34. यीशु ज़ि ऊई कथा तु शिक्षा रंड्रा

यीशु ज़ि परमेश्वरो राजो पाहठी ए ऊई ला महस कथा सुनाएति। उदाहरणो थल्जी, दोई कुई, “परमेश्वरो राज इच्चा राई ओ बेईज़ा ठ्रोह तोह अच़ि एनोह रिह रिंङ बेईज़ा एहच़ी च़रचतो। केहच़ी ञेंहच़ातंई कि रांई ओ बेईज़ा भत्ते बेईज़ा भत्ते बे क्वाच़ि शुहबी।”

“पर अपेहल राई ओ बेईज़ा मोह्ड़े शुचि यवात दंङ दू बागो भत्ते बूटो बिचंङ ज़ि मोह्ड़े शुहबी, धोंण मोह्ड़े कि प्यारे ज़ि अंज़े दोऊ टोईच़ी आराम लेह तरच़ातोर।”

यीशु ज़ि इच्चा अई कथा कंड्रीरी, “परमेश्वरो राज खमीरो ठ्रोह तोह अतिंङ कुरच़ा इच्चा मेच़िमी फुकानो बिचंङ च़वाच़ी च़रचा दोहपल दू भत्ते फुकाना रिंङ चवासा यवात।”

“स्वर्गो राज दू खजाना ठ्रोह तोह अच़ि दू खजाना रिह रिंङ प्याके तातोर। दंङ दू अरिया ऊई मीहबी खोकसा यवात दंङ दोई दोबि खोकच़िमी महस सेहम तते। दोई दोबि यहच़ा फथेके च़रच़ते। दू खुशी रंङ साते धोंण पिङषा इलज़ि तोहई कि दोई इलजि भत्ते धिर लंङें च़रति ताकि दोई दू रिह चुमनी तरपोतो अंऊर दू खजाना तोहई।”

“स्वर्गो राज इच्चा महस कीमती ए शुध्द मुतिको ठ्रोह ला तोह। अपेहल अरिया मुतिको व्यापारी दोबि खोकच़े च़रचा दंङ दोई चुमज़िमी थल्जी एनोह भत्ते धिर लंङें च़रच़ा।”

दोर्तिंङ थोड़े अरे मीहरे तोईरे अच़ि दि सोचेक्च़ातेर कि परमेश्वर दोतिंङ दिऊ थल्जी स्वीकार लोहतो छना कुचे दोच़ि रूठे कम लहज़ातोर।दि मीहच़ी झांह ठ्रोह दोतिंङ तुच्छ ञेंहच़ातोर अंऊ दोच़ि दू रूठे कम माह लहज़ातेर। झांह लेह यीशु ज़ि दोतिंङ दू कथा सुनाएति: “झुह्ट गंङमी तोईरे झुल्ला ए प्रार्थना लहज़िमी थल्जी मंदिरंङ इलिर। दोकु बिचंङ इच्चा चुंगी लेहपच़ाड़ तोहई, दंङ अई संग दू इच्चा धार्मिक अगुवा तोहई।”

“दू धार्मिक अगुवा ज़ि झांह ठ्रोह प्रार्थना लहरी, ‘हे परमेश्वर, कनु धन्यवाद शुहबी जुंस कि ऊई मीहतु ठ्रोह, छना कि डाकू, अन्याय लहज़ा मीह, कुकम लहज़ा, या देर तचेक कि देरतिंङ हाज़िर दि चुंगी लेहपच़ाड़ो ठ्रोह इच्चा पापी माह शुहगा।”

“उदाहरणो थल्जी, गेह हर हप्ता रिंङ झुह्ट फेरा व्रत तहज़ातग, दंङ गेह गिहबी खोकसा ढबाहो ए समानो दसवां हिस्सा कनिंङ रंड्रातग।”

“पर दू चुंगी लेहपच़ाड़ दू धार्मिक अगुवा रंङ साते महस ऊईतार खड़े शुचि इलि। एनोह खेका स्वर्गो हखा टीरा ला खड़े माह लहरी। दोऊ बजाए, दोई एनोह तुब रें एनोह काह् कुड़ेषी लेहति दंङ प्रार्थना लहरी, ‘हे परमेश्वर, ज़ि शबस गिऊ टोईच़ी दया लोह छना कुचे गेह इच्चा पापी शुहगा।”

दोहथल यीशु ज़ि कुई, “गेह करंङ साते हेले कुट्रातग, परमेश्वरे दू चुंगी लेहपच़ाड़ो प्रार्थना रेड्रीरी दंङ दोबि धर्मी घोषित लेह च़रति। पर परमेश्वरे दू धार्मिक अगुवा ओ प्रार्थना पसन्द माह लहरी। परमेश्वरे हर इच्चा घमंडी ओ पुंज़ा योंखा लेह च़रपोतो, पर दोई हर इच्चा दू मीहबी आदर रमतो अच़ि एनाबि नह्की लहज़ा।”