह मीह शुह अच़ि परमेश्वरो बचन रेड्रा दंङ खुशी रंङ साते दोबि ग्रहण लहज़ा। पर अपेहल खरे टेम अपा, या अपेहल ऊई मीहच़ी दू तंग लहज़ातोर, दंङ दू मुक्का दू परमेश्वरो दोरच़ी श्ताह शुचि यवात। मतलब दू परमेश्वरो टोईच़ी विशवास लहज़ि बंद लेह च़रचा।”

“दू छ्वाक ज़डे धरति इच्चा झांह ठ्रोह मीह शुह अच़ि परमेश्वरो बचन रेड्रा। पर दोई महस गप्पा तु पाहठी चिंद लेह शुरू लेह च़रचा, दंङ दोई महस ढबाह कमाएच़िमी कोशिश लहज़ा, दंङ दोई महस चीज़ार खोकच़िमी उम्मीद लहज़ा। थोड़े टेमो थल, एंतेग दू परमेश्वरा बि दाह लहज़िमी जोगे माह। झांह लेह दोई परमेश्वरो बचनो दोरच़ी सिखेक्सा तोहई। कि दोई परमेश्वरो रंङ साते दाह लहज़ि मरपोतो। दू छवाओ पिलतु ठ्रोह तोह अंऊ दोई फसल रंड्री मरच़ा।”

“पर रूठे धरति दू मीह शुह अच़ि परमेश्वरो बचन रेड्रा, दंङ दोऊ टोईच़ी विशवास लहज़ा, दंङ महस फल पैदा लहज़ा।”