36. लेहकसी

इच्चा ध्याड़ा, यीशु ज़ि एनोह षुमु चेलार, पतरस, याकूब, दंङ यूहन्ना बि एनाह रंङ साते रेंज़ा शिलि।(दि यूहन्ना मिन्दु चेला दू मीह माह शुह अच़ि यीशु बि बपतिस्मा रांदे।) दोरे प्रार्थना लहज़िमी थल्जी इच्चा गोह टोईच़ी अच़ा इलि।

अपेहल यीशु ज़ि प्रार्थना लहज़ाते दंङ दोऊ मोह्द ऐके ऊ ठ्रोह छंङसी तोहई। दोऊ खमज़ेर झांह ठ्रोह छंङसी तोह, छना कि धरतिऊ रिंङ छिल्ला धिर छंङसी माह तोहई।

दोहपल मूसा ए एलिय्याह भविष्यवक्ता प्रकट शुई। दि गंङमी रे धरति रिंङ सैकडों साल तुहई बंङज़ातेर। दोच़ि यीशु हखा दोऊ सिमी पाहठी गप्पा लहरिर, छना कुचे दू युरनाह ए यरूशलेमा रिंङ सिए योतो।

अपेहल मूसा ए एलिय्याह ज़ि यीशु हखा गप्पा लहज़ि लेहतिर दोहपल पतरसे यीशु हखा कुई, “ञेंहतु थल्जी देरतिंङ बंङज़ी रूठे तोह। ञेंहच़ी षुमु मंडपं बणाएपोंई, इच्चा कनु थल्जी, इच्चा मूसा ओ थल्जी, दंङ इच्चा एलिय्याहो थल्जी।” पर पतरसे माह ञेंहच़ाते कि दोई छि लहज़ा।

अपेहल पतरसे गप्पा लहज़ाते, दंङ इच्चा चमकदार डूह योंखा अति दंङ दोतु टोईच़ी अच़ा अति। दंङ दोच़ि डूह बिचंङ ज़ि इच्चा सग रेड्रीरी। दोई कुई, “दि गिऊ योह शुह अतंङ साते गेह दाह लहज़ातग। गेह देरंङ साते महस खुश तोतोग। दोऊ रेड्रुंई” दोरे षुमला चेला वेबा इलिर दंङ धरतिऊ टोईच़ी बंङज़ा इलिर।

दोहपल यीशु ज़ि दोतिंङ थोह्की च़रति, “बेईनि था। खड़े शुंई।” दोहपल दोच़ि पिला हासी खांईरे, दंङ छिल्ला दोर्तिंङ तोहई दू सिर्फ यीशु तोहई।

यीशु ए दू षुमु चेलार दू गोह टोईच़ी योंखा अच़ा अतिर। अपेहल दोच़ि यीशु हखा कुईर, “एंतेग छि देर शुई दिऊ ज़िकर थालंहि। गेह युरनाह ए सिए योग दंङ यहच़ा श्रीङीं योग। दोऊ थल, केहच़ी मीहतिंङ कंड्री तरपोंई।”