35. दाह लहज़ा बाहो कथा

इच्चा ध्याड़ा, यीशु दू महस मीहतिंङ शिक्षा रंड्री लेहकी तोहई अंऊ दोबि रेड्रीमी थल्जी ठ्रोहका शुहसी तोईरे। दि मीहरे चुंगी लेहपच़ाड़ ए साते ऊई मीहरेला तोईरे अंऊ दोच़ि मूसा ओ कानूनो भाषे लहज़िमी कोशिश माह लहरिर।

रे धार्मिक अगुवा ज़ि खंईरे कि यीशु दि मीहतंङ साते इच्चा मित्रो ठ्रोह गप्पा लहज़ा। झांह लेह दोच़ि इदि-अईदि रंङ साते दि कुट्री शुरू लेह च़रतिर कि दोई गलत लहज़ा। यीशु ज़ि दोतिंङ गप्पा लहज़ि रेड्रीरी, झांह लेह दोई दोतिंङ दि कथा सुनाएति।

“इच्चा मीह तोहई तु झुह्ट योहरे तोईरे। क्वाच़ी दोई एनोह बाहो हखा कुई, ‘हे बाह, गिहबी एंतेग ए घैङों हिस्सा जुंगा! दंङ बाह ज़ि एनोह झुल्लो योह बिचंङ एनोह टंगा-ढबाह ए ज़मीनो बंटवारा लेह च़रति।”

“ध्वांए क्वाच़ि योह एनोह भत्ते धिर ठ्रोहका लहज़ि ऊई देशंङ अच़ा इलि दंङ पापी जीवनो थल्जी एनोह भत्ते टंगा-ढबाह बर्बाद लेह च़रति।”

“दोऊ थल, अंऊर क्वाच़ि योह तोहई। दू देशा रिंङ इच्चा मोह्ड़े अकाल अति, दंङ दोऊ कछंङ बगत चुमज़िमी थल्जी ढबाह माह तोहई। झांह लेह दोबि अंऊ कम खोकसिरी दू सुअर रूआक्च़िमी तोहई। दू धोंण दुखी ए योंई तोहई कि दोई सुअरा तु बगत ज़ेई जुंज़ाते।”

“थल मुखंङ, दू क्वाच़ि योह ज़ि एनोह हखा कुई, ‘गेह छि लहज़ातग? गिऊ बाहो भत्ते सेवका तु कछंङ ज़ेईमी थल्जी महस तोह, तांला गेह देरतिंङ योंई सिवातोग। गेह घैङों बाहो कछंङ वापिस यवातग दंङ घैङों बाहू इच्चा सेवक बणेक्च़िमी थल्जी दोऊ हखा विनती लोहग।”

“दंङ दि क्वाच़ि योह ज़ि वापिस एनोह बाहो चुंङा इबि शुरू लहरी। अपेहल कि दू एंतेग ऊईतार ए तोहई, दोऊ बाह ज़ि दू तंङी च़रति दंङ दोऊ टोईच़ी तरस लहरी। दू ज़रका रैं एनोह बाहो कछंङ अच़ा इलि दंङ दोरंङ साते गवक्षा दोबि ऊकु रैंई।”

“दू योह ज़ि कुई, ‘हे बाह, गेह परमेश्वर ए कनु खिलाप पाप लहतग। गेह कांह योह कुट्रीमी जोगे माह तोहग।”

“पर बाह ज़ि एनोह सेवको हखा कुई, ‘युरनाह इलज़ि भत्ते बे रूठे खमज़ेर रेंज़ा हतांई दंङ गिऊ योह बि रांई! दोऊ ब्रेमज़ारिंङ गुईथप ए दोऊ कोंज़ा रिंङ बूटार लगाएतुंई। दोहथल भत्ते बे मोह्ड़े रेंज़ा सच़ि च़रतंई ताकि हेंज़ि ज़ेई तरपोंई दंङ तयार मनाएपोंई, छना कुचे गिऊ योह सिए इलज़ि तोहई, एंतेग दू श्रींङी इलज़ा! दू योंङषा इलज़ि तोहई, पर एंतेग ञेंहच़ी दू खोकच़ी च़रचातंई।”

“झांह लेह मीहच़ी तयार मानाएच़ी शुरू लहरिर। रेह टेम बितेगी थल, मोह्ड़े योह रिह रिंङ कम लहज़ि अंजे तोहई। दोई गीत ए गरपिमी सग रेड्रीरी दंङ हैरान शुचि इलि कि दि छि शुहबी लेहकी तोह।”

“अपेहल मोह्ड़े योह बि पता लेहति कि दोच़ि दिऊ थल्जी तयार मानाएच़ी लेहकी तोतोर कि दोऊ न्वा चुंङा अंज़ा, दोबि महस रोहष अति दंङ तोंखा माह अति। दोऊ बाह ज़ि धकतेखा अंज़े दोरंङ साते तयार मानाएच़िमी थल्जी विनती लहरी, पर दोई इंकार लेह च़रति।”

“दू मोह्ड़े योह ज़ि एनोह बाहो हखा कुई, ‘दि भत्ते साल गेह कांह थल्जी रूठे रंङ कम लाहतग! अपेहल ला कांह गप्पो इंकार माहलग, दंङ केई अपेहल ला गिऊ थल्जी इच्चा क्वाच़ि ला छ्गड़ा ला माह रांईन ताकि गेह घैङों मित्रा तंङ साते गोज़ी तरपोग।”

“बाह ज़ि जबाब रांई, ‘हे गिऊ योह, कांह हमेशा गेरंङ साते तोईनि, दंङ छिल्ला गिऊ शुह दू भत्ते धिर कांह शुह। पर हेंदु थल्जी तयार मानाएच़ी सही शुह छना कुचे कांह न्वा सिए इलजि तोहई, पर एंतेग दू श्रीङीं तोह। दू योंहषा इलज़ि तोहई, पर एंतेग हेंज़ि दोबि खोकच़े च़रचातंई।”