38. यीशु बि चुमज़ि लहज़ि

हर साल, यहूदी मीहरे फसहो तयार मानाएक्च़ातेर। दि, दिऊ पाहठी इच्चा तयार तोहई कि महस साल सदी तुहई परमेश्वर एनोह मीहतिंङ मिस्रो गुलामी ओ दोरच़ी आज़ाद लहरी। लगभग षुमु सालो थल यीशु ज़ि प्रचार लहज़ि ए शिक्षा रंड्री शुरू लहरी। यीशु ज़ि एनोह चेला तु हखा कुई कि दू दोतंङ साते यरूशलेमा रिंङ फसहो तयार मानाएच़ी जुंज़ा, दंङ दि ला दू दोर्तिंङ सच़ि चरपोर।

यीशु चेला तु बिचंङ ज़ि इच्चा यहूदा मिन्दु मीह तोहई। यहूदा प्रेरिता तु ढबाहो थैली तहज़ा ठ्रोह तोहई, पर हमेशा दोई दू थैली ओ अंदरेग ज़ि ढबाह हुंच़ि च़रचाते। यीशु ए चेला तु यरूशलेमा रिंङ पिपिमी थल यहूदा यहूदी अगुवा तु कछंङ इलि। दोई ढबाहो बदला रिंङ यीशु बि दोतिंङ चुमज़िमी वायदा लहरी। दोई ञेंहच़ाते कि यहूदी अगुवा ज़ि दि स्वीकार माह लहज़ातेर कि यीशु ए मसीह शुह। दोबि पता तोहई कि दोच़ि दू सच़िमी तातोर।

पुरोहितो कुट्रीमी रंङ साते यहूदी अगुवा ज़ि यीशु बि दोतु गुह्ट्र चुमज़िमी थल्जी यहूदा बि निहज़ो सा मुलुतु टंगा रांईर। दि झांह ठ्रोह शुई छना कि भविष्यवक्ता ज़ि कुहषी तोहई कि शोतो। यहूदा मानेकी इलि दंङ ढबाह कुरच़ा अच़ा इलि। दू यीशु बि दोतिंङ चुमज़िमी लहज़िमी थल्जी मौका खंड्री लेहति।

यरूशलेमा रिंङ, यीशु ज़ि एनोह चेला तंङ साते फसह ओ तयार मानाएति। फसहो बगतो मुक्का, यीशु ज़ि रोटी लेहपच़ी थक्शी च़रति। दोई कुई, “दि रोटी ज़ंई। दि गिऊ फुक शुह अंऊ गेह केहतु थल्जी रंड्रातग। दिबि गिऊ हिदा रिंङ लोहवा लंहि।” झांह ठ्रोह, यीशु ज़ि कुई दू दोतु थल्जी सिए योतो, मतलब दोतु थल्जी दोई एनोह बलि चढाएपोतो।

दोहथल यीशु ज़ि इच्चा दाखरसो बट्रड़ा गुह्ड़िङ लहरी दंङ कुई, “दिबि तुंङी च़रतुंई। दि खरकोई वायदा ओ गिऊ षुह्ई शुह अंऊ कि गेह थोरच़िमी तातग ताकि परमेश्वरे केहतु पाप माफ लोहतो। हर बार दि तुंङमिमी मुक्का गिऊ हिदा रिंङ झांह लोहवा लंहि अंऊ कि गेह एंतेग लहज़ातग।”

दोहपल यीशु ज़ि एनोह चेला तु हखा कुई, “केहतु बिचंङ ज़ि इच्चा मीह ज़ि गेह चुमज़ि लोहतो।” चेलार हैरान शुचि इलिर, दंङ यीशु बि रूहक्च़ी लेहतिर कि अच़ि झांह ठ्रोह कम लोहतो। यीशु ज़ि कुई, “गिहबी चुमज़ाड़ मीह दू शुह अपि गेह दि रोटी ओ टुकड़ा रमोग।” दोहपल दोई दू रोटी यहूदा बि रैं च़रति।

दू रोटी लेहपच़िमी थल, यहूदा ओ अंदरेग शैतान अच़ा अति। यहूदा दोरच़ी हुंच़ा यीशु बि गिरफ्तार लहज़िमी थल्जी यहूदी अगुवा तु मदत लहज़िमी थल्जी अच़ा इलि। दू रातो टेमो तोहई।

बगत ज़ेईमी थल, यीशु ए दोऊ चेलार जैतून गोह टोईच़ी अच़ा इलिर। यीशु ज़ि कुई, “केहच़ी भत्ते ज़ि तोग रात गेह छोड़ेकी च़रपोंई, ‘गेह पौहाल बि घाह केहुगा दंङ भत्ते त्रैंईरे तितर-बितर शुचि योर।’”

पतरसे जबाब रांई, “भले ए भत्ते ज़ि कनिंङ छोड़ेकी च़रपोर, गेह माह छोड़ेक्पोग!” दोहपल यीशु ज़ि पतरसो हखा कुई, “शैताने केतिंङ भत्ते तिंङ शिलज़ी जुंज़ा, पर हे पतरस, गेह कनु थल्जी प्रार्थना लहज़ातग कि का विशवासो दोरच़ी थलका शुहबी मेस। तांला, तोग कि रात, कुकड़ो हाऊष रंड्रीमी तुहई केई षुमु फेरा गिऊ इंकार लोहन कि केई गेह ञेंन ए माह।”

पतरस ए दोहपल यीशु हखा कुई, “अगर गेह सिए ला योग, गेह तांला कांह इंकार माह लहग!” ऊई चेला ज़ि ला दि ए कुईरे।

दोहपल यीशु एनोह चेला तंङ साते गतसमनी ठाहरि रिंङ अच़ा इलि। यीशु ज़ि एनोह चेला तंङ प्रार्थना लहज़िमी थल्जी कुई ताकि शैताने दोतु परीक्षा लेह माह जूंस। दोहपल यीशु एनाह प्रार्थना लहज़ि अच़ा इलि।

यीशु ज़ि षुमु फेरा प्रार्थना लहरी, “हे गिऊ बाह, अगर शुचि तरपोतो ता ज़ि शबस दि दुखो बट्रड़ा तुंङमिमी थल्जी गिहबी थारोंऊ। पर अगर मीहतु पाप माफ लहज़िमी थल्जी ऊई छल्ले अम माह, दंङ कनु ए हिटी पूरा शुहबी जूंस।” यीशु महस बैचेन तोहई दंङ दोऊ त्रुह्स षुह्ई ओ ठ्रोह तोहई। दोबि सामर्थ रंड्रीमी थल्जी परमेश्वरे इच्चा स्वर्गदूता बि च़रति।

हर फेरा प्रार्थना ओ थल, यीशु एनोह चेला तु कछंङ वापिस अति, पर दोरे ईमरिंङ अच़ा इलज़ि तोईरे। अंऊ मुक्का यीशु षुमु फेरा वापिस अति ता यीशु ज़ि कुई, “खड़े शुंई! गिहबी चुमज़ाड़ देर्तिंङ तोह।”

यहूदी अगुवार, ए सैनिक, दंङ इच्चा मोह्ड़े भीड़ा रंङ साते यहूदा अति। दोच़ि तलवार ए लाठी कुरच़ि तारेर। यहूदा ज़ि यीशु कछंङ अंज़े दोऊ हखा कुई, “हे गुरु, नमस्कार,” दंङ दोबि इच्चा ऊकू रें च़रति। दोई यीशु बि चुमज़िमी तुहई यहूदी अगुवा तिंङ कुहषी ताहरे कि दोई अपि ऊकू रमतो दू ए यीशु शुह दिऊ थल्जी दोई यीशु बि ऊकू रांई। दोहपल यीशु ज़ि कुई, “हे यहूदा, छि केई इच्चा ऊकू रंङ साते गिहबी चुमज़ि लोहन आ?”

अपेहल दोरे सैनिक यीशु बि चुमज़ातेर, दंङ पतरसे एनोह तलवार हुंति दंङ महा पुरोहितो इच्चा सेवको रेहट्रा ट्रिकी च़रति। यीशु ज़ि कुई, “तलवार ऐखा लोह! गेह घैङों बाह रंङ साते घैङों बचाबो थल्जी स्वर्गदूता तु इच्चा सेना ओ थल्जी विनती लेह तरपोग। पर गिहबी घैङों बाहो गप्पा रेड्री तोह।” दोहपल यीशु ज़ि दू मीहू रेह्ट्रा ठीक लेह च़रति। दोहपल भत्ते चेलार पोक्शे इलिर।