37. यीशु लाज़र बि श्रींङमी लहज़ि

लाज़र मिन्दु इच्चा मीह तोहई। दोऊ झुह्ट रिंङ तोईरे अतु मिन मरियम ए मार्था तोहई। दोरे भत्तेर यीशु महस रूठे गंङमी रे तोईरे। इच्चा ध्याड़ा, अच़िया यीशु बि कंड्रिरी कि लाज़र महस टेहच़ी तोह। अपेहल यीशु ज़ि रेड्री ता दोई कुई, “दि बीमारी लाज़र ओ सिमी रंङ योहसोतो माह। दोऊ बजाए, दि मीहतिंङ परमेश्वरो आदर लहज़िमी थल्जी प्रेरित लोहतो।”

यीशु ज़ि एनोह मित्रा तंङ साते महस दाह लहज़ाते, पर अंऊर दू तोहई दोर्तिंङ दोई झुह्ट ध्याड़ा तचेक रूहमज़िरी कि। दू झुह्ट ध्याड़ो थल, दोई एनोह चेला तु हखा कुई, “अतांई वापिस यहूदिया ओ हखा योंई।” चेला ज़ि जबाब रांई, “पर हे गुरु, एंतेग रेह टेमा रिंङ तचेक दोरकी मीहच़ी गिहबी सच़ि जुंज़ाते!” यीशु ज़ि कुई, “ञेंहतु मित्र लाज़र इमरिंङ अच़ा ईलज़ा, दंङ दोबि ईमरिंङ ज़ि चेहपि लेह तातग।”

यीशु चेला ज़ि जबाब रांईर, “हे प्रभु, अगर लाज़र ईमरिंङ यवात, दंङ दू ठीक शुचि योतो।” दोहपल यीशु ज़ि दोऊ हखा साफ-साफ कुहच़ी च़रति, “लाज़र सिए इलज़ि तोह। गेह खुश तोतोग कि गेह दोर्तिंङ माह तोईगा, ताकि केहच़ी गिऊ टोईच़ी विशवास लेह तरपोंई।”

अपेहल यीशु लाज़रो नगरंङ पिच़ि इलि दंङ लाज़रा बि सि पि ध्याड़ा शुचि इलज़ि तोहई। मार्था यीशु रंङ साते दोह्ई धकतेखा अति दंङ कुई, “हे प्रभु, अगर कांह देरतिंङ शुचंङ ता गिऊ युंङ माह सिए तोहई। पर गेह विशवास लहज़ातग कि छिल्ला धिर केई परमेश्वरो दोरच़ी पेट्रतन दोई कनिंङ रमतो।”

यीशु ज़ि जबाब, “पुनरूत्थान ए जीवन गेह शुगाह! अच़िला गिऊ टोईच़ी विशवास लोहतो अगर दू सि ला योतो तांला श्रीङंमोतो। अच़िला गिऊ टोईच़ी विशवास लहज़ा दू अपेहल ला माह सिओतो। छि केई दिऊ टोईच़ी विशवास लहज़ातन आ?” मार्था ज़ि जबाब रांई, “हे प्रभु, गेह विशवास लहज़ातग कि कांह परमेश्वरो योह मसीह शुनाह।”

दोहपल मरियम अति। दोई यीशु कोंज़ा रिंङ दह्च़ी कुई, “हे प्रभु, अगर कांह देर शुचंङ ता गिऊ न्वा माह सि तोहई।” यीशु ज़ि दोऊ हखा कुई, “केहच़ी लाज़र बि अंऊर केहषी तातंई?” दोच़ि दोबि कंड्रीरी, “कब्रो ओ अंदरेग! अता खंज़ि च़रतु।” दोपहल यीशु क्रपि लेहति।

दू कब्र इच्चा गुफा तोहई अतु पेतंङ रिंङ इच्चा रह्घ केहषी तोहई। अपेहल यीशु कब्रो कछंङ पिचा ता दंङ दोई कुई, “रह्घ ऐखा लेह च़रतु।” पर मार्था ज़ि कुई, “दोबि सि षुमु ध्याड़ा शुचि इलज़ा। दोऊ दोरच़ी बास अपि शोतो।”

यीशु ज़ि जबाब रांई, “छि गेह करंङ साते माह कुहगा कि अगर केई गिऊ टोईच़ी विशवास लोहन ता परमेश्वरो सामर्थ खमोन?” झांह लेह दोच़ि रह्घ ऐखा लेह च़रतिर।

दोहपल यीशु ज़ि स्वर्गो हखा खांई दंङ कुई, “हे बाह, गिऊ रेड्रीमी थल्जी गेह कनु धन्यवाद लहज़ातग कि केई हमेशा गिऊ रेड्रातन, पर गेह देर दि खड़े दि भत्ते मीहतु मदत लहज़िमी थल्जी कुट्रातग ताकि दिच़ि विशवास लोहर कि केई गिहबी च़रसी शुनाह।” दोहपल यीशु ज़ि हाऊष रांई, “हे लाज़र, धकतेखा हुंच़ा अता!”

दंङ: लाज़र धकतेखा हुंच़ा अति! दू एंतेग ला कफन ज़िलसा तोहई। यीशु ज़ि दोऊ हखा कुई, “दि कफन हुंबिमी थल्जी दोऊ मदत लंहि दंङ दोबि आज़ाद लंहि।” दि चमत्कारो बहज़ा ज़ि महस यहूदी ज़ि यीशु टोईच़ी विशवास लहरिर।

पर यहूदी तु धार्मिक अगुवा यीशु रंङ साते जलन लहज़ि लेहतिर, झांह लेह दोरे योजना बणाएच़िमी थल्जी इच्चा साते ठ्रोहका शुचि इलिर कि छना यीशु ए लाज़रा बि सच़ि च़रपोंई।