39. यीशु टोईच़ी मुकद्दमा

एंतेग दू आधा रातो टेम तोहई। दोरे सैनिकार यीशु बि मोह्ड़े पुरोहितो चुंङ रैंज़ा हतिर, छना कुचे दोई यीशु हखा सवाल लेह जुंज़ाते। पतरसे ऊईतारे दोतु पिछा लहजाते। अपेहल सैनिक यीशु बि चुंङ रैंज़ा शिलिर, दंङ पतरस धकते बंङज़ा मेह ट्रोई लेहति।

चुंङ कि अंदरेग, यहूदी अगुवा ज़ि यीशु टोईच़ी मुकद्दमा लहरिर। दू दोऊ खिलाप हप्सी गप्पा कुट्रिमी थल्जी महसे हप्सी गवाह रेंज़ा हतिर। हालांकि, दोतु गप्पार ईदि-अईदि रंङ मेल माह तोईरे, झांह यहूदी अगुवा ज़ि दि साबित लेह मरतिरे कि दोरे दू अंऊ आ गप्पो दोषी तोह। यीशु ज़ि छल्ले माह कुई।

थल मुखंङ, मोह्ड़े पुरोहिते सीधा यीशु हखा खांई दंङ कुई, “ञेंतिंङ कंड्रु कि काह ए श्रींङी परमेश्वरो योह मसीह शुनाह?”

यीशु ज़ि कुई, “गेह शुगाह, दंङ केहच़ी गिहबी परमेश्वरा रंङ साते बंङज़ा ए दंङ स्वर्गो दोरच़ी अपि ला खामोंई।” मोह्ड़े पुरोहिते एनोह खमज़ेर ट्रव्लज़े च़रति छना कुचे अंऊ यीशु ज़ि कुहषी ताहरे दोऊ टोईच़ी दोबि महस रोहष अपि लेहकी तोहई। दू ऊई अगुवा तु टोईच़ी रोह्षेक्च़ी लेहति, “हेंदिंङ दि कंड्रिमी थल्जी अतुआ गवाहो ज़रूरत माह कि दि मीह छि लहसी शुह! केहच़ी केनाच़ि ए दोबि दि कुट्री रेड्री च़रचातंई कि दू परमेश्वरो योह शुह। दोऊ पाहठी केहतु छि फेंसला तोह?”

भत्ते यहूदी अगुवा ज़ि मोह्ड़े पुरोहिता तिंङ जबाब रांई, “दू सिमी जोगे तोह!” दोहपल दोच़ि यीशु टिरो टोईच़ी पट्टी केहच़ी च़रतिर, दोई टोईच़ी थूह लहरिर, दोबि घाह केईरे, दंङ दोऊ मज़ाल उड़ाएतिर।

दंङ पतरस, अपेहल दू चुंङों धकते रूह्मज़ा तोहई। दोहपल इच्चा परगर मेच़िमी कटु दू तंङे च़रति। दंङ दोऊ हखा कुई, “दिला यीशु रंङ साते तोहई!” पतरसे इंकार लेह च़रति। दोऊ थल, अई इच्चा मेच़िमी ला झांह ठ्रोह ए कुई, दंङ पतरसे यहच़ा इंकार लेह च़रति। थल मुखंङ, रे मीहच़ी कुईर, “ञेंहच़ी ञेंहच़ातंई कि कांह यीशु रंङ साते तोहई छना कुचे केरे गलीलो शुंई।”

दोहपल पतसरे कुई, “अगर गेह दि मीहबी ञेंहच़ातग ता परमेश्वरे गिहबी श्राप रमतो!” ध्वांए पतरसो झांह ठ्रोह वायदा लहज़िमी थल, इच्चा कुकड़े हाऊष रांई। यीशु ज़ि थलका किरच़ी पतरसो हखा खांई।

पतरस दोरच़ी अच़ा इलि दंङ ज़ोरे-ज़ोरे क्रपि लेहति। दू ए मुक्का, यीशु बि चुमज़ाड़ यहूदा ज़ि खांई कि यहूदी अगुवा ज़ि यीशु बि मौतो सज़ा रांई। यहूदा महस दुखी शुचि इलि दंङ इलज़े एनाबि सच़ि च़रति।

दू देशो अधिकारी पिलातुस तोहई। दोई रोमो थल्जी कम लहज़ाते। यहूदी अगुवार यीशु बि दोऊ कछंङ रैंज़ा हतिर। दोच़ि जुंज़ातेर कि पिलातुसे दोबि मौतो सज़ा रांई दंङ दोबि सच़ि च़रपोतो। दोहपल पिलातुसे यीशु हखा रूहक्ति, “छि कांह यहूदी तु रज्ज़ा शुह?”

यीशु ज़ि जबाब रांई, “केई हेले कुट्रातन। पर गिऊ राज देर धरति रिंङ माह शुह। अगर शुचंङ ता गिऊ परगरा ज़ि गिऊ थल्जी लड़ाई लंहियां। गेह धरतिऊ टोईच़ी परमेश्वरो पाहठी सच्चाई कंड्रिमी थल्जी अंज़े शुगाह। हर इच्चा मीह अंऊ दोई सच्चाई रंङ साते दाह लहज़ा दोई गिऊ रेड्रा।” पिलातुसे कुई, “दंङ सच्चाई छि शुह?”

यीशु रंङ साते गप्पा लहज़िमी थल, पिलातुसे धकते भीड़ो कछंङ इलज़े कुई, “गेह झांह ठ्रोह छल्ले वहज़ा माह खोकच़ातग कि दि मीह सच़िमी जोगे तोह।” पर यहूदी अगुवा ज़ि ए भीड़े हाऊष रैं कुई, “दोबि क्रूसो टोईच़ी चढ़ाके च़रतु!” पिलातुसे जबाब रांई, “दोई छल्ले गलत लहसी माह शुह।” पर दोरे महसे ज़ोरे हाऊष रंड्री लेहति। दोहपल पिलातुसे षुमु फेरा कुई, “दू दोषी माह!”

पिलातुस बेवा इलि कि दू भीड़े दंगा शुरू लेह च़रपोर, झांह लेह दू एनोह सैनिकातु दोरच़ी यीशु बि क्रूसो टोईच़ी चढ़ाएच़ी थल्जी राजी शुच़ि इलि। रोमी सैनिका ज़ि यीशु बि कोड़ार लगाएति, दंङ दोबि राजसी खमज़ेर रांईर, दंङ दोऊ पुंजो टोईच़ी कांड़ो मुकुट केहच़ी च़रतिर। दोहपल दि कुट्रा दोऊ मज़ाक उड़ाएतिर, “खांई दि यहूदी तु रज्ज़ा शुह!”