40. यीशु बि क्रुसो टोईच़ी चढ़ाएच़ी

यीशु ठट्टा लहज़िमी थल, सैनिक दोबि क्रूसो टोईच़ी चढ़ाएच़मी थल्जी रैंज़ा शिलिर। दोच़ि दू क्रूस ला दोऊ दोरच़ी उठाएच़ी लहरिर अंऊ दोऊ टोईच़ी दोबि सच़िमी ताहरेर।

दोरे सैनिक यीशु बि दू ठाहरि रैंज़ा शिलिर अपि “खोपड़ी” ओ ठाहरि ला कुट्री दंङ दोऊ गुह्ट्र ए कोंज़ा बि क्रूसा रिंङ तिरच़ी च़रतिर। पर यीशु कुई, “हे बाह, दितिंङ माफ लोह, छना कुचे दिच़ि माह ञेंहच़ातेर कि दिच़ि छि लहज़ातोर।” दोच़ि इच्चा तख्ती ला दोऊ पुंज़ो टोईच़ी केहच़ी च़रतिर। अंऊ दोऊ टोईच़ी चेहसी तोहई, “यहूदी तु रज्ज़ा” पिलातुसे दोतु हखा दि ए चेहज़िमी थल्जी कुहते।

दोहपल सैनिका ज़ि यीशु खमज़े तु थल्जी डाक केहच़ी च़रतिर। अपेहल दोच़ि झांह लहरिर दंङ दोच़ि दू भविष्यवाणी पूरा लहरिर अंऊ दोई कुट्राते, “दोच़ि गिऊ खमज़ेर एनातु बिचंङ फाए च़रतिर, दंङ गिऊ खमज़े तु थल्जी डाक केहच़ी च़रतिर।”

दोर्तिंङ झुह्ट डाकू ला तोईरे, अंऊ दोति सैनिका ज़ि दू ए मुक्का क्रूसो टोईच़ी चढ़ाएकाते। दोच़ि दोकु तिंङ यीशु देसी-न्वेसी केहषी तातेर। दोकु बिचंङ ज़ि ईदि यीशु मज़ाक उड़ाएकाते, पर अईसंग ए कुई, “छि केई माह ञेंहच़ातन कि परमेश्वरे कनिंङ सज़ा रमतो? हेनर महसे मदम कम लहज़िमी दोषी तोतोंई, पर दि मीह निर्दोष तोह।” दंङ दोई यीशु हखा कुई, “अपेहल कांह केनोह राजा रिंङ योन ता गिहबी हिद तोह।” यीशु ज़ि जबाब रांई, “तोग ए का गेरंङ साते स्वर्गंङ शोन।”

यहूदी अगुवा ज़ि ए भीड़ो मीहच़ी यीशु मज़ाक उड़ाएतिर दोच़ि दोऊ हखा कुईरे, “अगर कांह परमेश्वरो योह शुनाह ता, क्रूसो योंखा तक्सा अता दंङ केनाबि बचाके च़रतु! दोहपल ञेंहच़ी कनु टोईच़ी विशवास लोहनि।”

दोहपल दू भत्ते देशा रिंङ सर्ग पूरे ठ्रोह रोह्की शुचि इलि, भले ए दू इच्चा ध्याड़ो निरो टेम तोहई। दि निरो टेम रोह्की शुचि इलज़ि तोहई दंङ षुमु घंटा तचेक ध्यांए तोहई।

दोहपल यीशु ज़ि हाऊष रैं कुई, “पूरा शुई! हे बाह, गेह घैङों आत्मा कनु गुह्ड़ि रंड्रातग।” दोहपल दोई एनोह पुंज़ा योंखा लहरी दंङ एनोह प्राण रैं च़रति। अपेहल दू सिरी ता इच्चा भूंयल अति। दू मोह्ड़े पर्दा अंऊ परमेश्वरो हाज़िरी ओ दोरच़ी मीहतिंङ श्ताह लहज़ाते तोरकीं दोरच़ी योंने मुखंङ तचेक फ्रक्शा झुह्ट खंणी शुचि इलि।

एनोह सिमी दोरच़ी, यीशु ज़ि मीहतु थल्जी परमेश्वरो कछंङ अपिमी अम अलज़े च़रति। अपेहल यीशु निगरानी लहज़ा सैनिका ज़ि छि ला शुचि तोहई दि भत्ते खंड्री लेहकी तोईरे दंङ दोच़ि कुईरे, “पक्का, ए दि मीह निर्दोष तोहई। दि परमेश्वरो योह शुह।”

दोहपल यूसुफ ए नीकुदेमुस मिन्दु झुह्ट यहूदी अगुवार अतिर। दोच़ि विशवास लहज़ातेर कि यीशु ए मसीह तोहई। दोच़ि पिलातुसो दोरच़ी यीशु फुक पेट्रीर। दोच़ि दोऊ फुक खमज़े ए अंदरेग जिल्ली। दोहपल दोच़ि दोबि इच्चा चट्टाना बि ट्रिकी बणाएशी कब्रा रिंङ रैंज़ा शिलिर दंङ दोऊ अंदरेग केहच़ी च़रतिर। दोहपल दोच़ि दू कब्रो पेतंङ बंद लहज़िमी थल्जी इच्चा मोह्ड़े रह्घ केहच़ी च़रतिर।